ЭСКЕРОН ПОННА 20-ТӤ СТАТЬЯ
67-ТӤ КЫРӞАН «Инмар кылэз тодыты»
Яратон мылкыдмес мед ӝутоз азьланяз но тодытыны!
«Азьвыл вань калыкъёс пӧлын Евангелие тодытэмын луыны кулэ» (МАРК 13:10).
МИ ТОДОМЫ
Кызьы яратон милесьтым мылкыдмес ӝутэ вань сюлмысьтымы тодытыны.
1. Мае ми тодӥмы 2023-тӥ арын арлы быдэ ортчись пумиськонын?
МАКЕМ паймымон вал 2023-тӥ арын арлы быдэ ортчись пумиськон a! Отын верамын вал, кызьы ми табере валаськомы Библиысь куд-ог дышетонъёсты. Озьы ик верамын вал куд-ог ялонъёс, кудъёсыз ужан-тыршонэнымы герӟаськемын. Кылсярысь, ми тодӥмы, Быдӟым Вавилонэз быдтэм бере но адямиослэн Иеговалэн калыкез пала султыны луонлыксы луоз на, вылды, шуыса. Со сяна, ми тодӥмы, 2023-тӥ арысен, шуркынмонысен, ивортӥсьёслы ужан-тыршонзы сярысь пыр-поч отчёт сётыны кулэ ӧвӧл ни шуыса. Возьматэ-а та, табере ми ӧжытгес тодытыны быгатӥськомы шуыса? Со озьы ӧвӧл!
2. Малы тодытон уж нуналысь нуналэ кулэгес но кулэгес луэ? (Марк 13:10).
2 Нуналысь нуналэ тодытон уж кулэгес но кулэгес луэ. Малы? Малы ке шуоно дыр быре ни. Малпаське, мар вераз Иисус уж сярысь, кудзэ солэн дышетскисьёсыз берпум нуналъёсы быдэсъялозы. (Лыдӟе Марклэсь 13:10.) Матфей Иисуслэсь кылъёссэ тазьы гожтӥз: «Эксэйлыклэн та Евангелиез быдэс дунне вылын тодытэмын луоз; собере пум вуоз» (Матф. 24:14). Татын вераське Шайтанлэн лек дуннеезлэн пумыз сярысь. Со понна Иегова «нуналэз но часэз» пуктӥз ини (Матф. 24:36; 25:13; Ап. уж. 1:7). Со дыр пумен матэгес но матэгес вуэ (Рим. 13:11). Нош али милемлы тодытыны кулэ.
3. Мар милесьтым мылкыдмес ӝутэ тодытыны?
3 Малпаськомы таӵе юан вылын: «Мар милесьтым мылкыдмес ӝутэ ӟеч иворез тодытыны?» Яратон. Тодытыса ми возьматӥськомы, яратӥськомы шуыса ӟеч иворез, адямиосты, нош самой валтӥсез — Иеговаез но солэсь нимзэ. Ойдолэ та сярысь пыр-почгес вераськомы.
МИ ТОДЫТӤСЬКОМЫ, МАЛЫ КЕ ШУОНО ӞЕЧ ИВОРЕЗ ЯРАТӤСЬКОМЫ
4. Мар ми кариськомы, куке умой иворъёсты кылӥськомы?
4 Тодады вае, мае тӥ шӧдӥды, куке кыӵе ке умой иворез кылӥды. Кылсярысь, ӵыжы-выжыостылэн пиналзы вордӥськиз. Яке тӥ шедьтӥды уж, кудзэ туж кемалась утчаськоды вал ини. Валамон, тӥляд со иворез матысьёстылы но эшъёстылы чалякгес верамды потэ вал. Нош мае тӥ шӧдӥды, куке кылӥды самой умой иворез — Инмарлэн Эксэйлыкез сярысь иворез?
5. Мае тӥ шӧдӥды, куке нырысьсэ кылӥды Инмарлэн Кылысьтыз зэмлыкез? (Озьы ик учке суредъёсты.)
5 Ойдолэ тодамы ваёмы со дырез, куке ми нырысьсэ кылӥмы Инмарлэн Кылысьтыз зэмлыкез. Ми валамы, инмысь Атаймы милемыз яратэ но солэн милемыз аслаз семьяяз пыртэмез потэ шуыса. Ми тодӥмы, со вӧсь луонэз но курадӟонъёсты быдтоз шуыса. Со сяна, милям осконмы кылдӥз матысь адямиосмес адӟыны, куке соос выль дуннеын улӟытэмын луозы (Марк 10:29, 30; Иоанн 5:28, 29; Рим. 8:38, 39; Усьт. 21:3, 4). Та зэмлыкъёс сюлмамы ик пыризы (Лука 24:32). Ми соосты яратӥмы но пушкамы возьыны ӧм быгатэ ни! (Ӵошатэ Иеремиялэсь 20:9.)
Куке ми нырысьсэ ӟеч иворез кылӥмы, милям сое ваньмызлы вераммы потӥз! (Учке 5-тӥ абзацез.)
6. Малы тӥледыз дышетэ Эрнест но Роза кузпалъёслэн учырзы?
6 Тани одӥг семьялэн учырез. Куке Эрне́ст b агайлы 10 арес котыр вал, солэн атаез кулӥз. Пияшлэн туж тодэмез потэ вал, кытын табере атаез: инмын яке нокытын но ӧвӧл ни? Со туж вожъяське вал мукет нылпиослы, кудъёсызлэн атайзы но, анайзы но вал. Эрнест котькуд нунал кадь шайвылэ ветлэ вал но пыдесъяськыса атаезлэн шайгуэз вӧзын вӧсяське вал: «Инмаре, курисько тонэ, юртты мыным тодыны, кытын мынам атае». Ог 17 ар ортчыса, Эрнестлы Библиез дышетыны ӵектӥзы. Со шумпотыса соглаш кариськиз. Со валаз, кулэмъёс номыре уг тодо, соос умме усем адямиос кадь шуыса, нош азьланяз соосты улӟытон возьма шуыса (Екк. 9:5, 10; Ап. уж. 24:15). Тае тодыса, Эрнест туж шумпотӥз. Со валаз сое, мае кемалась валамез потэ вал ини. Эрнестлы Библиысь зэмлыкъёс туж кельшо вал. Роза кышноез но Библиез дышетыны кутскиз. Солы но Библиысь тодэмез туж кельшиз. Соос пылатӥськизы 1978-тӥ арын. Та кузпалъёс, кужымзэс жалятэк, Библиысь дуно зэмлыкъёсты семьязылы, эшъёссылы но мукет адямиослы вераллязы. Эрнест но Роза 70-лэсь но тросгес адямиослы юрттӥзы Иеговаен тодматскыны но пылатӥськыны.
7. Мар милям кареммы потэ, куке вань сюлмынымы Библиысь зэмлыкез яратӥськомы? (Лука 6:45).
7 Зэм но, куке ми вань сюлмынымы Библиысь зэмлыкез яратӥськомы, ми сое вератэк улыны ум быгатӥське (Лыдӟе Лукалэсь 6:45.) Милям Иисуслэн дышетскисьёсызлэн кадь ик шӧдонъёсмы кылдо. Соос веразы: «Ми ум быгатӥське адӟеммес но, кылэммес но вератэк улыны» (Ап. уж. 4:20). Ми зэмлыкез туж зол яратӥськомы, соин ик со сярысь тросгес адямиослы вераммы потэ.
МИ ТОДЫТӤСЬКОМЫ, МАЛЫ КЕ ШУОНО АДЯМИОСТЫ ЯРАТӤСЬКОМЫ
8. Мар милесьтым мылкыдмес ӝутэ адямиослы ӟеч иворез вераны? (Учке «Яратэ адямиосты — дышетэ соосты» рамкаез.) (Озьы ик учке суредэз.)
8 Иегова но солэн Пиез адямиосты ярато (Мад. 8:31; Иоанн 3:16). Милям соослэсь адӟем кареммы потэ. Ми адямиосты туж жаляськомы, малы ке шуоно соос Инмартэк но осконтэк уло (Еф. 2:12). Соос шуг-секытъёссы пӧлы выемын. Нош ми тодӥськомы Инмарлэн Эксэйлыкез сярысь ӟеч иворез, кудӥз соослы юрттыны быгатэ. Адямиосты яратон но гажан-жалян милесьтым мылкыдмес ӝуто котькуд тупась учыре соослы ӟеч иворез вераны. Инмарез тодыса, соос быгато али ик ини шудогес луыны но оскыны азьланяз выль дуннеын пырак улыны (1 Тим. 6:19).
Адямиосты яратон но гажан-жалян милесьтым мылкыдмес ӝуто котькуд тупась учыре соослы ӟеч иворез вераны. (Учке 8-тӥ абзацез.)
9. Мар сярысь ми вераськомы адямиослы но малы? (Иезекииль 33:7, 8).
9 Со сяна, адямиосты яратон милесьтым мылкыдмес ӝутэ вераны соослы лек дуннелэн матэктӥсь пумыз сярысь. (Лыдӟе Иезекиильлэсь 33:7, 8.) Милям сюлэммы ик вӧсь луэ, куке ми малпаськомы со сярысь, мар луоз вань адямиосын, озьы ик ӵыжы-выжыосынымы но, кудъёсыз Иеговалы ужатэк-тыршытэк уло. Тросэз уг но тодо, «бадӟым куректон луоз» шуыса, «кыӵеез дуннелэн кутсконысеныз туннэ нуналозь ӧй на вал, уз но луы» (Матф. 24:21). Милям потэ, адямиос мед тодозы шуыса, мар луоз Иеговалэн судэз дыръя: нырысь зэмос луисьтэм религия быдтэмын луоз, нош собере, Армагеддонын,— вань лек дунне (Усьт. 16:14, 16; 17:16, 17; 19:11, 19, 20). Ми вӧсяськиськомы, тросгес адямиос милемыз мед кылзозы но милемын ӵош Иеговалы мед ужалозы-тыршозы шуыса. Нош мар луоз соосын, кинъёс али милемыз уг кылзо, озьы ик ӵыжы-выжыосынымы но?
10. Малы али туж кулэ адямиослы вераны, мар луоз азьланяз?
10 Кызьы вераськиз ини кылем статьяын, Иегова утёз, вылды, соосты, кинъёс солы оскозы, куке адӟозы зэмос луисьтэм религилэсь быремзэ. Соин ик али ваньмызлы вераны кулэ, мар луоз Быдӟым Вавилонэн. Малпалэ гинэ: сое, мае ми адямиослы али вераломы, соос азьланяз тодазы вайыны быгатозы. (Ӵошатэ Иезекиильлэсь 33:33.) Оло нош, соос милесьтым кылъёсмес тодазы ваёзы но соослэн мылкыдзы ӝутскоз пум вуэмлэсь азьло милемын ӵош Иеговалы ужаны-тыршыны. Кылсярысь, Филиппы карысь пытсэт возьмась туж кужмо музъемзуркан бере гинэ Иисуслы оскиз (Ап. уж. 16:25—34). Ӵапак озьы ик куд-ог адямиос Иеговалы оскозы, вылды, Быдӟым Вавилонлэсь быремзэ адӟыса гинэ. Адямиос али ӟеч иворлы уг оско ке но, та уг возьматы, соос солы азьланяз уз оске шуыса.
МИ ТОДЫТӤСЬКОМЫ, МАЛЫ КЕ ШУОНО ИЕГОВАЕЗ НО СОЛЭСЬ НИМЗЭ ЯРАТӤСЬКОМЫ
11. Кызьы ми Иеговаез данъяськомы но солы кужыммес сётӥськомы? (Усьтӥськон 4:11). (Озьы ик учке суредъёсты.)
11 Валтӥсез муг, малы ми ӟеч иворез тодытӥськомы,— ми Иеговаез но солэсь святой нимзэ яратӥськомы. Ӟеч иворез вераса, ми яратоно Атаймес данъяны быгатӥськомы. (Лыдӟе Усьтӥськонэз 4:11.) Ми быдэсак соглаш таӵе кылъёсын: «Тон, Кузё-Инмаре, данлыкез, сӥ-данэз, кужымез басьтыны ярась». Ми Иеговаез данъяськомы, куке мукетъёсызлы вераськомы, малы оскыны луэ, со ваньзэ кылдытӥз но милемлы улон сётӥз шуыса. Озьы ик ми Инмарлы кужыммес сётӥськомы, куке дырмес но коньдонмес кутӥськомы, быгатэммыя тросгес тодытон понна (Матф. 6:33; Лука 13:24; Кол. 3:23). Ми ваньзэ тае лэсьтӥськомы, малы ке шуоно милемлы кельше яратоно Инмармы сярысь вераны. Озьы ик милям мукетъёсызлы вераммы потэ Иеговалэн нимыз но сямъёсыз сярысь. Малы?
Ми Иеговалы кужыммес сётӥськомы, куке дырмес но коньдонмес кутӥськомы, быгатэммыя тросгес тодытон понна. (Учке 11-тӥ абзацез.)
12. Кызьы ми ужан-тыршонэнымы Иеговалэсь нимзэ данъяськомы?
12 Ми Иеговаез яратӥськомы, соин ик солэсь нимзэ данъяськомы (Матф. 6:9). Пӧяськыса Шайтан Инмарлэсь нимзэ саптаз, нош милям сое чылкытатэммы потэ (Ул.-выл. 3:1—5; Иов 2:4; Иоанн 8:44). Ми Инмарлэсь ӟеч нимзэ утиськомы, куке со сярысь зэмлыкез вераськомы ваньмызлы, кин милемыз кылзыны дась. Милям потэ, адямиос но мед тодозы шуыса сое, мае ми тодӥськомы. Яратон — Иеговалэн валтӥсь сямыз. Инмар шонерлыко кивалтэ. Ӝоген солэн Эксэйлыкез вань курадӟонъёсты быдтоз но адямиослы тупаса но шудо улыны юрттоз (Пс. 36:10, 11, 29; 1 Иоанн 4:8). Иеговалэсь ӟеч нимзэ утьыса, ми солэсь нимзэ данъяськомы. Озьы ик ми шумпотӥськомы, ми асьмеос но милемлы сётэм ниммыя улӥськомы шуыса. Мар сярысь ми вераськомы?
13. Малы ми данъяськиськомы, ми Иеговалэн Адӟись-Ивортӥсьёсыз шуыса? (Исаия 43:10—12).
13 Иегова милемыз бырйиз аслаз адӟись-ивортӥсьёсыз луыны. (Лыдӟе Исаиялэсь 43:10—12.) Кивалтӥсь кенешлэн одӥгаз гожтэтаз тазьы гожтэмын: «Иеговалэн Адӟись-Ивортӥсеныз нимаськыны адями понна самой бадӟым дан» c. Малы озьы вераны луоз? Эскеромы тае пример вылын. Пуктэ син азяды, тӥледыз кыӵе ке йыруж понна янгыше уськыто шуыса. Тӥледлы кулэ адӟись-ивортӥсь, кудӥз судэ лыктысал но верасал, тӥ умой адями но сыӵе ужез ноку ӧй лэсьтысалды шуыса. Кинэ тӥ быръёды? Сое, кинэ умой тодӥськоды но кинлы оскиськоды, кинлэн ӟеч нимыз вань но кинэ кылзозы. Куке Иегова милемыз бырйиз аслаз Адӟись-Ивортӥсьёсыз луыны, со возьматӥз, милемыз умой тодэ но милемлы оске мукетъёсызлы вераны, со одӥг гинэ зэмос Инмар шуыса. Иеговалэн Адӟись-Ивортӥсьёсыз луыны — ми понна бадӟым дан! Соин ик ми котькуд тупась учыре тыршиськомы солэн нимыз сярысь вераны но со сярысь пӧяськонъёсты шараяны. Озьы ми лэсьтӥськомы сое, мар сярысь вера милям ниммы — Иеговалэн Адӟись-Ивортӥсьёсыз! (Пс. 82:19; Рим. 10:13—15).
МИ ПУМОЗЯЗ ИК ТОДЫТОМЫ
14. Мае ми возьмаськомы вуоно дырлэсь?
14 Мае ми возьмаськомы вуоно дырлэсь? Ми оскиськомы, Иегова тодытыны тыршеммес бакель кароз но бадӟым куректон кутскытозь трос адямиос зэмлыклы оскозы на шуыса. Озьы ик милемыз шумпоттэ таӵе малпан: самой секыт дыре но — бадӟым куректон дыръя — адямиос быгатозы, вылды, Шайтанлэн бырись дуннеысьтыз потыны но милемын ӵош Иеговаез данъяны (Ап. уж. 13:48, ВД).
15, 16. Мар ми каромы но кыӵе дырозь?
15 Нош али милям туж трос ужмы вань. Ми быдэстӥськомы ужез, кудзэ ноку ум быдэсъялэ ни: быдэс дунне вылын Инмарлэн Эксэйлыкез сярысь ӟеч иворез тодытӥськомы. Со дыре ик ми адямиослы вераськомы, ӝоген та лек дуннелы пум вуоз ни шуыса. Нош куке Иегова адямиосты судъяны кутскоз, соос валалозы, ивор, кудзэ ми тодытӥмы, Иеговалэсь вал шуыса (Иез. 38:23).
16 Озьыен, мар карыны мылкыдмес ӝутэ та статья? Ӟеч иворез, адямиосты, Иеговаез но солэсь нимзэ яратыса, азьланяз но вань сюлмысьтымы тодытыны со дырозь, куке Иегова вералоз: «Уж быдэстэмын!»
54-ТӤ КЫРӞАН «Тани сюрес»
a Арлы быдэ ортчись пумиськон ортчиз 2023-тӥ арын 7-тӥ коньывуонэ Иеговалэн Адӟись-Ивортӥсьёсызлэн конгрессъёсты ортчытон юртазы, кудӥз интыяськемын Ньюбергын (Огазеяськем Штатъёс, Нью-Йорк штат). Берлогес быдэс пумиськон возьматэмын вал JW Broadcasting® программаын: 1-тӥ люкетэз — 2023-тӥ арын, шуркынмонэ, нош 2-тӥ люкетэз — 2024-тӥ арын, толшоре.
b Учке 2015-тӥ арын 1-тӥ тулыспал понна поттэм «Возьмаськон башняысь» «Библия меняет жизнь. Меня убедили ясные и логичные ответы из Библии» статьяез.
