Ofian: Iseri ri Jihova ruẹ Ista-a kidie ayen dia Inenikristi-i.

 Utoya: Avwanre vwo imuẹro nẹ Jesu Kristi yen Osivwin rẹ avwanre, ọtiọyena kẹ avwanre davwẹngba vwo “nene owọẹjẹ rọyen kpẹkpẹkpẹ.”​—1 Pita 2:21; Luk 2:11.

Ofian: Ovwan vwo imuẹro nẹ a kpare Jesu vwo nẹ ushi-i.

 Uyota: Avwanre vwo imuẹro kpahen evrẹnushi ri Jesu, ji no phiyọ obo re pha ghanghanre vwọ kẹ esegbuyota rẹ Inenikristi, ọtiọyena kẹ avwanre ta ota kpahọn vwẹ aghwoghwo rẹ avwanre.​—1 Kọrẹnt 15:​3, 4, 12-15.

Ofian: Ovwan guọnọre nẹ oma vwerhen emọ rẹ ovwa-an, kidie nẹ ovwan ruẹ Ista-a.

 Uyota: Avwanre vwo ẹguọnọ rẹ emọ rẹ avwanre​—avwanre ruẹ oborẹ avwanre se ru eje vwo yono ayen je cha ayen uko vwo vwo omavwerhovwẹn.​—Taitọs 2:4.

•   O vwo asan vuọvo vwẹ Baibol na rọ ta ota kpahen orẹ rẹ Ista-a.

•   Jesu tare nẹ e ru Ẹkarophiyọ rẹ Ughwu rọyen, ọ dia evrẹnushi rọye-en. Kukpe kukpe yen avwanre vwo ruẹ Ẹkarophiyọ rẹ Ughwu ri Jesu kirobo rọ hepha vwẹ luna kalẹnda.​—Luk 22:​19, 20.

•   Avwanre vwo imuẹro nẹ Ọghẹnẹ guọnọre nẹ avwanre ruẹ orẹ rẹ Ista-a, kidie orẹ rẹ Ista ọyen irueru rẹ igiye rẹ ọke awanre. Ọghẹnẹ guọnọre nẹ a vwẹ ẹga kẹ ọyen ọvo kidie ọyen “Ọghẹnẹ rọ rioma,” ọtiọyena ivun miovwo siẹrẹ avwanre de vwobọ vwẹ ẹga ri churobọ si irueru ro rhiabọreyọ-ọ.​—Eyanno 20:5; 1 Ivie 18:21.

 Avwanre ruẹ orẹ rẹ Ista-a kidie avwanre mu orhiẹn rẹ avwanre vwọ kpahen Baibol na, rọ tare nẹ a vwẹ “omamọ rẹ aghwanre vẹ ọhọ” vwo ruiruo, ukperẹ e vwo nene ẹkuruemu rẹ ihworakpọ. (Isẹ 3:21; Matiu 15:3) Dede nẹ avwanre vuẹ ihwo kpahen ẹro rẹ Ọghẹnẹ vwo nẹ Ista siẹrẹ ayen da nọ, avwanre ji muọghọ vwọ kẹ orhiẹn rẹ ohwo ọvuọvo bruru.​—1 Pita 3:15.