Jesu ohwo ọgbagba, ọtiọyena o rhiẹromrẹ ebẹnbẹn buebun rẹ ihwo hirharoku-u. Ẹkẹvuọvo, ojaẹriọ rẹ ihwo hirharokuẹ na da. O muegbe ro vwo ru vrẹ oborẹ ihwo rhẹro rọyen nẹ o che ru kẹ ayen. Erorokẹ yen muro vwọ chọn ihwo efa uko.

Kohwo kohwo nẹ Jesu phiyọ ohwo ra sa rua, te imitete te ekpako kidie o nẹ oma gegerege o de jẹ erhọ rayen eka-a. Ihwo na ghene mrẹ nẹ o vwo ọdavwẹ rayen, ọtiọyena, oma kọ vwerhen ayen siẹrẹ ayen vẹ ọyen da herọ.

Ọkieje yen Jesu vwọ nẹrhovwo rhe Ọsẹ rọyen vwẹ odjahọn, tobọ vwẹ ọke ọ vẹ ihwo efa da herọ. Ọ nẹrhovwo vwẹ ẹdia vẹ ọke sansan, ọ dia ọke ọ da guọnọ riemu ọvo yen vwọ nẹrhovwo-o. Ọ nẹrhovwo rẹ akpẹvwẹ vẹ ujiri rhe Ọsẹ rọyen, ọ je yare odjekẹ mie Ọsẹ rọyen tavwen o ki brorhiẹn eghanghanre.

Jesu vwo owenvwe rọ vwọ chọn ihwo efa uko tobọ vwẹ ọke rẹ oma de broku. O vwo uruemu rọ vwọ vwẹ ọdavwẹ rọyen vwọ ka obaro vwọ kẹ ọ rẹ ihwo efa-a. O phi udje phiyotọ kẹ avwanre re se nene kpẹkpẹkpẹ.

Jesu ru vrẹ o di vwo yono avwanre kpahen evwoghovwo, o djerephia womarẹ oborẹ o nene idibo rọyen vẹ ihwo efa yerin wan.

Jesu riẹnre nẹ ihwo ri Ju evo che rhiabọreyọ kerẹ Mesaya na-a, ọ je riẹn nẹ evo rayen che hwe. Dedena, o ru obo ro se ru eje vwọ chọn ayen. Ọ davwẹngba vwo yono ayen uyota na. O phi udje rẹ oruru phiyotọ kẹ idibo rọyen ri che rhiẹromrẹ utuoma yẹrẹ ẹvwọsuọ.

Jesu vwo erianriẹn vẹ aghwanre nọ ihworakpọ ri jẹgba vwẹ kidjerhe kidjerhe. Aphro herọ-ọ nẹ ogbagba rọyen na nẹrhẹ o vwo omakpokpọ, ọ je riẹn ọbe nọ ihwoeje re riarierẹ. Dedena, o vwomakpotọ ga ihwo efa.

Jesu vwo odirin rẹ iyinkọn rọyen kugbe ihwo efa, ọ da tobọ dianẹ ayen nene udje rọyen yẹrẹ ru oborẹ ọ tare-e. Odirin muro vwọ vwanriẹn iyono ro fori nẹ ayen riẹn rere ayen se vwo sikẹrẹ Jihova.