МАР СЯРЫСЬ зэмлыкез? Со сярысь, мар трос аръёс ӵоже ини адямиосты сюлмаськытэ. Ваньмызлэн пӧртэм юанъёссылы шонер валэктонъёс шедьтэмзы потэ. Тӥ но малпаськиды, дыр, ини:

• Яратэ-а асьмемыз Инмар?

• Бырозы-а куке курадӟонъёс но ожъёс?

• Мар луэ адямиен кулэм бераз?

• Вань-а кыӵе ке оскон, кулэм адямиос выльысь улозы шуыса?

• Кызьы вӧсяськоно, Инмар асьмемыз мед кылоз шуыса?

• Мар кароно, шудо луон понна?

Кызьы малпаськоды, таӵе юанъёслы кытысь валэктонъёс шедьтыны луоз? Библиотекаосысь но книгаен вузаськонниосысь трос сюрс книгаос шедьтыны быгатоды, кудъёсызлэн авторъёссы та юанъёслы валэктонъёс сёто. Но ӵем дыръя одӥгез книга мукетызлы пумит валэктон сётэ. Куд-ог книгаос туннэ нуналэ дырыз дыръя гожтэмын кадь, нош дыр ортчемъя соос вужмо; со книгаос шоры мукет синмын учкыны кутско яке выльзэ гожто.

Нош вань сыӵе книга, кудӥзлы оскыны луэ. Со — зэмлыкез верась книга. Иисус Христос Инмарлы вӧсяськыкуз вераз: «Тынад кылыд — зэмлык» (Иоанн 17:17). Туннэ асьмеос тодӥськомы, со Кыл Библия луэ шуыса. Лыдӟелэ, мар верамын мукет бамъёсын. Отысь тӥ тододы, кызьы Библия сётэм юанъёслы валамон но оскымон валэктонъёс сётэ.

МАЛЫ КЫЛДЭ ТАӴЕ ЮАН. Асьмеос улӥськомы сыӵе дуннеын, кытын вожпотон но пӧяськон вӧлмемын. Тросэз религиос дышето, асьмеос Инмарлэн мылкыдызъя курадӟыса улӥськомы шуыса.

КЫӴЕ ВАЛЭКТОН СЁТЭ БИБЛИЯ. Инмар ноку уродзэ уг лэсьты. Иовын 34:10 гожтэмын: «Ӧрекчаськон Инмар дорысь уг поты, шонертэм суд Дунне Кутӥсь дорысь уг лыкты». Адямиос пумысен Инмарлэн туж умой малпанэз вань. Соин ик Иисус асьмемыз тазьы вӧсяськыны дышетӥз: «Инмысь Атаймы!.. Тынад Эксэйлыкед мед лыктоз; Тынад эрикедъя мед луоз музъем вылын но инмын кадь ик» (Матфей 6:9, 10). Инмар асьмемыз туж зол яратэ. Малпанзэ быдэстон понна, со аслэсьтыз одӥг гинэ вордӥськем Пизэ но сётӥз (Иоанн 3:16).

Учкелэ озьы ик Улон-вылонэз 1:26—28; Иаковлэсь 1:13 но 1 Пётрлэсь 5:6, 7.

МАЛЫ КЫЛДЭ ТАӴЕ ЮАН. Ожмаськонъёсын трос адямиос быро. Курадӟыса улон котькинэ малпаськытэ.

КЫӴЕ ВАЛЭКТОН СЁТЭ БИБЛИЯ. Инмарлэн верамезъя, вуоз сыӵе дыр, куке со быдэс музъем вылэ тупаса улон ваёз. Инмарлэн инмысь кивалтэтэз улсын адямиос «ожмаськыны уз ни дышетске». Соос «мечъёссэс усы-геры лэсьтыны ӵыжатозы» (Исаия 2:4). Вань пӧяськонлы но курадӟонлы Инмар пум поноз. Библия вера: «Инмар соослэн син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ, уго мар вал азьвыл [озьы ик курадӟон но пӧяськон], ваньмыз со ортчиз-кошкиз» (Усьтӥськон 21:3, 4).

Учкелэ озьы ик Псалтирез 36:10, 11; 45:10 но Михейлэсь 4:1—4.

МАЛЫ КЫЛДЭ ТАӴЕ ЮАН. Тросэз религиос дышето, адями кулэм бере, солэн кыӵе ке люкетэз улэ на шуыса. Куд-огъёсыз оско, кулэмъёс улэпъёслы изъян лэсьтыны быгато шуыса. Соос малпамъя, Инмар сьӧлыко адямиосты адын весяк курадӟытыса кылкутытэ.

КЫӴЕ ВАЛЭКТОН СЁТЭ БИБЛИЯ. Адями кулэ ке, солэн улонэз дугдэ. Екклесиастын 9:5 верамын: «Кулэмъёс номыр но уг тодо». Озьыен, кулэмъёс номыр уг тодо но уг шӧдо бере, соос адямилы уродзэ но, умойзэ но лэсьтыны уг быгато (Псалтирь 145:3, 4).

Учкелэ озьы ик Улон-вылонэз 3:19 но Екклесиастэз 9:6, 10.

МАЛЫ КЫЛДЭ ТАӴЕ ЮАН. Ваньмылэн яратоно адямиосынымы шумпотыса улэммы потэ. Паймонэз ӧвӧл, милям матысь адямиосынымы, кудъёсыз кулӥзы ини, выльысь адӟиськеммы потэ шуыса.

КЫӴЕ ВАЛЭКТОН СЁТЭ БИБЛИЯ. Тросэз кулэмъёс улӟытэмын луозы. Иисус кыл сётӥз, «ваньмыз шайгуосын кыллисьёс... улӟозы» (Иоанн 5:28, 29). Кызьы Инмар кутсконысеныз ик малпаз вал, улӟытэм адямиослы луонлык сётэмын луоз рай музъем вылын улыны (Лука 23:43). Со сяна, Инмарлэсь кылзӥськись адямиослэн умой тазалыксы луоз но соос весяк улозы. Библиын гожтэмын: «Шонер улӥсьёс музъем басьтозы но со вылын пумтэм вапумъёс улозы» (Псалтирь 36:29).

Учкелэ озьы ик Иовез 14:14, 15; Лукалэсь 7:11—17 но Апостолъёслэсь ужъёссэс 24:15.

МАЛЫ КЫЛДЭ ТАӴЕ ЮАН. Котькуд оскись адями вӧсяське. Но тросэз малпало, соослэсь вӧсяськемзэс Инмар уг кылы шуыса.

КЫӴЕ ВАЛЭКТОН СЁТЭ БИБЛИЯ. Кызьы Иисус вераз, вӧсяськыкумы дышетэм кылъёсыз вераны кулэ ӧвӧл, малы ке шуоно тросэз малпало, «трос кылъёс верамы ке, милемыз кылозы» шуыса (Матфей 6:7). Инмар асьмемыз мед кылоз шуыса, вӧсяськоно озьы, кызьы солы ярамон луэ. Со понна асьмелы Инмарлэсь куронъёссэ тодоно но со куронъёсъя вӧсяськоно. 1 Иоаннлэн 5:14 верамын: «Солэн [Инмарлэн] эрикезлы тэрытскыса, мае гинэ ум куриське, Со асьмеды кылзэ».

Учкелэ озьы ик Псалтирез 64:3; Иоаннлэсь 14:6, 14 но 1 Иоаннлэсь 3:22.

МАЛЫ КЫЛДЭ ТАӴЕ ЮАН. Тросэз лыдъяло, шудо луон понна, кулэ коньдон, дан но чебер вылтус. Соин ик адямиос вань кужымзэс сётыса тыршо озьы улыны. Озьы ке но, шудо уг луо.

КЫӴЕ ВАЛЭКТОН СЁТЭ БИБЛИЯ. Иисус возьматӥз, маин зэмос шуд герӟаськемын. Со шуиз: «Шудоесь Инмарлэсь кылзэ кылзӥсьёс, сое быдэсъясьёс» (Лука 11:28). Асьмеос зэмзэ ик шудо луыны быгатомы соку гинэ, куке Инмармы но солэн малпанэз сярысь тодыны тыршомы, малы ке шуоно котькуд адями сыӵе кулэяськонэн кылдытэмын. Сыӵе тодон-валан сётэ Библия. Библия валаны юрттэ, мар асьмелэн улонамы тужгес но дуноез луэ. Озьыен, Библиысь тодон-валанэз лыдэ басьтыса но улонамы пыӵатыса улӥмы ке, асьмелэн улонмы зэмзэ ик шудо луоз.

Учкелэ озьы ик Мадёнъёсты 3:5, 6, 13—18 но 1 Тимофейлы 6:9, 10.

 Ми вакчияк гинэ учкыса потӥмы, кыӵе валэктонъёс сётэ Библия та куать юанъёслы. Потэ-а тӥляд тросгес тодэмды? Тӥляд но кылдылӥзы, дыр, ини таӵе юанъёсты: малы Инмар уг быдты шуг-секытъёсты но курадӟонъёсты? Ма кароно, семья шудо мед луоз шуыса? Библия шонер но оскымон валэктонъёс сётэ та но трос мукет юанъёслы.

Жаляса верано луэ, тросэз берло дыре Библиез уг ик лыдӟо. Соос малпало, та книга туж бадӟым но валантэм шуыса. Нош тӥляд, юанъёстылы Библиысь валэктонъёс шедьтон понна, юрттэт басьтэмды потэ-а? Иеговалэн Адӟись-Ивортӥсьёсыз тӥледлы юрттыны быгатозы.

Одӥгез луонлык — со дун тырытэк дорады Библия дышетон. Вӧзады улӥсь Иеговалэн Адӟись-Ивортӥсьёсыз котькуд арняе вакчи дырлы тӥледын пумиськыны но Библиез дышетыны быгатозы. Таӵе амалэн Библиез дышетон быдэс дуннеысь туж трос адямиослы юрттӥз ини. Табере соос пӧлысь тросэз вераны быгато: «Мон шедьтӥ зэмлыкез!»

Библиысь зэмлыкез номырин но уд вошты. Со мозмытэ йылол-сямъёслэсь, сюлмаськонъёслэсь но кышкаса улонлэсь. Со сётэ оскон, шумпотон но валэктэ, малы адями дунне вылын улэ. Иисус вераз: «Зэмлыкез тододы, нош зэмлык тӥледыз эрико кароз» (Иоанн 8:32).