Левилар 14:1–57
14 Яҳова гапиришда давом этиб, Мусога шундай деди:
2 «Мохов пок деб эълон қилинган куни, қуйидаги қонунга риоя қилиш керак: уни руҳонийнинг олдига келтириш даркор+.
3 Руҳоний қароргоҳ ташқарисига чиқиб, уни текширсин. Ўша киши мохов касаллигидан тузалган бўлса,
4 руҳоний унга покланиш учун иккита тирик ҳалол қушни, кедр дарахтининг новдасини, қирмизи ип ҳамда иссоп* олиб келишни буюрсин+.
5 Руҳоний қушлардан бирини булоқ суви қуйилган сопол идишнинг устида сўйишни буюрсин.
6 Тирик қушни, кедр дарахтининг новдасини, қирмизи ип ҳамда иссопни олиб, уларни булоқ суви устида сўйилган қушнинг қонига ботириб олсин.
7 Кейин у қонни олиб мохов касаллигидан покланаётган кишининг устига етти марта сачратсин ва уни пок деб эълон қилсин. Тирик қушни эса далага қўйиб юборсин+.
8 Покланаётган киши кийимларини ювсин, бошидаги ҳамма сочини ва баданидаги тукларини қириб, чўмилиб олсин, шунда у пок бўлади. Бундан кейин қароргоҳга кириши мумкин, аммо етти кун ўз чодирининг ташқарисида яшасин.
9 Еттинчи куни бошидаги сочларини ҳамда соқолию қошларини қирсин. Ҳамма сочларини қириб бўлгач, кийимларини ювиб, чўмилсин ва у пок бўлади.
10 Саккизинчи куни у нуқсонсиз иккита ёш қўчқорни, бир яшар нуқсонсиз битта урғочи қўзини+, дон назри сифатида+ келтириладиган мой билан аралаштирилган аъло сифатли ундан эфанинг* ўндан уч қисмини ҳамда бир лог* мойни олиб келсин+.
11 Пок деб эълон қиладиган руҳоний, покланаётган кишини назрлари билан бирга учрашув чодирининг кираверишига, Яҳованинг ҳузурига олиб келсин.
12 Руҳоний битта ёш қўчқорни ва бир лог мойни олсин-да, айб қурбонлиги сифатида+ келтириб, Яҳованинг олдида силкитиладиган назр сифатида силкитсин+.
13 Кейин у ёш қўчқорни одатда гуноҳ қурбонлиги ва куйдириладиган қурбонликлар келтириладиган жойда+, муқаддас чодирнинг ҳовлисида сўйсин. Чунки гуноҳ қурбонлиги сингари, айб қурбонлиги ҳам руҳонийга тегишли+. Бу, ғоят муқаддасдир+.
14 Руҳоний айб қурбонлиги сифатида келтирилган ҳайвоннинг қонидан озгина олиб покланаётган кишининг ўнг қулоғининг солинчагига, ўнг қўлининг бош бармоғига ва ўнг оёғининг бош бармоғига суртсин.
15 Руҳоний бир лог мойдан озгина олиб+, ўзининг чап кафтига қуйсин.
16 Кейин у ўнг қўлининг бармоғини чап кафтидаги мойга ботирсин-да, Яҳованинг ҳузурида бармоғидаги мойни етти марта ерга сачратсин.
17 Кафтида қолган мойни эса айб қурбонлигининг қони суртилган жойларига — покланаётган кишининг ўнг қулоғининг солинчагига, ўнг қўлининг бош бармоғига ва ўнг оёғининг бош бармоғига суртсин.
18 Кафтида ортиб қолган мойни руҳоний покланаётган кишининг бошига қуйсин ва Яҳованинг ҳузурида унинг гуноҳини ювсин+.
19 Руҳоний гуноҳ қурбонлигини+ келтириб, покланаётган кишининг гуноҳини ювсин. Кейин эса куйдириладиган қурбонликни сўйсин.
20 Руҳоний куйдириладиган қурбонликни ҳамда дон назрини+ қурбонгоҳда куйдириб, ўша кишининг гуноҳини ювсин+ ва у пок бўлади+.
21 Борди-ю, у киши камбағал бўлиб етарлича маблағи бўлмаса, гуноҳи ювилиши учун у битта ёш қўчқорни айб қурбонлиги сифатида келтирсин-да, уни силкитсин. Шунингдек, у дон назри сифатида мой билан аралаштирилган аъло сифатли ундан эфанинг ўндан бир қисмини ҳамда бир лог мой олиб келсин.
22 Шароитига қараб иккита ғуррак ёки иккита каптар палапонини олиб келсин. Булардан бирини гуноҳ қурбонлиги, иккинчисини эса куйдириладиган қурбонлик сифатида келтирсин+.
23 Саккизинчи куни+ у поклигини тасдиқлатиш учун бу нарсаларни Яҳованинг ҳузурига, учрашув чодирининг кираверишига олиб келиб+, руҳонийга берсин.
24 Руҳоний айб қурбонлиги қилиб келтирилган ёш қўчқорни+ ва бир лог мойни олиб, силкитиладиган назр сифатида Яҳованинг ҳузурида силкитсин+.
25 Кейин у айб қурбонлиги қилиб келтирилган ёш қўчқорни сўйсин ва руҳоний айб қурбонлигининг қонидан озгина олиб, уни покланаётган кишининг ўнг қулоғининг солинчагига, ўнг қўлининг бош бармоғига ва ўнг оёғининг бош бармоғига суртсин+.
26 Руҳоний чап кафтига озгина мой қуйсин+,
27 сўнг ўнг қўлининг бир бармоғи билан чап кафтидаги мойни Яҳованинг ҳузурида етти марта ерга сачратсин.
28 Кафтидаги мойни айб қурбонлигининг қонини суртган жойларига — покланаётган кишининг ўнг қулоғининг солинчагига, ўнг қўлининг бош бармоғига ва ўнг оёғининг бош бармоғига суртсин.
29 Руҳоний кафтида ортиб қолган мойни покланаётган кишининг бошига қуйсин ва Яҳованинг ҳузурида унинг гуноҳини ювсин.
30 Кейин руҳоний, ўша киши шароитига қараб келтирган ғурраклардан биттасини ёки каптар палапонларидан биттасини олиб келсин+.
31 Улардан бирини гуноҳ қурбонлиги сифатида, иккинчисини эса дон назри билан биргаликда куйдириладиган қурбонлик қилиб келтирсин+. Руҳоний Яҳованинг ҳузурида покланаётган кишининг гуноҳини ювсин+.
32 Мохов касаллигига дучор бўлган ва руҳоний уни пок деб эълон қилиши учун маблағи етарли бўлмаган кишига тегишли қонун шудир».
33 Сўнг Яҳова, Мусо билан Ҳорунга қуйидагиларни айтди:
34 «Мен сизларга мулк қилиб бераётган+ Канъон юртига+ кирганингизда, юртингиздаги бирорта хонадонда мохов касаллиги пайдо бўлишига йўл қўйсам+,
35 ўша хонадон эгаси келиб руҳонийга: “Уйимнинг деворида доғ пайдо бўлибди. Кўринишидан мохов касаллигига ўхшайди”,— деб айтсин.
36 Руҳоний текширув ўтказишдан олдин, уйдаги ҳамма нарсани нопок деб эълон қилмаслик учун, уйни тозалаб чиқишга буйруқ берсин. Бундан кейин уйни текшириш учун ичкарига кирсин.
37 Руҳоний зарарланган жойни кўздан кечирсин. Мабодо уйнинг деворида сарғиш-яшил ёки қизғиш доғлар пайдо бўлган бўлса ва улар девор юзасидан ичкарироққа киргандай кўринса,
38 руҳоний ташқарига чиқсин-да, уйни етти кунга бекитиб қўйсин+.
39 Еттинчи куни руҳоний қайтиб келиб уйни кўздан кечирсин. Агар доғлар уйнинг деворига тарқалган бўлса,
40 руҳоний доғлари бор тошларни суғуриб, шаҳарнинг ташқарисига, нопок жойга олиб чиқиб ташлашни буюрсин.
41 Кейин уйнинг ички сувоғини бутунлай қириб ташлаб, қириндисини шаҳар ташқарисига, нопок жойга олиб чиқиб ташлашни буюрсин.
42 Улар олиб ташланган тошларнинг ўрнига бошқа тошларни қўйишсин. Руҳоний уларга бошқа қоришмадан фойдаланиб уйнинг деворларини суваб чиқишни буюрсин.
43 Борди-ю, уйдаги тошлар суғуриб олинганидан ҳамда унинг сувоғи қириб ташланиб, қайта суваб чиқилгандан кейин ҳам доғлар пайдо бўлса,
44 руҳоний келиб уйни текшириб чиқсин. Агар доғлар тарқалиб кетган бўлса, бу юқумли мохов касаллигидир+. Бу уй нопокдир.
45 У уйни бузиб, унинг тошларини, ёғочларини ва бутун сувоғини шаҳардан ташқарига, нопок жойга олиб чиқиб ташлашни буюрсин+.
46 Бироқ уй ёпиқ турган кунлари+ кимдир ўша уйга кирса, у кечгача нопок бўлади+.
47 Борди-ю, кимдир ўша уйда ётса ёки овқатланса, у кийимларини ювсин.
48 Лекин руҳоний келиб, уй қайта сувоқ қилинганидан кейин доғлар тарқалмаганини кўрса, руҳоний бу уйни тоза деб эълон қилсин, чунки доғлар йўқ бўлган.
49 Уйни нопокликдан тозалаб чиқиш учун у иккита қушни, кедр дарахтининг новдасини, қирмизи ип ҳамда иссопни олсин+.
50 У қушлардан бирини булоқ суви солинган сопол идишнинг устида сўйсин.
51 Сўнг кедр дарахтининг новдасини, қирмизи ипни, иссопни ҳамда тирик қушни олиб, уларни булоқ суви устида сўйилган қушнинг қонига ботирсин-да, қонни етти марта уй томонга сачратсин+.
52 Кейин қушнинг қонини, булоқ сувини, тирик қушни, кедр дарахтининг новдасини, иссопни ва қирмизи ипни олиб уйни поклаб чиқсин.
53 Тирик қушни шаҳарнинг ташқарисига олиб чиқиб, далага қўйиб юборсин. Шу йўсин руҳоний уйни нопокликдан тозалайди* ва уй пок бўлади.
54 Бу қонун мохов касаллигининг ҳар қандай турига — соч ёки соқол касаллигига+,
55 кийим+ ёки уйда+ пайдо бўладиган мохов касаллигига,
56 шишлар, тошмалар ва доғларга тегишлидир+.
57 Бирор нарсанинг пок ёки нопок эканини аниқлашда ушбу қонун қўлланилади+. Бу, мохов касаллигига тегишли қонундир»+.
Изоҳлар
^ Бир эфа=22 л. Илованинг Б14 мавзусига қ.
^ Бир лог=0,31 л. Илованинг Б14 мавзусига қ.
^ Сўзма-сўз «гуноҳини ювади».
