Самуилниң 1-язмиси 31:1—13
31 Шу вақитта филистийәликләр Исраил билән җәң қилип, уларни қачурди. Исраиллиқлар қачқанда һалак болуп, Гилбой теғида қирғин болди.
2 Филистийәликләр Саул һәм униң оғуллирини қоғлап, улар Саулниң оғуллири Йонатан, Абинадаб вә Мәлкишуани өлтүрди.
3 Ахирида әң шиддәтлик җәң Саулниң қешида болди. Униңға оқ-ядин етип тәккүзди һәм у интайин қаттиқ җараһәтләнди.
4 Саул қурал көтәргүчисигә: «Қиличиңни чиқирип, маңа санчиғин! Чүнки хәтнисизләр келип, мени өлтүргәч мәсхирә қилмисун»,— деди. Лекин қурал көтәргүчиси келишмиди, чүнки у буни қилиштин бәк қорқатти. Шу вақитта Саул қиличини елип, униңға жиқилди.
5 Қурал көтәргүчиси Саулниң өлгинини көрүп, өзиму қиличиға жиқилип, униң билән биллә өлди.
6 Шундақ қилип, Саул вә униң үч оғли һәм униң қурал көтәргүчи ләшкири бир күндә һалак болди. Шуниңдәкла шу күни униң барлиқ кишилири өлүшти.
7 Йордан кәйнидә вадида яшиған Исраил турғунлири исраиллиқларниң қачқинини көрүп вә Саул һәм оғуллириниң өлгинини аңлап, өз шәһәрлирини ташлап қечип кәтти. Филистийәликләр болса келип, уларниң орунлириға маканлашти.
8 Әтиси филистийәликләр җәң мәйданиға өлүкләрниң кийим-кечәклирини елишқа кәлгәндә, улар Саул билән униң Гилбойда һалак болған үч оғлини көрди.
9 Саулниң бешини чепип, униң қуралини елип, хәлқи арисида вә бутлириниң ибадәтханилирида бу тоғрилиқ җакалап, униң җәсидини Филистийә йериға әвәтти.
10 Саулниң қуралини Ашторәт бутханисида қойди, униң җәсидини Бәйтшан шәһириниң сепилигә есип қойди.
11 Гилиаттики Ябешниң турғунлири филистийәликләрниң Саул билән қандақ иш қилғанлиғини аңлиғанда,
12 уларниң арисидики әң җүръәтликләр пүтүн түн меңип, Саулниң вә униң оғуллириниң җәсәтлирини Бәйт-Шеанниң темидин чүшүрүп, Ябешқа йәткүзүп, шу йәрдә көйдүривәтти.
13 Уларниң қалған сүйәклирини елип, Ябештики жулғунниң түвидә дәпин қилип, йәттә күн роза тутти.
