Te livokʼ ta Acul, jun jteklum ti te xkom ta smaleb kʼakʼal ta Guatemalae xchiʼuk ta vitstikaltik to chʼikil. Li kutsʼ kalale te likem tal stsʼunbal ta ixil, jtsop krixchanoetik ti likem tal snitilulalik ta mayae. Jech xtok maʼuk noʼox ta español chikʼopoj, yuʼun la jchan li jbatsʼikʼopkutike. Kʼalal lichʼie jaʼo yorail tsatsal paskʼop li ta Guatemalae, ti 36 jabil jalije. Li ta paskʼop taje solel ep cham jchiʼiltakutik.

Kʼalal chanib toʼox kuni jabilale, li jbankil ti vukub sjabilal ti yakal chixtolan jpʼej bikʼit vombae tʼom yuʼun. Ta skoj taje maʼsat likom, pe li jbankile cham. Vaʼun te xa lichʼi tal ta snail maʼsatetik ta Guatemala ti bu la jchan skʼelel brailee. Li buchʼu chchabi snail maʼsatetike muʼyuk laj yakʼ jchiʼin ta loʼil li yan ololetike xchiʼuk li jchiʼiltake mu skʼan xchiʼinikun, muʼyuk onoʼox la jnaʼ kʼu yuʼun ti jech la spasbeikune. Skotol ora jtuktuk oyun, ta jkʼan xa tajek ti xkʼot skʼakʼalil li chib u ti chbat jchiʼin jmeʼe, yuʼun toj lek yoʼonton. Pe kʼalal lajuneb toʼox jabilale cham li jmeʼe. Toj echʼ xa noʼox kʼux laj kaʼi, yuʼun cham li buchʼu mas skʼanojune.

Kʼalal buluchib jabilale, lisut batel ta jteklumal xchiʼuk bat jchiʼin ta naklej li jchaʼbankil xchiʼuk yutsʼ yalale. Laj yakʼbeikun li kʼusi chtun kuʼune, pe mi junuk buchʼu xuʼ spatbeikun koʼonton. Bakʼintike xi tsotsik chkalbe li Diose: «¿Kʼu yuʼun cham li jmeʼe? ¿Kʼu yuʼun ti maʼsat likome?». Li krixchanoetike chalbeikun ti yuʼun la jaʼ jech tskʼan Dios li kʼusi kʼot ta jtojolale. Jech oxal la jnop ti mu jsetʼuk slekil yoʼonton li Diose. Ti oyuk kʼusi la jtae la jmil jba ti jechuke.

Kʼalal mak li jsate mu xa xkʼel jba kuʼun jtuk xchiʼuk la jvul tajek koʼonton. Kʼalal kʼoxun toʼoxe, ep ta velta laj kichʼ ilbajinel ta chiʼinejbail ta vayel. Muʼyuk laj kalbe smulik li buchʼutik laj yilbajinikune, yuʼun la jnop ti muʼyuk buchʼu xuʼ skoltaune. Jutuk tajek chchiʼinikun ta loʼil li krixchanoetike. Chkat koʼonton xchiʼuk mu jkʼan jchiʼin ta loʼil yan krixchanoetik, yuʼun mu jpat koʼonton ta stojolalik.

Kʼalal oxlajuneb toʼox jabilale, oy jun nupultsʼakal ti jaʼik stestigotak Jeovae la xchiʼinikun ta loʼil ta j-eskuela kʼalal jaʼo lokʼemun ta rekreoe. Oy jun maestra ti kʼuxun ta yoʼontone laj yalbe li stestigotak Jeova ti akʼo tal svulaʼanikune. Laj yalbeikun ti yaloj Vivlia ti chjam satik  li maʼsatetike xchiʼuk ti chchaʼkuxiik li animaetike (Isaías 35:5; Juan 5:28, 29). Toj lek chkaʼi li kʼusi chalbeikune, pe ta skoj ti muʼyuk nopem xkaʼi xiloʼilaje, te tsʼijil chikom. Akʼo mi te noʼox xitsʼijet, laj yakʼ ta ilel slekil yoʼontonik xchiʼuk smalael yuʼunik ta jtojolal, yuʼun talilanik-o svulaʼanikun sventa xchanubtasikun li ta Vivliae. Lajuneb kilometro chanavik ta vitstikaltik sventa xtal skʼelikun li ta jlumale.

Li jbankile laj yalbun kʼu yelan li ermanoetike, laj yalbun ti abol sbaike; pe lek tsmeltsan sbaik batel. Lek xvinaj ti skʼanojikune yuʼun chakʼbeikun kuni moton. Jnaʼoj lek ti jaʼ noʼox stuk li melel yajtsʼaklomtak Kristo ti ep kʼutik yelan chakʼik ta ilel slekil yoʼontonike.

Kʼalal ta jchankutik li Vivliae jaʼ ta jtuneskutik li vunetik ta braile kʼope. Xkaʼibe smelol li kʼusi yakal ta jchane, pe jaʼ noʼoxe mu jchʼun junantik. Jech kʼuchaʼal liʼe, toj vokol chkaʼi xchʼunel ti oyun ta yoʼonton li Diose xchiʼuk ti lekuk xilikun li yantik jech kʼuchaʼal chilun li Diose. Laj kaʼibe smelolal ti kʼu yuʼun yakʼoj to oyuk choplejal li Diose, pe toj vokol laj kaʼi ti jechuk xkil kʼuchaʼal jun jkʼanvanej totile. *

Kʼalal laj kaʼibe smelolal li kʼusi chchanubtasvan li Vivliae, ta kʼunkʼun jel batel li kʼusi toʼox ta jnope. Jun skʼelobile, la jchan ti toj kʼux chaʼi Dios kʼalal chakʼ venta ti chkil jvokoltike. Li Diose xi chal ta stojolal li yajtuneltak ti chlajik ta ilbajinele: «Quiloj scotol cʼu xʼelan xcʼuxul svocolic li [jteklumale] [...] xchiʼuc jnaʼoj lec scotol ti cʼu xʼelan chichʼic vocole» (Éxodo 3:7). Kʼalal laj kakʼ venta ti toj lek yoʼonton li Jeovae, la jnop ti chkakʼ jkuxlejal ta stojolal sventa jpas li kʼusi tskʼane. Li ta 1998 laj kichʼ voʼ, vaʼun likʼot ta stestigo Jeova.

Kʼalal echʼ xaʼox van junuk jabil ti kʼuxi laj kichʼ voʼe, laj kakʼ jun kurso sventa maʼsatetik ta jteklum Escuintla. Jun ermano ti jaʼ sbainoj skʼelel tsobobbail li ta lum taje laj yaʼi ti toj vokol chkaʼi ti chibat ta tsobajel ti chilik tal ta Acule, yuʼun ch-echʼ jtuchʼ tal vitsetik jech kʼuchaʼal tspasik toʼox li jun nupultsʼakal ti chkʼot yakʼbeikun toʼox chanubtasel ta Vivliae. Sventa xuʼ skoltaun li ermano taje, la sta jun utsʼ alalil ti jaʼik stestigo Jeova ti chakʼbeikun ta chʼom snaike xchiʼuk ti tskoltaikun kʼalal chibat ta tsobajeletike. Li avie jech-o chchabiikun yuʼun xkoʼolaj kʼuchaʼal yutsʼ yalal chilikun.

Mu xlaj kalboxuk skotol ti kʼu yelan laj yakʼ ta ilel slekil yoʼontonik ta jtojolal li ermanoetike. Muʼyuk xinaʼet ti jaʼ melel yajtsʼaklomtak Kristo li stestigotak Jeovae (Juan 13:34, 35).

Li avie oy xa sbalil chkaʼi li jkuxlejale xchiʼuk oy xa spatobil koʼonton. Maʼuk ta jnop ti maʼsatune, jaʼ kakʼoj ta koʼonton skoltael li yantik yoʼ xojtikin li kʼusitik melel ta Vivliae, yuʼun ta jpasbe yabtel Dios ta tsʼakal ora. Li voʼon eke oy kabtel li ta tsobobbaile xchiʼuk ta jelubtas mantaletik li ta tsobobbailetik ti te noʼox nopol xkome. Jech xtok ta jtoj ta vokol ti chakʼbeikun jelubtas mantaletik li ta mukʼta tsobajeletik ti ta smilal noʼox krixchanoetik chkʼotike.

Li ta 2010, nel kuʼun ta El Salvador li Chanob vun sventa Xchanubtasel Jtuneletike (li avie ojtikinbil kʼuchaʼal Chanob vun sventa j-al lekil aʼyejetik yuʼun Ajvalilal yuʼun Dios). Li chanob vun taje la xchapanun sventa xitojob lek skoltael li kermanotake. Jech xtok la skoltaun sventa kʼanbilun xkaʼi jba xchiʼuk ti oyuk jbalil xilun li Jeovae, yuʼun li stuke tstunes buchʼuuk noʼox krixchanoal sventa xichʼ pasel li yabtele.

Li Jesukristoe laj yal ti «jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35). Akʼo mi laj toʼox jnop ti mu xuʼ ximuyubaje, pe li avie xkuxet koʼonton ta melel xchiʼuk xkoltaj xa kuʼun chkaʼi li yantike.