Мон вордӥськи Акуль нимо пичи карын, со интыяськемын Гватемалалэн шундыпуксён палаз гурезё интыын. Милям семьямы майя выжыысь ишиль калыкысь. Испан кылын сяна, мон ас калыкелэн кылыныз но вераськисько вал. Пичи дыръям Гватемалаын граждан ож мынӥз. Со 36 ар ӵоже кыстӥськиз. Со дыре милям калыкмы пӧлысь туж трос адямиос кулӥзы.

Куке мыным ньыль арес вал, сизьым аресъем агае гранатаен шудэ вал но, со малпамтэ шорысь пуштӥз. Соин ик мон синтэм кыли, нош агае кулӥз. Собере вань пичи дырме мон ортчытӥ Гватемала карын, синтэм нылпиослы интернатын, кытын монэ Брайль шрифтэз валаны дышетӥзы. Дышетӥсьёс малы ке но мукет нылпиосты монэн вераськыны уг лэзё вал. Соин ик соос мынэсьтым палэнскыны кутскизы. Мыным туж мӧзмыт вал. Арлы быдэ мон туж возьмай кык толэзьёсты, куке анае доры бертыны быгатӥсько вал. Монэн со ассэ ӟеч возиз но монэ котьку валаз. Нош куке мыным дас арес вал, анае кулӥз. Мынам сюлмы ик чигиськиз, малы ке шуоно со гинэ монэ яратэ вал.

11 арес дыръям мон вордӥськем карам берытски но, сюранаелэн пиеныз но солэн семьяеныз улыны кутски. Мынам сиёнэ но, дӥськутэ но вал. Но мыным яратон ӧз тырмы. Куддыръя мон бӧрдыса ик Инмарлэсь юасько вал: «Малы мынам анае кулӥз? Малы мон синтэм кыли?» Адямиослэн верамзыя, Инмарлы озьы кулэ вал. Соин ик мон малпай, Инмар лек шуыса. Мон быгатысал ке, асме быдтысал но, дыр.

Синтэм кылеменым, мон асме утьыны ӧй быгаты. Пичи дыръям монэ кӧня ке пол эриктэмазы. Мон нокинлы со сярысь ӧй вера, малы ке шуоно малпай, мон нокинлы но кулэ ӧвӧл шуыса. Адямиос шер монэн вераськизы, мон но соосын ӧй вераськы. Мон адямиослэсь палэнскыса но секыт мылкыдын улӥ. Мон нокинлы но ӧй оскы.

Одӥг пол школаын, урокъёс вискын, мон доры Иеговалэн Адӟись-Ивортӥсьёсыз лыктӥзы. Одӥг дышетӥселы мон жаль потӥсько вал. Соин ик со та кузпалъёсты куриз мон доры лыктыны. Соос веразы мыным Библиысь кылсётонъёс сярысь, кулэмъёс улӟозы но синтэмъёс нош ик адӟозы шуыса (Исаия 35:5; Иоанн 5:28, 29). Соослэн верамзы мыным туж кельшиз. Но соосын вераськыны мыным секыт вал, малы ке шуоно адямиосын мон туж ӧжыт вераськисько вал ини. Та шоры учкытэк, соос азьланяз но мон доры ветлӥзы но Библиысь зэмлыклы дышетӥзы. Соос котьку лякытэсь но чидасесь вал. Мон доры лыктон понна, соослы гурезьёстӥ 10 иськем мыноно вал.

Сюранаелэн пиез вераз мыным, та адямиос ӝикыт дӥсяськемын, но туж ик узыресь ӧвӧл шуыса. Соос котьку юазы, кыӵе мынам ужъёсы. Мыным пичи кузьымъёс но вайылӥзы. Мон валай, зэмос христианъёс гинэ, асьсэды жалятэк, ӟеч ужъёс лэсьтыны быгато шуыса.

Мон Библиез дышетӥ Брайль шрифтэн гожтэм публикациосъя. Библиысь дышетонъёсты мон валасько вал ке но, куд-ог малпанъёс сюлмам ӧз пыре. Кылсярысь, мыным секыт вал оскыны, Инмар но мукет адямиос монэ ярато шуыса. Мон валай, малы Иегова уродзэ уг быдты, но мыным секыт вал оскыны, со яратӥсь атай шуыса *.

Дыр ортчемъя, мон улон шоры мукет сямен учкыны кутски. Кылсярысь, мон тодӥ, Инмар курадӟись адямиосты туж жаля шуыса. Тани мар со вераз калыкез сярысь, кудзэ ултӥяса возизы: «Аслам калыкелэсь... курадӟемзэ адӟи... Солэсь куректон-кайгуоссэ тодӥсько» (Потон 3:7). Куке мон валай, макем яратэ монэ Иегова, мынам солы улонме сӥземе потӥз. 1998-тӥ арын мон пылатӥськи но Иеговалэн Адӟись Ивортӥсез луи.

Эскуинтла карлэсь кыдёкын ӧвӧл синтэм адямиослы нимысьтыз дышетон ортчытӥськиз. Пылатӥськеме бере ог ар ортчыса, мон но отын дышетски. Со интыысь одӥг тӧро тодӥз, мыным христиан пумиськонъёсы ветлыны туж секыт шуыса. Малы ке шуоно самой матысь кенеш вал ӵапак со гурезьёс сьӧрын, кудъёсыз пыр Иеговалэн Адӟись-Ивортӥсьёсыз мон доры ветлӥзы. Нош синтэм адямилы озьы ветлыны эшшо но секытгес. Мыным юрттон понна, тӧро Эскуинтла карын Адӟись-Ивортӥсьёс пӧлысь шедьтӥз семьяез, кудӥз монэ ас дораз басьтӥз но кенешлэн пумиськонъёсаз ветлыны юрттӥз. Со дырысен та семья мон сярысь асьсэлэн семьязы сярысь кадь сюлмаське.

Мон трос вераны быгатысал на, кызьы огъя оскисьёсы мыным сюлмысь яратэмзэс возьматъязы. Ваньмыз та оскытэ монэ, мон зэмос христианъёс пӧлын шуыса (Иоанн 13:34, 35).

Али мон уг малпаськы ини, мон нокинлы но кулэ ӧвӧл шуыса. Али мон валасько, малы улӥсько. Мон вань дырме висъясько Библиысь ӟеч иворез тодытон понна. Висемелы саклык висъям интые, мон мукет адямиослы Библиысь дуно зэмлыкен тодматскыны юрттӥсько. Мон туж шумпотӥсько, христиан кенешын тӧро луыса ужаны-тыршыны но адямиос азьын речьёс вераны быгатӥсько шуыса. Со сяна, мон речьёс верай улосысь конгрессъёсын но, кытчы трос сюрс адямиос лыктэмын вал.

2010-тӥ арын мон дышетски Сальвадор шаерын Ужан-тыршонэз умоятон школаын (али со Эксэйлыкез тодытӥсьёслы школа шуыса нимаське). Со юрттӥз мыным кенешысь ужъёсме умойгес быдэсъяны. Солы луыса мон валай: Иегова монэ туж яратэ но, аслэсьтыз ужзэ быдэстон понна, со котькинлы юрттыны быгатэ.

Иисус шуиз: «Басьтон сярысь, сётыны умойгес» (Апостолъёслэн ужъёссы 20:35). Туннэ мон вераны быгатӥсько, мон шудо шуыса. Со сяна, азьвыл та осконтэм потысал ке но, мынам мукетъёсызлы но юрттэме луэ.