Te lichʼi ta jun abol sba lum ta Montreal. Voʼon mas kʼoxun li ta vaxakvoʼ jchiʼiltak ta vokʼele. Kʼalal vukub toʼox u kichʼoje jaʼo cham li jtote, jaʼ yuʼun jaʼ xa la skʼelunkutik li jmeʼkutike.

Ta jbikʼtal onoʼox lik jlajes droga, bat ta koʼonton tsalbail ta takʼin xchiʼuk majbail. Li jchiʼiltake jaʼik li buchʼutik chopol stalelalike. Kʼalal lajuneb toʼox jabilale, yakal xaʼox ta jkoltaik ta spasel kʼusi tskʼanbeikun li jchonbail antsetike xchiʼuk li buchʼutik chakʼik ta chʼom stakʼinike. Toj lek xkaʼi sloʼlael li krixchanoetike xchiʼuk nop tajek xkaʼi spasel.

Kʼalal chanlajuneb jabilale xitojob xaʼox tajek sloʼlael li krixchanoetike. Jech kʼuchaʼal liʼe, ta jman epal relojetik, pulseraetik xchiʼuk aniyoetik ti yichʼoj jutuk oroe, vaʼun ta jtsʼiba ti 14 kilate xa yichʼoj yileluke xchiʼuk chbat jchon ta kayeetik xchiʼuk li ta skotleb karoetik ta mukʼtik pʼolmajebaletike. ¡Solel lek ta jpas-o kanal! Jun veltae la jpas kanal lajunmil dolar ta jun noʼox kʼakʼal.

Kʼalal voʼlajuneb toʼox jabilale, la snutsikun lokʼel li ta chukinab sventa kerem tsebetike, jaʼ yuʼun muʼyuk xa jna likom. Te chivay ta kaye, ta parke o ta sna kamigotak.

Oy jayibuk velta la stsakikun li polisiaetik ta skoj ti chʼabal jpermiso chichonolaj xchiʼuk chimanolaje. Ta skoj ti maʼuk elkʼanbil li kʼusitik ta jchone, muʼyuk onoʼox libat ta chukel. Akʼo mi ep ta velta laj kakʼ multa ta skoj ti ta jloʼla li krixchanoetike, ti maʼuk orijinal li kʼusi ta jchone xchiʼuk ti muʼyuk jpermisoe. Solel mu jnaʼ xixiʼ, jaʼ yuʼun la jkoltaik ta abtel li buchʼutik chakʼik ta chʼom stakʼinike. Ta skoj ti toj xibal sba li abtelal taje, bakʼintike chkichʼ batel jpistola. Jech noxtok li-abtej xchiʼuk li buchʼutik toj chopol kʼusitik tspasike.

Li ta sba velta laj kaʼibe skʼoplal li kʼusi chal Vivliae jaʼo kʼalal vuklajuneb toʼox jabilale. Te toʼox jmoj nakalun xchiʼuk jlekom, li stuke lik xchan Vivlia xchiʼuk li stestigotak Jeovae. Ta skoj ti mu lekuk laj kaʼi li kʼusi chal ta sventa jkuxlejaltik li Vivliae, la jten komel  li jlekome, jaʼ yuʼun bat nakikun xchiʼuk yan tseb ti yakal xa onoʼox chkojtikine.

Pe jaʼ to chkil xtoke lik xchan Vivlia xchiʼuk stestigotak Jeova li tsebe. Toj lek laj kil ti kʼu yelan la sjel stalelale: mas xa lek yoʼonton xchiʼuk mas xa oy smalael yuʼun. Jun veltae laj yalbeikun mi ta jkʼan chibat ta stsobajelik li stestigotak Jeovae, laj kal ti tanae. Toj lek stalelalik li krixchanoetik tee yuʼun toj lek la xchʼamikun, jech oxal toj lek laj kaʼi jba. Yuʼun kʼalal bikʼitun toʼoxe muʼyuk onoʼox laj yakʼbeikun ta ilel ti skʼanojikune xchiʼuk li kutsʼ kalale muʼyuk onoʼox mas oyun ta yoʼontonik. Ti kʼu yelan la xchʼamikun li stestigotak Jeovae jaʼ onoʼox li kʼusi chtun kuʼune. Kʼalal laj yalbeikun mi ta jkʼan chanubtasel ta Vivliae, ta ora noʼox laj kal ti tanae.

Li kʼusi la jchane xuʼ van jaʼ la spojbun jkuxlejal. Jchapoj xaʼox lek jkʼopkutik ti kʼu yelan chbat elkʼajkunkutik xchiʼuk chaʼvoʼ j-elekʼetike, yuʼun chtun kuʼun 50 mil dolar sventa ta jtoj-o li kil ta tajimole. Bal to ti muʼyuk xa libate. Li chaʼvoʼ jchiʼiltake bat onoʼox elkʼajikuk, pe laj ta milel li june xchiʼuk och ta chukel li june.

Kʼalal yakal ta jchan batel li Vivliae jaʼ te laj kakʼ venta ti ep kʼusitik skʼan jel ta jkuxlejale. Jech kʼuchaʼal liʼe, li Vivliae xi chal ta 1 Korintios 6:10: «Li j-elekʼetike, li buchʼu mu x-echʼ yoʼontonik ta skʼanel kʼusitike, li jyakubeletike, li jchopol-loʼiltavanejetike xchiʼuk li buchʼutik tsloʼla krixchanoetik ti jaʼ noʼox tskʼan takʼine, muʼyuk bu chuʼuninik li Ajvalilal yuʼun Diose». Kʼalal la jkʼel li teksto taje lik okʼkun. Yuʼun ep kʼusitik skʼan jel li ta jkuxlejale (Romanos 12:2). Muʼyuk toʼox smelolal li jkuxlejale yuʼun toj echʼem toʼox xkap jol xchiʼuk xiloʼlavan.

Akʼo mi jech, la jchan ta Vivlia ti ch-akʼvan ta perton li Jeovae xchiʼuk ti lek yoʼontone (Isaías 1:18). Jaʼ yuʼun ta sjunul koʼonton la jkʼanbe ti akʼo skoltaun ta yiktael li kʼusi nopem xkaʼi spasele xchiʼuk ti jel li jkuxlejale. Koliyal ti la skoltaun li Jeovae, ta kʼunkʼun kom kuʼun li kʼusitik chopole. Jtos ti kʼusi lek la jpaskutik xchiʼuk li jlekome jaʼ ti linupunkutike.

Kʼalal 24 xaʼox jabilale oy xaʼox oxvoʼ jnichʼnabtak. Jaʼ yuʼun ta jkʼan ti oyuk kabtel ti bu muʼyuk xa chiloʼlavane. Pe muʼyuk mas chanunajemun xchiʼuk mu xitojob lek ta abtel. La jkʼanbe koltael yan velta Jeova vaʼun bat jsaʼ kabtel. Kʼalal chchiʼinikun ta loʼil li yajval abtelaletike chkalbeik ti muʼyuk toʼox lek li jkuxlejale, pe ti ta jkʼan chijel sventa jaʼuk lekil j-abtelune. Bakʼintike chkalbeik ti yakal ta jchan Vivlia sventa jaʼuk xa lekil krixchanoune. Pe muʼyuk buchʼu laj yakʼbeikun kabtel. Ta slajeb xa une, kʼalal laj kalbe ti kʼu toʼox yelan jkuxlejal ta voʼne li yajval abtele, xi laj yalbune: «Mu jnaʼ lek kʼu yuʼun pe oy kʼusi chalbun chkaʼi ti skʼan xkakʼbot avabtele». Jnaʼoj lek ti jaʼ stakʼobil li kʼusi la jkʼanbe Jeovae. Ta tsʼakal jutuke likʼotkutik ta stestigo Jeova xchiʼuk li kajnile.

Ti kuxulun to li avie jaʼ koliyal ti laj kakʼ ta jkuxlejal li tojobtaseletik ta Vivliae xchiʼuk ti ta jchanbe stalelal li Kristoe. Toj lek oyunkutik xchiʼuk li kutsʼ kalale, jech xtok ta skoj ti jnaʼoj ti yakʼojun xa ta perton li Jeovae lek xa sak li jol koʼontone.

Oy xa ta chanlajuneb jabil ta jchʼak lek jkʼakʼal sventa jkolta li krixchanoetik ta xchanel li Vivliae, yuʼun 70 ora ta jchol mantal jujun u, li kajnile jech xa tspas ek. Jech noxtok, li 30 jabil echʼem xa talele jkoltaoj xa 22 jchiʼiltak ta abtel sventa xkʼotik ta stestigotak Jeova. Li avie chikʼot to li ta mukʼtikil pʼolmajebaletike pe maʼuk xa sventa chbat jloʼla li krixchanoetik kʼuchaʼal toʼox ta jpase. Yuʼun jaʼ xa chkʼot kalbeik ti oy jun spatobil oʼontonale: ti xuʼ xkuxiik ta jun achʼ balumil ti bu chʼabal xa j-elekʼetike (Salmo 37:10, 11).