“Ndomo Embimbiliya Lieya Kokuetu”

Ocikomo cimue cinene Embimbiliya oku supuluka toke koloneke vilo okuti ka lia pongolokele. Olio lia malusuiwa oku sonehiwa ci pitahãla 1.900 kanyamo. Lia sanehiwilevo vovimalẽho vi nyõleha ndeci, vovipa kuenda volopapelo via pangiwa lololonẽva kuenda lia sonehiwile valimi okuti a vanguiwa lika lomanu vamue koloneke vilo. Handi vali alume vakuonene oku upisa kolombiali kuenda asongui vetavo, va seteka oku kundula Embimbiliya.

Ndamupi olio lia puluka koloseteko, loku linga elivulu limue lia kũlĩhĩwa vali calua lomanu? Kũlĩhĩsa asunga a vali.

Olokopia Vialua Via Teyuila Ovinimbu

Va Isareli va enda oku seleka ovinimbu Viembimbiliya viosimbu, va teyuila lutate oviña viosimbu kuenda va linga olokopia vialua. Ndeci, olosoma via va Isareli va tambula olonumbi vioku soneha “okopia yimue Yocihandeleko eci, cina copiwa kocihandeleko ca selekiwile lovitunda va Lewi.”—Esinumuĩlo 17:18

Va Isareli valua va sanjukilile calua oku tanga ovisonehua, loku limbuka okuti via kala ondaka ya Suku. Ovinimbi viaco via enda oku sonehiwa lutate walua lavakuavisonehua vana va taviwile. Esera, usonehi umue wa sumbilile Suku “wa kala umue ukuavisonehua wa kũlĩhĩle ciwa Ocihandeleko ca Mose, cina Yehova Suku ya va Isareli a ecele.” (Esera 7:6) Vakuavisonehua vana va linga olokopia Vovisonehua vio Heveru ale “Otestamento Yale” pokati kocita cepandu kuenda cekũi K.Y., va enda oku tenda ololetala viovinimbu oco va yuvule a ku lueya. Upange waco wa lingiwa lutate, wa ecelela okuti olio li suapo kuenda oku supuluka Kuembimbiliya, ndaño loloseteko viya ocipikipiki kuenda ovanyali va yonguile oku amamako oku li kundula.

Ndeci, kunyamo 168 O.Y., Antíoco IV, ombiali ya va Asuria, wa sanda oku kundula olokopia viosi Viovisonehua vio Hevero a ponduile oku sanga ko Palestina yosi. Ulandu umue woko yudea wa lekisa okuti: “ovo va enda oku tola loku timĩha oviña viosi viovihandeleko va enda oku sanga.” O Elivulu Limue Lia va Yudea liti: “asualali a enda oku tẽlisa ekisika liaco . . . Wosi wa kuatele elivulu liaco likola . . . wa enda oku pondiwa.” Pole, olokopia Viovisonehua via puluka pokati ka va yudea ko Palestina oku kongelamo vana va kala kolofeka vikuavo.

Noke lioku maluisiwa Kuovisonehua vio Helasi ale “Otestamento yo Kaliye,” olokapia vialua viovikanda, lovitumasuku kuenda ovolandu a sonehiwa, a sandekiwa calua. Ndeci, Yoano wa soneha Evanjeliu liaye kolupale luo Efeso ale ocipepi lolupale luaco. Omo liaco, onepa yimue Lievanjeliu liaco okuti onepa yimue yokopia vakuakukũlĩhĩsa va popia okuti ya pangiwa osimbu ka papitile 50 kanyamo noke lia Yoano oku soneha ulandu waye, oyo ya sangiwa eci ci soka ovita vialua kolokilometulu, Kegito. Uvangi waco wa situlula okuti akristão vo kolofeka viocipãla, va kuatelevo olokopia okuti kotembo via sonehiwa ci sule.

Oku sandekiwa Kuondaka ya Suku kua kuatisavo koku supuluka kualio noke liovita vianyamo kotembo ya Yesu. Ndeci, kociteketeke keteke 23 ya Kayovo 303 K.K. kua lomboluiwa okuti ombiali yoko roma Diocleciano wa mola asualali vaye oku tufuila apito onembele yimue kuenda oku timĩha olokopia viovisonehua. Diocleciano wa simĩle okuti wa ponduile oku imula alongiso akristão poku kundula ovisonehua vi kola. Keteke lia kuamamo, eye wa handeleka okuti, vu Viali wosi wo Roma, olokopia viosi Viembimbiliya via sukilile oku timihĩwa powiñi. Pole, olokopia vimue via supuluka kuenda via sonehiwa. Omo liaco, onepa yalua violokopia vivali Viembimbiliya kelimi lio Helasi okuti citava okuti via pangiwa noke yotembo yimue yelambalalo lia lingiwa la Diocleciano, vi kasiko toke etali. Okopia yimue yi sangiwa ko Roma kuenda yi kuavo Vociseleko ca livulu ko Grabretanya ko Londre, ko Inglaterra.

Ndaño okuti ka kua sangiwile handi oviña viosimbu Viembimbiliya, olohuluwa vialua violokopia Viembimbiliya liosi ale onepa yimue via sonehiwa peka via puluka toke koloneke vietu. Vimue viosimbu calua. Anga hẽ esapulo li sangiwa vovinimbu vialio lia pongoloka osimbu va kala oku li soneha? Ulume umue ukuokũlĩhĩso o tukuiwa hati W. H. Green wa vangula eci catiamẽla Kovisonehua vio Heveru ndoco: “Tu pondola oku popia lekolelo okuti ka kuli elivulu likuavo liosimbu lia pitiyiwa lonjila ya suapo.” Catiamẽla Kovisonehua vio Helasi Sir Frederic Kenyon umue pokati kasongui va velapo vioviña Viembimbiliya wa soneha ndoco: “Otembo ya pita pokati kanyamo oku pangiwa kuoviña viatete kuenda ovovangi osimbu a kasiko, ono ya sulako yoku imula a tatahãi ndomo ovisonehua vie pitĩla toke kokuetu.” Ocili kuenda ekolelo vi sangiwa va livulu Otestamento yo Kaliye vi pondola oku tendiwa okuti via suapo.” Eye wa popiavo hati: “Oku popia okuti ovinimbu Viembimbiliya via suapo hakuluvikiyako. . . . Ka tu pondola oku ci popia kelivulu lalimue likuavo liosimbu voluali.”

Oku Pongoluiwa Kuembimbiliya

Ocina cavali ci kuete esilivilo ca kuatisa Embimbiliya oku linga elivulu limue lia kũlĩhĩwa calua lomanu ceci okuti, olio lia sandekiwa kalimi alua. Eci ci likuata locipango ca Suku cokuti olofeka viosi lalimi osi vo kũlĩha loku u fendela “lespiritu kuenda ocili.”—Yoano 4:23, 24; Mika 4:2.

Embimbiliya lia pongoluiwa tete Kovisonehua vio Heveru lia kũlĩhĩwa okuti o Septuaginta yo Helasi. Lia pongoluiwilile va Yudea va vangule o Helasi la vana va kala ko Palestina kuenda lia malusuiwa noke liovita vivali kanyamo osimbu upange woku kunda wa Yesu ka wa fetikile palo posi. Embimbiliya liosi oku kongelamo Ovisonehua vio Helasi lia pongoluiwa kalimi alua noke liovita vimue vianyamo noke lioku malusuiwa. Pole, olosoma kuenda ovitunda vina via ponduile oku likolisilako oco omanu va kuate Embimbiliya, via linga ocina ca litepa. Ovo va seteka oku kapa oloñame vupeke konepa yespiritu poku yuvula okuti Ondaka ya Suku yi pongoluiwa kalimi akuavo a kũlĩhĩwa.

Oco ci sumuise olonembele kuenda uviali, alume vakuotõi va kapa kohele omuenyo wavo oco va pongoluile Embimbiliya kelimi li vanguiwa lomanu. Ndeci, kunyamo 1530 ulume umue o tukuiwa William Tyndale, wa longisiwa ko Oxford wa pongolola onepa yimue yo Pentateuco, okuti alivulu atãlo atete Ovisonehua vio Heveru. Ndaño lelambalalo lialua eye wa linga omanu watete wa pongolola Embimbiliya lio Heveru kongelesi. Tyndale eye upongololi watete oku tukula onduko Yehova. Ulume umue ukuokũlĩhĩso Wembimbiliya haiye ovangula elimi lio espanyõle o tukuiwa Casiodoro de Reina, wa kala kohele yoku pondiwa lovanyali vetavo lio katolika osimbu a kala oku pongolola olonepa vimue Viembimbiliya kelimi lio Espanyole. Eye wa linga ungende woku enda ko Inglaterra, ko Alemanya, ko Fransa, ko Holanda kuenda Suisa, osimbu a kala oku talavaya oco a malusule upange waye woku pongolola. *

Koloneke vilo Embimbiliya li kasi oku amamako oku pongoluiwa kalimi alua kuenda olohulua vialua violokopia via siata oku sandekiwa. Embimbiliya oku supuluka oco likale elivulu limue lia kũlĩhĩwa vali lomanu ci lekisa ocili ca situluiwa lupostolo Petulu wa vetiyiwa oku soneha hati: “owangu u kukuta kuenje olonelẽho vi loluka, puãi ondaka ya Yehova yi kala otembo ka yi pui.” Kuenje “ondaka” yaco, olondaka viwa vio kundiwili.”—1 Petulu 1:24, 25.

[Footnote]

 [Box/​Pictures on page 14]

EMBIMBILIYA LIPI O SUKILA OKU TANGA?

Alimi alua a kuete Ambimbiliya alitepa. Amue a kuete upopi watĩla hawo wosimbu. Akuavo upopi waco va u pongolola locimãho coko leluisa oku tanga okuti ka va li sakalaisa loku suapo. Handi vali akuavo a pongoluiwa ondaka londaka.

Embimbiliya Li Kola Epongoluilo Lioluali Luokaliye liongelesi, lia sandekiwa Lolombangi Via Yehova, lia pitiyiwa valimi osimbu locisoko cimue ka cikuete onduko. Olondaka Viembimbiliya liaco, via kuamiwa oco ku pongoluiwe Ambimbiliya eci cisoka 60 kalimi. Vakuakupongolola valimi aco, va sokisa lutate ovisonehua kalimi osimbu. Embimbiliya Epongoluilo Lioluali Luokaliye li kuete ocimãho coku pongolola olondaka kelimi liosimbu pole ka li pinyanyuisa elomboloko liayo. Vakuakupongolola va sanda oku linga okuti Embimbiliya liluka oku kuata elomboloko ku vakuakutanga koloneke vilo, ndeci ca pita la vakuakutanga kosimbu.

Vamue vakuakukonomuisa alimi va siata oku kũlĩhĩsa Ambimbiliya o koloneke vilo oku kongelamo Embimbiliya Epongoluilo Lioluali Luokaliye oco va sange ovolandu oku pongolola ka kua suilepo hawo ka wa sungulukile. Umue pokati kavo Jason David BeDuhn, ulongisi walongiso etavo Kosikola ya Velapo yo Konano yo Arizona, ko Estados Unidos. Kunyamo 2003 eye wa sandeka elilongiso limue li kuete 200 kamẽla liatiamẽla “Kambimbiliya eceya a siata oku kuamuiwa calua kolofeka vi vangula ongelesi.” * Elilongiso liaye lia konomuisa ovinimbu Viovisonehua vina elomboloko lialio ka lia suilepo. Kekonomuiso liocinimbu locinimbu, eye wa sokisa olondaka viocisonehua kelimi lio helasi Lambimbiliya ongelesi oco a sande apa va seteka oku pengisa elomboloko liolondaka. Lipi ekonomuiso a linga?

BeDuhn wa lombolola okuti onepa yalua yomanu kuenda vakuakulihiso Wembimbiliya va tava okuti etepiso li sangiwa Vepongoluilo Lioluali Luokaliye (NW) li kasi omo liovisimilo viatavo lia va kuakupongolola. Omo liaco, eye hati, onepa yalua ya tepiso a kasilili omo lioku suapo kuo NW olio lia pongoluiwa lonjila yimue okuti ya suñama. Ndaño okuti BeDuhn ka tava olonjila vimue via kuamiwa vioku pongolola Epongoluilo Lioluali Luokaliye eye hati, Embimbiliya liaco “olio lia suapo vali pokati Kambimbiliya osi a sokisiwa.” Eye wa litukula okuti Embimbiliya lia limbukiwa okuti “liwa calua.”

Dr. Benjamin Kedar, onoño yimue u Heveru ko Isareli, wa tukulavo olondaka via lisoka viatiamẽla Kepongoluilo Lioluali Luokaliye. Kunyamo 1989 eye hati: “Embimbiliya liaco li situlula elikolisilo, locili coku kuata elomboloko lia suapo liovisonehua. . . . Lalimue eteke nda lembukile Vepongoluilo Lioluali Luokaliye ocisimĩlo cimue ka ca sungulukile coku pinyanyuisa elomboloko liovinimbu.”

Lipula ove muẽle ndoco: ‘Cipi ocimãho cange coku tanga Embimbiliya?” Njongola hẽ utangelo umue wa leluka okuti si li sakalaisa loku suapo? Ale njongola oku tanga ovisimĩlo vi situlula olondaka via suapo?’ (2 Petulu 1:20, 21) Ocimãho cove ci ka situlula Embimbiliya o ka nõla.

[Footnote]

[Picture]

“Embimbiliya Li Kola Epongoluilo Lioluali Luokaliye” lia sandekiwa kalimi alua.

[Picture on page 12, 13]

 Oviña vio masoretikos

[Picture on page 13]

Onepa yimue, mu sangiwa elivulu lia Luka 12:7, “. . . Ko ka kuati usumba; ene wa velipo okuti olongungu vialua vi sule.”

[Picture Credit Lines on page 13]

Onepa yatete: Ocisoleko ca Livulu Cofeka yo Rusia, ko São Petersburgo; vali kuenda tatu: Bibelmuseum, Münster; background: © The Trustees of the Chester Beatty Library, Dublin