UYOVWINROTA 8

Mavọ yen mi se vwo mu omamọ rẹ igbeyan?

“Me guọnọ ohwo re me cha ta ota kẹ ọke rẹ ophu de mu vwe. Me guọnọ ohwo rọ cha vuẹ vwẹ nẹ erọnvwọn che shephiyọ ọke rẹ mi de muomaphiyọ. Me je guọnọ ohwo ro che nene uvwe ghọghọ ọke rẹ oma da vwerhen ovwẹ. Vwọ kẹ vwẹ, e vwo vwo igbeyan ghanre mamọ.”​—Brittany.

IGBEYAN rẹ imitete muẹ, fẹnẹ ọ rẹ ighene. Imitete guọnọ igbeyan ri che nene ayen hẹha, ẹkẹvuọvo, ighene guọnọ igbeyan re cha chọn ayen uko ji bicha ayen.

Vwọba, Baibol na tare nẹ “igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.” (Isẹ 17:17) Oka rẹ ugbeyan nana fẹnẹ imitete ivẹ re dia igbeyan re heha kuẹgbe!

Uyota: Wọ vwọ ghwanra na, wọ guọnọ igbeyan

1. Ri vwo omamọ rẹ iruemu

2. Ri ruẹ dẹndẹn

3. Re cha chọn wẹ uko vwọ dia omamọ ohwo

Onọ: Mavọ yen wọ sa vwọ mrẹ oka rẹ igbeyan ri vwo iruemu erha nana? Gbe jẹ a fuẹrẹn ayen ọvuọvo.

Uruemu rẹ Ugbeyan #1​—Ugbeyan ro Vwo Omamọ rẹ Iruemu

Obo ro fori nẹ wọ riẹn. Ọ dia ihwoeje re tare nẹ ayen ugbeyan wẹn yen uvi rẹ ugbeya-an. Baibol na tobọ tanẹ “igbeyan evo herọ re vwẹ oma ruẹ igbeyan.” (Isẹ 18:24) Ota yena ghene uyota? Roro: Ohwo ọvo vwẹ “ugbeyan” omeru mu we jovwo re fikirẹ obo rọ guọnọ mie we? Yẹrẹ wọ vwẹ ugbeyan mu ohwo rọ ta orharhe ota kpahen owẹ vwẹ obuko jovwo re, yẹrẹ hra ẹfian nene asan eje kpahen owẹ? Emu tiọyena sa nẹrhẹ ọ bẹn wọ vwọ vwẹrosuọ ọfa. a Vwọ kpahen ugbeyan re muẹ, karophiyọ ọkieje nẹ uvi rẹ ugbeyan ghanre nọ uche rẹ igbeyan ru wo vwori!

Obo wo se ru. Sane ugbeyan ro vwo omamọ rẹ uruemu rẹ wọ sa vwẹrokere.

“Ihwo eje ta omamọ ota kpahen ugbeyan mẹ Fiona. Me je guọnọ nẹ ihwo ta omamọ ota kpahen ovwẹ. Uruemu rọyen je vwe. Me guọnọ vwẹrokere.”​—Yvette, 17.

Davwen owọẹjẹ nana.

1. Se Galesha 5:​22, 23.

2. Nọ oma wẹn, ‘Ugbeyan mẹ dje iruemu ri churobọ si ‘omamọ re ẹwẹn na’ phia?’

3. Si edẹ rẹ igbeyan re ma kẹrẹ owẹ phiyotọ. Wo ji si uruemu rayen ọvuọvo kẹre odẹ rayen.

Odẹ

․․․․․

Uruemu

․․․․․

Iroroẹjẹ: Wo de no nẹ orharhe uruemu ọvo yen ayen vwori, ọnana sa dia ọke wọ vwọ guọnọ omamọ igbeyan!

Uruemu rẹ Ugbeyan #2​—Ugbeyan ro Ruẹ Dẹndẹn

Obo ro fori nẹ wọ riẹn. Urhurusivwe wo vwo mu igbeyan vwọ ganphiyọ ye, ọ sa nẹrhẹ wo rhiabọreyọ igbeyan ri fori-i. Baibol na da ta: “Ugbeyan rẹ ẹkpa kọ re oja.” (Isẹ 13:20) Ota na “ẹkpa” shekpahen ihwo ri brorhiẹn rẹ ayen vwo ru obo re chọre ukperẹ ayen vwọ kerhọ rẹ omamọ rẹ uchebro. Ofori nẹ wọ kẹnoma kẹ eka rẹ igbeyan tiọyen!

Obo wo se ru. Sane ugbeyan wẹn ukperẹ wọ vwọ reyọ kohwo kohwo vwo mu igbeyan. (Une rẹ Ejiro 26:4) Vwẹ ẹgba iroro wẹn vwo “vughe ofẹnẹ rọ hẹ ohri rẹ ọvwata vẹ oruimwemwu, vwẹ uvwre rẹ ohwo rọ ga Ọghẹnẹ vẹ ọ ro jẹ ẹga.”​—Malakae 3:​18.

“Oma vwerhen ovwẹ nẹ ọsẹ vẹ oni mẹ chọn vwẹ uko vwọ guọnọ igbeyan​—ihwo rẹ me vẹ ayen gbahẹ edje ri vwo ẹguọnọ ri Jihova re je guọnọ ru obo re vwerhọn oma.”​—Christopher, 13.

Kpahenphiyọ enọ nana:

Mẹ vẹ igbeyan mẹ da herọ, oshọ mu vwe nẹ ayen che keke uvwe vwo ru obo re me riẹnre nẹ ọ chọre?

□ E

□ Ẹjo

Me mrẹ bẹnbẹn mi vwo dje igbeyan mẹ kẹ ọsẹ vẹ oni mẹ, fikirẹ oshọ rẹ ayen da sen?

□ E

□ Ẹjo

Iroroẹjẹ: Ẹkpahanphiyọ wẹ vwọ kẹ enọ rehẹ obenu na da dia e, gba guọnọ igbeyan ri ruẹ dẹndẹn​—ihwo ri ruẹ obo re vwerhen Ọghẹnẹ oma.

Uruemu rẹ Ugbeyan #3​—Igbeyan re Cha Chọn wẹ Uko Vwọ Dia Omamọ rẹ Ohwo

Obo ro fori nẹ wọ riẹn. Baibol na da ta: “Orharhe ọyankugbe miovwon omamọ rẹ uruemu.” (1 Kọrẹnt 15:​33, Today’s English Version) Eghene ọmọtẹ ọvo re se Lauren da ta: “Emọ iklasi mẹ rhiabọreyọ ovwẹ ọ da dianẹ mi ru oborẹ ayen vuẹ vwẹ nẹ mi ru. Kidie nẹ mi vwo igbeya-an, mi de brorhiẹn me vwọ vwẹrokere ayen rere ayen se vwo rhiabọreyọ ovwẹ.” Lauren mrẹvughe nẹ wo de ru oborẹ igbeyan wẹn vuẹ we nẹ wo ru, wọ hepha kerẹ ubi rẹ apene re biẹ cha biẹ kpo obo ri je ohwo. Ofori nẹ wọ guọnọ omamọ rẹ igbeyan!

Obo wo se ru. Kẹnoma kẹ ihwo re guọnọre nẹ wo ru oborẹ ayen ruẹ tavwen ayen ki se rhiabọreyọ owẹ. Igbeyan wẹn sa hanvwe siẹrẹ wo de nene owọẹjẹ nana, ẹkẹvuọvo, oma cha vwerhen owẹ, uphẹn wo vwo vwo omamọ igbeyan ji che rhiephiyọ kẹ wẹ​—igbeyan re cha chọn wẹ uko vwọ dia omamọ rẹ ohwo.​—Rom 12:2.

“Omamọ rẹ erhiẹn yen ugbeyan mẹ Clint brẹ, o ji vwo ẹwẹn rẹ erorokẹ, fikirẹ ọnana, ọ da rhe dia obodẹn rẹ ukẹcha vwọ kẹ vwẹ.”​—Jason, 21.

Nọ oma wẹn enọ nana:

Mi wene oborẹ me sẹn osẹnvwe je ta ota wan, yẹrẹ dje uruemu ro je fo phia kidie nẹ me guọnọ ru obo re cha nẹrhẹ oma vwerhen igbeyan mẹ?

□ E

□ Ẹjo

Mi kpo asan me riẹnre nẹ o fo asan me ra-a, kidie nẹ me guọnọ ru obo re cha nẹrhẹ oma vwerhen igbeyan mẹ?

□ E

□ Ẹjo

Iroroẹjẹ: Ẹkpahọnphiyọ wẹn vwọ kẹ enọ yena da dia e, gbe bru ọsẹ vẹ oni wẹn ra yẹrẹ ohwo ọfa ro tedje vwọ kẹ ukẹcha. Wọ da dia ọvo usun rẹ Iseri ri Jihova, wọ je sa nokpẹn rẹ ukẹcha mie ọkpako rẹ ukoko.

SE ERỌNVWỌN EFA KPAHEN UYOVWINROTA NANA VWẸ VOLUME 2, CHAPTER 9

VWẸ UYOVWINROTA RỌ VWỌ KPAHEN ỌNANA

Ugbeyan wẹn ọvo​—yẹrẹ ọkiọvo ubiudu wẹn​—keke uwe nẹ wo ru obo re brare? Mrẹ oborẹ wo se vwo phio kparobọ!

[Eta rehẹ obotọ na]

ẸKPO RI BAIBOL

“Ugbeyan ọvo herọ re kẹrẹ ohwo nọ oniọvo.”​—Isẹ 18:24.

[Ẹkpo rọ teyenphia]

“Ọsẹ vẹ oni mẹ vwọ vuẹ vwẹ nẹ me kẹnoma kẹ ẹko rẹ igbeyan evo, me da vuẹ oma mẹ nẹ ihwo nana yen me guọnọre nẹ e dia igbeyan mẹ. Omamọ rẹ uchebro yen ọsẹ vẹ oni mẹ vwọ kẹ vwẹ na, mi vwo roro kpahọn, me da rhe mrẹvughe nẹ emamọ ihwo buebun herọ mi se vwo mu igbeyan”​—Cole

[Uhoho]

Wo de ru oborẹ igbeyan wẹn vuẹ we nẹ wo ru, wọ hepha kerẹ ubi rẹ apene re biẹ cha biẹ kpo obo ri je ohwo