Ẹjo, kakaka. Iseri ri Jihova Inene-ri-Kristi ri vwo esegbuyota kpahen obo ri Baibol na yonori. Rẹ ẹga evo vwo yono nẹ ihwo ri Ju ri koko vwẹ ẹkuotọ ri Palestine, ọyen orugba rẹ aroẹmrẹ ri Baibol na, Iseri ri Jihova roro ọtiọye-en. Ayen vwo imwẹro nẹ a mraro rẹ irueru rusuon nana vwẹ Baibol na-a. Vwọrẹ uyota, Isiesi-ọfuanfon titẹ usuon rẹ ohworakpọ vuọvo-o yẹrẹ kpare ihwo rẹ ẹkuotọ ọvo vwọ vrẹ ọfa-a. Ọbe ọkiọke re se The Watchtower, rẹ Iseri ri Jihova vwo ruiruo, tarọ phephẹn nẹ: “O [vwo] asan vuọvo vwẹ Isiesi-ọfuanfon na rọ rhọnvwe phiyẹ oseghe rusuon rukoko ri Zayọni-i.”

 Encyclopædia Britannica dje ukoko ri Zayọn kerẹ “Ẹko roseghe rusuon rẹ ihwo ri Ju rọ tẹnrovi evwomuo rẹ ẹkuotọ rẹ ihwo ri Ju phiyẹ Palestine.” Ẹwẹn rẹ ẹga vẹ oseghe rusuon ọyen obuko rẹ ukoko na. Irueru rẹ ukoko rẹ Zayọn dia ẹbẹre vuọvo vwẹ uyono rẹ Iseri ri Jihova-a, ayen ji vwobọ vwẹ irueru raye-en.

 Ukoko rẹ Iseri ri Jihova ọrẹ ẹga ọvo, ayen titẹ ọrhuẹrẹphiyotọ rẹ usuon vuọvo-o, jite oseghe rusuon rukoko ri Zayọn. Iyẹnrẹn sansan djere phia nẹ Iseri ri Jihova ka ẹbẹre vuọvo vwẹ usuo-on, vwẹ ẹkuotọ evo ayen tobọ rioja rẹ omukpahen ọgangan ukperẹ ayen vwọ ghwomaphiyẹ ẹbẹre ọvo rusuon. Avwanre vwo imwẹro nẹ Uvie r’Ọghẹnẹ rohẹ odjuvwu na ọvo yen cha ghwa uvi rufuoma rhe otọrakpọ na; o vwo usuon yẹrẹ oseghe rẹ ihworakpọ vuọvo ro se ru ọnana-a.

 O toro asan rẹ ayen dia-a, ravwọ yọnrọn urhi rẹ anadjaibo pha ghanghanre kẹ esegbuyota rẹ Iseri ri Jihova. Ayen gbevwọsua ẹgba rusuon rẹ anadjaibo-o yẹrẹ vwobọ vwẹ ofovwi-in.