Қандақ ойлайсиз, тоғра иш қилиш қийинму? ~ Көп адәмләр қийин дәп ойлайду. Муқәддәс китапта Йошия исимлиқ бир балиға тоғра иш қилиш наһайити қийин болғанлиғи йезилған. Бирақ униңға ярдәм бәргән яхши достлири бар еди. Келиң, Йошия вә униң достлири тоғрисида көпирәк биливалайли.

Йошияниң дадиси Амон Йәһуданиң падишаси болған еди. Амон наһайити яман киши болуп, бутларға ибадәт қилатти. Дадиси өлгәндин кейин, Йошия Йәһуданиң падишаси болди. Шу чағда униңға пәқәт сәккиз яшла еди! Йошия дадисиға охшаш яман адәм болдиму? ~ Яқ, у яхши падиша болған.

Йошия бәк яш болсиму, Йәһваға қулақ селишни халиған. Шуниң үчүн у пәқәт Йәһвани яхши көридиған адәмләр биләнла дост болған. Улар Йошияға тоғра иш қилишқа ярдәм бәрди. Униң достлири ким болғанлиғини биливалайли.

Униң достлириниң бири Зәфания еди. У пәйғәмбәр болған. Зәфания исраиллиқларға бутларға ибадәт қилишни тохтатмиса,  униң ақивити яман болидиғанлиғини әскәртти. Йошия Зәфаниягә қулақ селип, бутларға әмәс, Йәһваға ибадәт қилған.

Йошияниң йәнә бир дости Йәрәмия болған. У Йошия билән бир яшлиқ болуп, улар кичигидин бир-биригә йеқин җайда яшиған. Улар шунчилик қоюқ арилашқанки, Йошия өлгәндә, Йәрәмия уни наһайити сеғинип, униңға беғишлап нахша язған. Йәрәмия билән Йошия бир-биригә тоғра иш қилишқа вә Йәһваға қулақ селишқа ярдәм бәргән.

Йошияниң мисалидин қандақ савақ алалайсиз? ~ Йошия һәтта кичик болғандиму, тоғра иш қилишни халиған. У Йәһвани яхши көридиған адәмләр билән дост болуш керәклигини билгән. Сизму достларни Йәһвани яхши көридиған вә сизгә тоғра иш қилишқа ярдәм беридиған адәмләрниң арисидин издәң!