Iseri ri Jihova ruẹ orẹ rẹ ẹdẹ re vwiẹ ohwo-o kidie avwanre riẹnre nẹ orẹ tiọyena tuẹ Ọghẹnẹ oma. Dede nẹ Baibol na ghwa ta ota phephẹn kpahen ẹgha rẹ orẹ rẹ ẹdẹ re vwiẹ ohwo-o, jẹ ọ chọn avwanre uko vwọ roro kpahen erọnvwon evo kiriguo vwẹ orẹ nana ji vwo ẹruọ rẹ ẹro rẹ Ọghẹnẹ vwo ni ayen. Ja mrẹ oborẹ Baibol na tare.

1.   Obọ rẹ egẹdjọ yen orẹ rẹ ẹdẹ re vwiẹ ohwo da tonphiyọ. Funk & Wagnalls Standard Dictionary of Folklore, Mythology, kugbe Legend tare nẹ, orẹ rẹ ẹdẹ re vwiẹ ohwo na tonphiyọ kidie ihwo vwo imuẹro nẹ “ẹwẹn umwemwu se kpokpo ohwo re vwiẹre vwẹ ẹdẹ yena,” vwọba, “omaẹvwọphia rẹ igbeyan kugbe omamọ rẹ uyeren vwẹ ukẹcha phia vwọ sẹro rẹ ohwo ro ruẹ orẹ rẹ ẹdẹ re vwiẹrẹ na.” Ọbe na The Lore of Birthdays tare nẹ vwẹ ọke awanre, orẹ rẹ ẹdẹ re vwiẹ ohwo pha ghanghanre mamọ kidie “ọyen ẹdẹ rẹ ohwo sa vwọ riẹn ọka rẹ akpọ ro che yerin vwẹ obaro na [horoscope],” ayen muẹ esegbuyota nana kpahen “uruemu ra vwọ fan otọ rẹ isio.” Ọbe na je tanẹ, “ikando ra torhẹ vwẹ orẹ rẹ ẹdẹ re vwiẹ ohwo sa nẹrhẹ ohwo na yeren omamọ rẹ akpọ ra guọnọre nẹ o yerin.”

    TẸkẹvuọvo Baibol na brorhiẹn hwe uruemu rẹ imajiki, epha ẹbọ, orhan yẹrẹ “efa etiẹye na.” (Urhi Rivẹ 18:14; Galesha 5:​19-​21) Vwọrẹ uyota, emuọvo rọ sorọ rẹ Ọghẹnẹ vwọ ghwọrọ orere ri Babilọn awanre yen uruemu ra vwọ fan otọ rẹ isio, rọ dia uruemu rẹ epha ẹbọ. (Aizaya 47:​11-​15) Iseri ri Jihova vwọsua korẹ korẹ rẹ ihwo ruẹ-ẹ; ẹkẹvuọvo, ọ da vwọso obo ri Baibol na tarẹ, ayen kẹnoma kẹ.

2.   Inenikristi rẹsosuọ ruẹ orẹ rẹ ẹdẹ re vwiẹ ohwo-o. World Book Encyclopedia tare nẹ “ayen ni orẹ rẹ ẹdẹ re vwiẹ ohwo kerẹ ẹkuruemu rọ tonphiyọ vwẹ obọ rẹ egẹdjọ.” Baibol na djere phephẹn nẹ iyinkọn na vẹ ihwo efa rẹ Jesu yonori phi omamọ rẹ udje phiyotọ kẹ Inenikristi.​​—⁠2 Tẹsalonaika 3:⁠6.

3.   Irueru vuọvo rẹ Baibol na jiri kẹ Inenikristi nẹ ayen ru yen ẹkanrophiyọ rẹ ughwu ri Jesu. (Luk 22:​17-​20) Ofori nẹ ọnana gbe ohwo unu-u kidie Baibol na tare nẹ “ẹdẹ rẹ ughwu rhonọ ẹdẹ rẹ evwiẹ.” (Aghwoghwo 7:⁠1) Jesu vwo omamọ odẹ vẹ Ọghẹnẹ vwẹ oba rẹ akpeyeren rọyen vwẹ otọrakpọ na, rọ nẹrhẹ ẹdẹ rẹ ughwu rọyen ghanre vrẹ ẹdẹ re vwiẹrẹ.​—Hibru 1:4.

4.   Baibol na vwẹ ọke vuọvo djunute odibo rẹ Ọghẹnẹ ro ruẹ orẹ rẹ ẹdẹ re vwiẹ ohwo-o. Ọ dia ọ chọrọ ihwo ri si Baibol na ẹro-o, ẹkẹvuọvo, Baibol na ta ota kpahen ihwo ivẹ re ga Ọghẹnẹ-ẹ, ri ruẹ orẹ rẹ ẹdẹ re vwiẹ ayen. Erhuvwu vuọvo nẹ ivẹ na rhe-e.​​—⁠Gẹnẹsis 40:​20-​22; Mak 6:​21-​29.

 Kerẹ uvi rẹ emiọvwọ, Iseri ri Jihova dje ẹguọnọ kẹ emọ rayen ọkieje, womarẹ ayen vwo ruẹse kẹ ayen ji kuomakugbe riakpọ. Ayen nene udje ọgbagba rẹ Ọghẹne rọ vwẹ erọnvwọn iyoyovwin ruẹse kẹ emọ rọyen vwẹ ọke rẹ ayen rhẹro rọye-en. (Matiu 7:​11) Eta rehẹ obotọ na djerephia nẹ emọ rẹ Iseri ri Jihova niro nẹ emu vuọvo va ayen abọ-ọ.

•  

•   O je vwe ọtiọna kidie mi rhẹro rọye-en.”​​—⁠Gregory, ẹgbukpe 11.

•   Rhe uwevwin rẹ avwanre wọ riẹn obo re se uvi rẹ akpọẹriọ!”​​—⁠Eric, ẹgbukpe 6.