Ẹguọnọ rẹ Iseri ri Jihova vwo kpahen Ọghẹnẹ vẹ irivẹ rayen nẹrhẹ oma vwerhen ayen, o ji muẹ ayen vwo ghwoghwo ovuẹ ri Baibol na vwọ kẹ ihwo eje, ji te ihwo re tare jovwo re nẹ “me guọnọ kerhọ-ọ.” (Matiu 22:​37-​39) Ẹguọnọ re vwo kpahen Ọghẹnẹ muẹ avwanre vwọ kerhọ rẹ iji rẹ ọmọ rọyen re vwo “soseri ro fiotọ.” (Iruo rẹ Iyinkọn Na 10:42; 1 Jọn 5:3) Kirobo rẹ emraro rẹ Ọghẹnẹ vwẹ ọke awanre ruru, avwanre ji ghwoghwo ovuẹ rẹ Ọghẹnẹ na vwọ kẹ ihwo abọ buebun. (Jerimaya 25:4) Kidie nẹ avwanre vwo ẹguọnọ rẹ irivẹ avwanre, kọ nẹrhẹ avwanre davwẹngba vwo ghwoghwo “iyẹnrẹn esiri rẹ Uvie na” vwọ kẹ ihwo eje, ji te ihwo re guọnọ kerhọ jovwo-o.​​—Matiu 24:14.

 Ọke buebun na, avwanre mrẹ ihwo ri dje omavwerhovwẹn phia siẹrẹ avwanre de rhivwin. E jẹ a fuẹrẹn iroro erha re sorọ:

•   Ihwo kua vwo nẹ asan kpo asan.

•   Ihwo efa vwevunrẹ uwevwin na dje omavwerhovwẹn phia kpahen ovuẹ rẹ avwanre.

•   Ihwo wene. Erọnvwọn re phia vwẹ akpọ na vẹ ebẹnbẹn romobọ nẹrhẹ ihwo evo mrẹvughe nẹ ayen “guọnọ odjekẹ rẹ Ọghẹnẹ,” ọtiọyena ayen de vwo owenvwe rẹ ayen vwọ kerhọ rẹ ovuẹ ri Baibol na. (Matiu 5:3) Ihwo re tobọ vwọso ihwo efa ji se wene kirobo rẹ ọyinkọn Pọl ruru.​​—1 Timoti 1:13.

 Ẹkẹvuọvo, avwanre gba ihwo vwọ kerhọ rẹ ovuẹ rẹ avwanre-e. (1 Pita 3:15) O mu avwanre ẹro nẹ ohwo vuọvo yen che brorhiẹn romobọ rọyen vwọ kpahen ẹga.​​—Urhi Rivẹ 30:​19, 20.