1—3. Қандақ дүшмән һәммимизни қоғлайду? Немә үчүн Муқәддәс Китапниң тәлимлирини мулаһизә қилиш бизниң көңлимизгә тәсәлла берәләйду?

СИЗ явуз бир дүшмәнниң қолидин қутулуш үчүн қечип кетиватқан мундақ бир көрүнүшни хиял қилип беқиң. У сиздин көп күчлүк вә тез жүгрәйду. Сиз униң наһайити явуз екәнлигини билисиз, чүнки сиз өз көзиңиз билән униң бәзи достлириңизниң җенини алғанлиғини көргән. Мәйли сиз қанчә күчәп униңдин қечип қутулушқа урунған болсиңизму, у сизгә давамлиқ йеқинлап келиватқан, сиздә қечип қутулулишиңизға нисбәтән үмүт қалмиған шу пәйттә, тосаттин сиз тәрәптә туридиған бир қутқазғучи пәйда болса вә у сизниң дүшминиңизгә қариғанда наһайити күчлүк болуп сизгә ярдәм беришкә вәдә бәрсә, у сизниң көңлиңизгә қанчилик тәсәлла бериду, һә!

² Мундақчә қилип ейтсақ, дәл шундақ қәбиһ дүшмән сизни қоғлимақта. Ялғуз сизнила әмәс, бәлки барлиқ инсанларни шу дүшмән қоғлаватиду. Алдинқи бапта үгәнгәндәк, Муқәддәс Китап: өлүмни дүшмән дәп атайду. Һеч қайсимиз өлүмдин қечип қутулалмаймиз яки уни тосап қалалмаймиз. Һәммимиз дегидәк, бу дүшмәнниң бизниң әң йеқин кишилиримизни биздин елип кәткәнлигини көргән. Бирақ, Пәрвәрдигар Йәһвә шу дүшмән өлүмгә қариғанда көп күчлүк. Худа бир меһир-шәпқәтлик қутқазғучи, у аллиқачан шу дүшмәнни мәғлуп қилалайдиғанлиғини көрсәткән. Йәнә у шу дүшмән өлүмни пүтүнләй йоқ қилидиғанлиғини вәдә қилған. Муқәддәс Китап: “Йоқитилидиған әң ахирқи дүшмән өлүмдур” дәп тәлим бериду (Коринтлиқларға 1-хәт 15:26). Бу немә дегән әҗайип хуш хәвәр, һә!

 ³ Қени биз һазир шу дүшмән, өлүм, бизниң йеқинлиримизни елип кәтсә, биздә қандақ сезимләр пәйда болидиғанлиғи тоғрисида мулаһизә қилип бақайли. Мошуни мулаһизә қилиш Йәһвәниң бизни хошал қилидиған вәдисини чүшинишимиз үчүн ярдәм бериду. Қараңа! Пәрвәрдигар Йәһвә өлүкләрни қайта яшайду дәп вәдә қилған (Йәшая 26:19). Кәлгүсидә өлүкләр һаятлиққа қайтурулуп келиниду. Шу дәл тирилиш үмүтидур.

4. а) Немә үчүн һәзрити Әйсаниң өзи йеқининиң өлүмигә болған инкаси бизгә Пәрвәрдигар Йәһвәниң сезимлирини чүшәндүриду? ә) Әйса ким билән йеқин дост болған?

⁴ Сизниң бирәр йеқин кишиңиз аләмдин өткәндә җудалиқ азави қәлбиңизни чирмиғанму? Биз йеқин кишилиримиздин айрилғанда, қәлбимиз қайғу-һәсрәткә толуп үмүтсизлик ичидә өзимизни йоқитип, қойған-тутқинимизни унтуп қалидиған болуп қалимиз. Шундақ вақитта, биз Худаниң сөзиниң көңлимизгә тәсәлла беришигә муһтаҗ болимиз (Коринтлиқларға 2-хәт 1:3, 4). Йәһвә вә Мәсиһниң өлүмгә қандақ қарайдиғанлиғини чүшинишимиз үчүн Муқәддәс Китап бизгә ярдәм бериду. Өз атисиниң мүҗәз-хулқини мукәммәл әкс әттүргән Әйса, бир кишиниң өз йеқинлири өлүп кәткәндә қанчилик қайғу-һәсрәт чекидиғанлиғини билиду (Юһанна 14:9). Һәзрити Әйса һәр нөвәт Йерусалим шәһиригә кәлгинидә, адәттә у хошна кичик шәһәр Бәйтанияға кирип Лазар вә униң һәдилири Мәрийәм билән Мартани йоқлап өтәтти. Улар һәммиси Әйсаниң йеқин достлири еди. Муқәддәс Китап: “Һәзрити Әйса Марта, Мәрийәм вә Лазарни бәк яхши көрәтти” дәйду (Юһанна 11:5). Лекин 6-бапта үгәнгинимиздәк, Лазар өлгән еди.

5, 6. а) Әйса, Лазарниң һәсрәт чекип азаплиниватқан уруқ-туққан вә дост-бурадәрлири билән биллә болғанда, немә сәзгән еди? ә) Немә үчүн Әйсаниң һәсрәт чекиши бизниң көңлимизгә тәсәлла бериду?

⁵ Әйсаниң йеқин дости өлүп кәткәндә у немә сәзгән еди? Муқәддәс Китапта мундақ хатириләнгән: Мәсиһ Әйса Лазарниң уруқ-туққанлири вә дост-бурадәрлириниң қешиға барғанда, улар Лазарниң өлүми үчүн азаплинип қайғу-һәсрәт чекиватқан еди. Әйса пәйғәмбәр уларни көрүп көңли наһайити беарам болди. Муқәддәс Китапта: у “ғәзәплинип, көңли қаттиқ азаплинишқа башлиди”  андин Әйса “көз йеши қилди” дәп хатириләнгән (Юһанна 11:33, 35). Әйса Мәсиһниң һәсрәт чекиши, униң үмүтсиз болғанлиғидинму? Һәргиз ундақ әмәс. Әмәлиятта, Әйса кишини һәйран қалдуридиған ишниң пат-арида йүз беридиғанлиғини биләтти (Юһанна 11:3, 4). Шундақ болсиму, у йәнә йеқин достиниң өлүми үчүн һәсрәт чәккән еди.

⁶ Әйсаниң һәсрәт чекиши, мәлум җәһәттин ейтқанда бизниң көңлимизгә тәсәлла бериш болуп, Әйса вә униң атиси Йәһваниң өлүмни өч көрүдиғанлиғини бизгә билдүриду. Бирақ, Йәһвә Худа шу дүшмән өлүм үстидин ғәлибә қилиш күч-қудритигә егә! Қени, һәзрити Әйсаниң Йәһва бәргән күч-қудрәт арқилиқ немә иш қилидиғанлиғини көрүп бақайли.

7, 8. Немә үчүн әтраптики шу ишларни көргүчиләр Лазарда үмүт йоқ дәп қариған, бирақ, Әйса немә иш қилди?

⁷ Лазар бир өңкүргә дәпнә қилинған еди, Әйса Лазар дәпнә қилинған өңкүрниң ағзи етилгән ташни еливетишни ейтти. Марта буниңға қарши болған, чүнки Лазарниң өлгинигә төрт күн болғачқа, униң җәсити аллиқачан чиришкә башлиған еди (Юһанна 11:39). Шуңа, әтраптики шу ишларни көргүчиләр Лазарда үмүт йоқ дәп қариған.

⁸ Өңкүр ағзидики таш еливетилди, Әйса жуқури авазда: “Лазар, ташқириға чиқ” дәп чақирди. Немә иш йүз бәрди? “Лазар қол-путлири кепинләнгән, иңиги теңилған һалда ташқириға чиқти” (Юһанна 11:43, 44). Сиз әтрапта туруп мошу ишларни көргәнләрниң қанчилик хошал болғанлиғини тәсәввур қилаламсиз? Мәйли Лазарниң һәдилири, уруқ-туққанлири, дост-бурадәрлири яки холум-хошнилири болсун, һәммиси Лазарниң өлгәнлигини биләтти. Лекин, мана уларниң өлүп кәткән йеқин адими қайтидин уларниң арисида турди. Бу қаримаққа ишиниш мүмкин болмайдиған иш. Бирақ, шу вақитниң өзидә нурғун кишиләрниң Лазар билән хошаллиқ ичидә қучақлашқанлиғи шәк-шүбһисиздур. Ваһ, бу өлүм үстидин қилинған немә дегән чоң ғәлибә, һә?!

9, 10. а) Әйса, Лазарни тирилдүргәндики күч-қудрәтниң қәйәрдин кәлгәнлигини қандақ көрсәтти? ә) Муқәддәс Китаптики тирилдүрүшкә мунасивәтлик хатириләрни оқушниң қандақ пайдиси бар?

⁹ Мәсиһ өз күч-қудрити арқилиқ мошу һәйран қаларлиқ мөҗүзини көрситидиғанлиғини җакалимиған. Дәл Лазарни бу яққа чиқ дәп чақириштин илгири, Әйса Мәсиһ өз дугасида адәмни тирилдүрүш күч-қудритиниң Йәһвә Худадин келидиғанлиғини наһайити  ениқ көрсәткән (Юһанна 11:41, 42). Бу Тәңри Йәһваниң өлүкни тирилдүридиған күч-қудритини биринчи қетим ишлитиши әмәс. Лазарни тирилдүрүш, Муқәддәс Китапта хатириләнгән өлүкләрни тирилдүрүшкә мунасивәтлик тоққуз мөҗүзиниң бирила халас *. Муқәддәс Китапта хатириләнгән мошу мөҗүзиләрни оқуш вә үгиниш адәмни әҗайип һаяҗанға салиду. Шу мөҗүзиләрдин биз Худаниң һәммә инсанларға охшаш муамилә қилидиғанлиғини көрәләймиз. Чүнки, Худа тирилдүргән адәмләр арисида әр-аял, қери-яш, исраиллар вә исраил әмәсләрму бар. Муқәддәс Китапта шу тирилдүрүш мөҗүзисини өз көзи билән көргән кишиләрниң нәқәдәр хошал болғанлиғи хатириләнгән. Мәсилән, Әйса Мәсиһ бир кичик қизни өлүмдин тирилдүргәндә, қизниң ата-аниси вә “у йәрдикиләр... һәйран болушти” (Маркус 5:42). Һәқиқәтән, Йәһвәниң меһир-шәпқити улар үчүн мәңгү унтулғусиз, чәксиз хошаллиқ елип кәлгән.

¹⁰ Әлвәттә, шу Әйса Мәсиһ тәрипидин тирилдүрүлгәнләр әң ахирида йәнә өлүп кәтти. Ундақта, мошу тирилдүрүлүш улар үчүн әһмийәтсизму? Яқ ундақ әмәс. Муқәддәс Китаптики шу хатириләр муһим һәқиқәтни испатлиди вә бизгә үмүт елип кәлди.

11. Лазарниң тирилдүрүлүшигә мунасивәтлик Муқәддәс Китаптики хатириләр, Вәз 9-бап 5-айәтниң мәзмунини қандақ испатлиди?

¹¹ Муқәддәс Китап: өлүкләр “һеч немә билмәс” дәп тәлим бериду. Өлүкләрдә һаятлиқ мәвҗут әмәс һәм һеч қандақ сезим йоқ. Муқәддәс Китаптики Лазар тоғрисидики хатирә мошу һәқиқәтни испатлиди. Қайта һаятлиққа еришкән Лазар кишиләрни һаяҗанландуруп җәннәт тоғрисида сөзләп бәрдиму? Яки кишиләрни вайимға селип уларға қорқунчлуқ от көйүватқан дозақ тоғрисида сөзләп бәрдиму? Яқ. Муқәддәс Китапта Лазарниң шундақ ишлар тоғрисида сөзлигән һеч қандақ бир сөзи әсла хатириләнгән әмәс. У төрт күн өлүк һалитидә “һеч немә билмәс” болған (Вәз 9:5). Лазар өлүм уйқисида болған еди (Юһанна 11:11).

12. Немә үчүн, биз Лазарниң һәқиқәтән өлүмдин тирилдүрүлгәнлигигә ишәшлик болалаймиз?

¹² Муқәддәс Китаптики Лазар тоғрисидики хатириләр тирилдүрүшниң  бир әпсанивий ривайәт болмастин, бир һәқиқәт екәнлигини көрситиду. Мәсиһ Әйса Лазарни бир топ көрүп турған кишиләрниң көз алдида өлүмдин тирилдүргән. Һәтта, Мәсиһкә өч болған диний йетәкчиләрму шу қайта тирилиш мөҗүзисиниң йүз бәргәнлигини инкар қилмиған. Әксичә, улар: “Қандақ қилғулуқ? Бу Адәмниң яратқан нурғун мөҗүзилиригә қарап беқиңлар” дегән (Юһанна 11:47). Нурғун кишиләр өлүмдин тирилдүрүлгән Лазарни көргили барған. Нәтиҗидә, көплигән кишиләр Әйса Мәсиһкә ишәнгән. Улар Мәсиһниң Худа тәрипидин әвәтилгәнлигини тирик испат Лазар арқилиқ көрди. Мошу ишлар бағри таш Йәһудий диний йетәкчилириниң көз алдидики рошән дәлил-испат болғач, шу йетәкчиләр һәзрити Әйса вә Лазарни өлтүрүшни халиған (Юһанна 11:53; 12:9—11).

13. Йәһвә Худаниң һәқиқәтән өлүкләрни тирилдүрәләйдиғанлиғиға ишинишкә қандақ асасимиз бар?

¹³ Ундақта, өлгәнләрниң тирилишигә ишиниш әқилгә сиғамду? Әлвәттә! Һәзрити Әйса мундақ тәлим бәргән: шундақ бир күн келидуки, “йәрликлиридин чиқишиду” тирилдүрүлиду (Юһанна 5:28). Йәһвә пүткүл мәхлуқатниң Яратқучисидур. Униң һаятлиқни қайтидин яриталайдиғанлиғиға ишиниш қийинму? Әлвәттә булар униң әстә сақлишиға бағлиқ. У бизниң өлүп кәткән йеқинлиримизни әслийәләмду? Санап түгәткүсиз чәксиз юлтузларни асманға толтурған вә уларниң һәр биригә исим қойған дәл Худа әмәсму! (Йәшая 40:26). Шуңа, бизниң өлүп кәткән йеқин кишилиримиз тоғрисидики һәр бир кичик тәпсилатларни әсләш Тәңри Йәһвә үчүн һеч иш әмәс һәм у уларни қайта һаятлиққа қайтуруш қудритигә егә.

14, 15. Аюп пәйғәмбәрниң дегән сөзигә қарап бақсақ, Йәһвә Худа өлүкләрни һаятлиққа қайтурушини халамду?

¹⁴ Лекин, Худа өлүкләрни тирилдүрүшни халамду? Муқәддәс Китап: У өлүкләрни тирилдүрүшкә тәшнадур дәп тәлим бериду. Садақәтмән пәйғәмбәр Аюп: “Өлгән адәм йәнә тириләмдур?” дәп сориған. Худаниң уни әсләйдиған вақит-саати кәлгичә Аюп қәбир ичидә сақлайдиғанлиғи тоғрисида ейтқан. Аюп пәйғәмбәр Тәңри Йәһвәгә мундақ дегән: “Вақти кәлсә сән мени қичқирар едиң мәнму саңа җавап берәр едим... сән болсаң қоллириңниң иши болғанниң өзини сеғинип” сән (Аюп 14:13—15).

¹⁵ Ойлап беқиңа! Пәрвәрдигар Йәһвә һәқиқәтән өлгән адәмләрни сеғинғачқа, уларни һаятлиққа қайтуруп келишкә тәшнадур. Ундақта, Йәһвәниң өлгәнләрни сеғинип уларни һаятлиққа қайтуруп келишкә тәшна екәнлиги тоғрисида үгиниш бизниң көңлимизгә  тәсәлла берәләмду? Бирақ, қиямәт күнидики тирилиш қандақ йүз бериду? Кимләр тирилиду вә қәйәрдә?

16. Кәлгүсидә өлгән адәмләр тирилгәндә, уларниң қандақ турмуш шараити бар болиду?

¹⁶ Муқәддәс Китаптики тирилдүрүшкә мунасивәтлик хатириләр бизни кәлгүсидики тирилдүрүлүш һәқиқидики билимгә егә қилиду. Шу қайта һаятлиққа еришкәнләр йәр йүзидә яшаватқан өз йеқин кишилири билән җәм болиду. Кәлгүсидики тирилдүрүштә йәнә өлүп кәткән уруқ-туққанлар вә дост-бурадәрләр қайта җәм болиду. Биз 3-бапта үгинип өткәндәк, Худаниң мәхсити болса пүтүн йәр шарини бир җәннәт маканиға айландуруш болған. Шуңлашқа, өлгән адәмләр тирилгән вақитта дунияда уруш, җинайәт вә кесәлликләр болмайду. Тирилгәнләрниң тиничлиқ вә хошал-хорамлиққа толған мошу йәр шарида мәңгү яшаш пурсити болиду.

17. Кимләр тирилдүрүлиду?

¹⁷ Кимләр тирилдүрүлиду? Муқәддәс Китапта Әйса: “Өлгәнләрниң һәммиси Мениң авазимни аңлайдиған вақит келиду” вә гөрдин чиқар дегән (Юһанна 5:28, 29). Охшашла, Муқәддәс Китапниң Вәһийләр 20-бап 13-айити: “Деңиз өзидики өлүкләрни, өлүм вә өлүкләр дияриму өзлиридики өлүкләрни тапшурушти” дәйду. “Өлүкләр дияри” йәни һәйдис болса инсанларниң гөри. (Мошу китапниң “Шеол” вә “һәйдис” дегәнләр немә?” намлиқ қошумчә изаһитигә қараң). Мошу гөрдә өлүм уйқусида арам еливатқан нәччә миллиард өлүкләрниң һәммиси қайта һаятлиққа егә болуп гөрдә һеч ким қалмайду. Муқәддәс Китапта әлчи Павлус: “Яхши-яман болушидин қәтъий нәзәр,.. қайта тирилдүрүдиғанлиғиға ишинимән” дегән (Әлчиләр 24:15). Бу немә дегән гәп?

18. Кәлгүсидә тирилдүрүлидиған “яхшилар” — йәни һәққаний адәмләр кимләрни өз ичигә алиду? Тирилиш үмүтиниң шәхсән сиз өзиңизгә қандақ пайдиси бар?

¹⁸ Муқәддәс Китаптики “яхшилар” — йәни һәққаний адәмләр Әйса йәр йүзигә келиштин илгири яшиған нурғун адәмләрни өз ичигә алиду. Мәсилән, улар Нуһ, Ибраһим пәйғәмбәр, Ибраһимниң аяли Сарә, Муса пәйғәмбәр, тәқвадар аяллардин Рут, Әстер вә башқилар. Муқәддәс Китапниң Ибранийларға йезилған хәт 11-бабида мошу бәзи кишиләрниң Худаға болған иман-етиқати тилға елинған. Кәлгүсидә тирилдүрүлидиған һәққаний адәмләр һазир биз яшаватқан заманда өлүп кәткән Йәһвәниң хизмәтчилириниму  өз ичигә алиду. Чүнки, шу тирилиш үмүти бизни өлүмниң қорқунчидин азат қилди (Ибранийлар 2:15).

19. Кимләр “яманлар” — йәни һәққаний аталмиған адәмләр? Меһир-шәпқәтлик Тәңри Йәһвә уларға қандақ пурсәт бериду?

¹⁹ Ундақта, Йәһвәгә ишәнмигән вә униңға ибадәт қилмай яшиған барлиқ адәмләрчу? Чүнки, улар Йәһвәни тонумиған яки өмридә уни тонуш пурсити болмиған турса? Улар тирилдүрүләмду? Худа миллиардлиған “яманлар” — йәни һәққаний аталмиған адәмләрни һәргиз унтуп қалмайду. Уларму тирилдүрүлиду. Уларға чин Худа тоғрисида үгиниш вә униңға ибадәт қилиш үчүн вақит берилиду. Миң жил давамида өлүкләр тирилдүрүлүп уларға йәр йүзидики садақәтмән кишиләргә қошулуп Йәһвәгә ибадәт қилиш пурсити берилиду. Шу әҗайип миң жил вақитни Муқәддәс Китап: қиямәт күни дәп атайду. *

20. Гәһәнна дегән немә? Кимләр шу җайға бариду?

²⁰ Буниң мәнаси дунияға келип яшап өлгән кишиләрниң һәммиси тирилиду дегәнлик боламду? Яқ. Муқәддәс Китап: бәзи адәмләр өлгәндин кейин “гәһәнна” йәни Муқәддәс Китапта “җәһәннәм” дәп тәрҗимә қилинған җайда болиду дәйду (Луқа 12:5 БҖТ). Гәһәнна болса қедимки Йерусалимниң шәһәр сиртидики бир әхләт догиси болуп өлүкләр вә әхләтләр у йәрдә көйдүрүләтти. У йәргә ташланған өлүкләр Йәһудийларниң нәзәридә дәпнә қилишқа вә тирилишкә мунасип кәлмәйду дәп қарилатти. Шуңа, гәһәнна болса мәңгүлүк һалак қилинишниң наһайити мувапиқ символи. Гәрчә Әйса Мәсиһ кәлгүсидә тирикләр вә өлүкләрни сот қилишқа тайинланған болсиму, лекин әң алий һөкүм қилғучи йәнила Йәһвә (Әлчиләр 10:42). Рәзил вә өзгәрмәс дәп һөкүм қилинған кишиләрни Йәһвә һәргизму тирилдүрмәйду.

21, 22. а) Муқәддәс Китап қайси башқа бир хил тирилишни тилға алған? ә) Ким тунҗа болуп тирилдүрүлүп роһий һаятлиққа егә болди?

²¹ Муқәддәс Китап йәнә бир хил тирилишни тилға алиду, у болсиму тирилип асманға чиқип роһий шәхс болуштур. Мошу хил тирилишниң мисали сүпитидә Муқәддәс Китапта пәқәт бирла Мәсиһниң тирилдүрүлгәнлиги хатириләнгән.

²² Һәзрити Әйса өлтүрүлгәндин кейин, Пәрвәрдигар Йәһвә өзиниң садақәтмән хизмәтчисиниң гөр ичидә қелишиға йол қоймиған  (Зәбур 16:10; Әлчиләр 13:34, 35). Худа Әйса Мәсиһни тирилдүргән. Бирақ, инсан сүпитидә әмәс. Мәсиһниң шагирти Петрус: Әйса Мәсиһ “Униң тени өлгән болсиму, лекин Униң Роһи тирилдүрүлди” дәп чүшәндүргән (Петрусниң 1-хети 3:18). Бу һәқиқәтән бир әҗайип мөҗүзә. Мәсиһ күч-қудрәткә егә роһий шәхс сүпитидә тирилдүрүлди! (Коринтлиқларға 1-хәт 15:3—6). Мәсиһ Әйса болса шу шан-шәрәплик тирилишни тунҗа болуп бешидин өткүзгән (Юһанна 3:13). Бирақ, у әң ахирқиси әмәс, йәнә башқиларму бар.

23, 24. Әйсаниң кичик падиси кимләр? Уларниң сани қанчә?

²³ Мәсиһ өзиниң асманға қайтидиғанлиғини биләтти. У өлүштин илгири өзиниң садақәтмән әгәшкүчилиригә: Мән силәр үчүн “орун тәйярлаш үчүн... баримән” дәп ейтқан (Юһанна 14:2). Асманға чиқиш үчүн тирилдүрүлидиған кишиләрни, Әйса Мәсиһ өзиниң “кичик падиси” дәп атиған (Луқа 12:32 БҖТ). Мошу нисбәтән сани азирақ болған садақәтмән етиқатчиларниң сани қанчә? Муқәддәс Китапниң Вәһийләр 14-бап 1-айитидә: “Андин Қозиниң Сион теғи үстидә турғанлиғини көрдүм. Униң йенида пешанисигә Қозиниң вә Униң Атисиниң исми йезилған 144 000 киши бар еди” дейилгән.

²⁴ Бу 144 000 киши, Әйса Мәсиһниң садақәтмән шагиртлирини өз ичигә алған болуп улар асмандики роһий һаятлиққа еришиш үчүн тирилдүрүлиду. Улар қачан тирилдүрүлиду? Муқәддәс Китапта әлчи Павлус, Әйса падиша болуп башқуруған вақитта уларниң тирилдүрүлидиғанлиғини хатирилигән (Коринтлиқларға 1-хәт 15:23). Биз дәл Әйса падиша болуп башқуруватқан шу вақитта яшаватқанлиғимизни сиз 9-бапта, үгинисиз. Шуңа 144 000 кишиниң көпинчилири тирилдүрүлүп асманда роһий һаятлиққа еришти. Лекин, қалған аз сандикилири һазир йәр йүзидә яшаватиду. Әгәр улар һазир өлсә, асмандики роһий һаятлиққа қошулуп яшаш үчүн дәрһал тирилдүрүлиду (Коринтлиқларға 1-хәт 15:51—55). Бирақ, көп сандики инсанларниң кәлгүсидә йәр йүзидики җәннәттә яшаш үчүн тирилдүрүлүш үмүти бар.

25. Кейинки бапта немә тоғрисида үгинимиз?

²⁵ Һәқиқәтән, Пәрвәрдигар Йәһвә кәлгүсидә бизниң дүшминимиз болған өлүмни мәғлуп қилиду вә өлүм мәңгү йоқилиду! (Йәшая 25:8). Лекин, “Тирилдүрүлүп асманда һаятлиққа еришидиғанлар асманда немә иш қилидиғанду?” дәп билгиңиз келиши мүмкин. Улар асманда падишалиқ һөкүмәт үчүн һакимийәт жүргүзиду. Биз шу һөкүмәт тоғрисида кейинки бапта тәпсилий үгинимиз.