Коринтлиқларға 1-хәт 2:1—16
2 Мәнму силәргә кәлгәндә, қериндашлар, өз гепим яки даналиғим билән силәргә тәсират қилиш үчүн кәлмидим, бәлки Худаниң муқәддәс сирини җакалаш үчүн кәлдим.
2 Мән араңларда түврүктә өлтүрүлгән Әйса Мәсиһтин башқа һечнәрсини билмәсликни қарар қилдим.
3 Һәм мән силәргә аҗизлиқта, қорқунучта вә қаттиқ титирәктә кәлдим.
4 Мениң гепим вә мән вәзә қилған нәрсә — буниң һәммиси инсан даналиғиниң ишәшлик сөзлири әмәс, бәлки роһниң һәм күчниң аяни еди,
5 чүнки силәрниң етиқатиңлар адәмләрниң данишмәнлигидә әмәс, әксичә Худаниң күч-қудритидә асаслиниши үчүндур.
6 Даналиқни биз йетип-пишкәнләрниң арисида ейтимиз, бирақ бу дуния қурулуминиң яки униң һөкүмдарлириниң даналиғини әмәс, улар заваллиққа учрайду,
7 бәлки Худаниң муқәддәс сирида йошурунған, бизниң шөһритимиз үчүн дуния түзүмлиридин авал Худа тәрипидин бәлгүләнгән даналиғини ейтимиз.
8 Бу даналиқни мошу қурулумниң һечбир һөкүмрани билип-тонумиди, чүнки улар уни билгән болса, шан-шәрәпкә лайиқ Һакимдаримизни түврүктә өлтүрмигән болатти.
9 Йезилғинидәк: «Худа Өзини сөйгәнләргә тәйярлап қойғинини көзму көрмигән, қулақму аңлимиған вә инсанниң жүригидә у нәрсиләр туғулмиған».
10 Бизгә болса Худа буни Өз роһи арқилиқ ечип бәрди, чүнки муқәддәс роһ һәммә нәрсини, һәтта Худаниң даналиғиниң чоңқурлуқлирини тәһлил қилиду.
11 Инсанда болған роһтин башқа униңда болған нәрсини кимму биләләйду? Шуниңға охшаш, Худаниң ичидикини Худаниң роһидин башқа һечким билмәйду.
12 Биз болсақ дунияниң роһини әмәс, бәлки Егимиз бизгә һәдийә қиливатқан барлиқ нәрсини билиш үчүн, Худадин роһ алдуқ.
13 Мошу тоғрисида биз ейтиватимиз,— инсаний даналиқ үгитидиған сөзләр билән әмәс, бәлки роһ үгитидиған сөзләр билән — роһий мәсилиләрни роһий сөзләргә қошуп.
14 Лекин җисманий адәм Худа роһидин болған нәрсини қобул қилмайду, чүнки бу униң үчүн ахмақлиқтәк билиниду һәм буни у чүшүнүшкә қабил әмәс, чүнки буни роһий баһалаш керәк.
15 Роһий адәм болса, һәммә нәрсигә баһа берәләйду, лекин униң тоғрисида һечким баһа берәлмәйду.
16 «Йәһваға көрсәтмә бериш үчүн, Униң әқлини ким тонуп-билипту?» Амма биз Мәсиһниң әқлигә егә.
