Bugu Ya Vhuvhili Ya Koronika 18:1-34
18 Yehoshafati o vha e na lupfumo luhulu,+ a tshi huliswa, fhedzi a malelana na Ahaba.+
2 Nga murahu ha miṅwaha a ya ha Ahaba kha ḽa Samaria,+ Ahaba a ṱhavhela Yehoshafati na vhathu vhe a vha e navho nngu na kholomo nnzhi. A mu kombetshedza uri a ye a lwe na muḓi wa Ramothe-giḽiada.+
3 Khosi Ahaba wa Isiraele a amba na Khosi Yehoshafati wa Yuda a ri: “Naa u ḓo ṱuwa na nṋe Ramothe-giḽiada?” A mu fhindula a ri: “Nṋe na iwe ri vhathihi. Vhathu vhashu ndi vhathihi, ri ḓo u tikedza nndwani.”
4 Fhedzi Yehoshafati a amba na khosi ya Isiraele a ri: “Ndi humbela uri u thome u vhudzise Yehova.”+
5 Khosi ya Isiraele ya kuvhanganya vhanna vha 400 vha vhaporofita, ya vha vhudzisa ya ri: “Naa ndi ye u lwa na muḓi wa Ramothe-giḽiada kana ndi litshe?” Vha ri: “Iya, Mudzimu wa ngoho u ḓo kumedzela wonoyo muḓi zwanḓani zwa khosi.”
6 Yehoshafati a ri: “Naa fhano a hu na muporofita wa Yehova?+ Na ene kha ri mu vhudzise uri Mudzimu u ri mini.”+
7 Khosi ya Isiraele ya amba na Yehoshafati ya ri: “Hu kha ḓi vha na munna muthihi+ ane ra nga vhudzisa khae nga ha Yehova; fhedzi ndi a mu vhenga, ngauri ha porofiti zwavhuḓi nga ha nṋe, u porofita zwivhi fhedzi.+ Ndi Mikaya murwa wa Imila.” Fhedzi Yehoshafati a ri: “Khosi i songo amba zwithu zwo raloho.”
8 Khosi ya Isiraele ya vhidza muḓinḓa ya ri: “Ḓisa Mikaya murwa wa Imila nga u ṱavhanya.”+
9 Khosi ya Isiraele na Yehoshafati khosi ya Yuda vho vha vho dzula kha khuluṋoni dzavho, vho ambara dza vhuhosi; vhe fhethu hune ha fhefherwa hone* muṋangoni wa khoro ya Samaria, vhaporofita vhoṱhe vha tshi khou porofita phanḓa havho.
10 Tsedekia murwa wa Kenana a ḓiitela ṋanga dza tsimbi a ri: “Yehova u ri, ‘Iwe u ḓo runga* Vhasiria nga hedzi ṋanga u swika u tshi vha fhelisa.’”
11 Vhaṅwe vhaporofita vho vha vha tshi khou porofita zwi fanaho vha tshi ri: “Iya Ramothe-giḽiada u ḓo kunda;+ Yehova u ḓo kumedzela wonoyo muḓi zwanḓani zwa khosi.”
12 Muḓinḓa we a ya u vhidza Mikaya, a amba nae a ri: “Vhaporofita vhoṱhe vha khou vhudza khosi mafhungo avhuḓi. Ndi humbela uri na iwe u ambe mafhungo ane a fana na avho,+ u ambe mafhungo avhuḓi.”+
13 Fhedzi Mikaya a ri: “Ndi ana nga Yehova a tshilaho, ndi ḓo amba zwine Mudzimu wanga a mmbudza zwone.”+
14 A ḓa kha khosi, khosi ya ri: “Mikaya, naa ri ye u lwa na muḓi wa Ramothe-giḽiada kana ndi litshe?” Ene a ri: “Iyani ni ḓo kunda; vha ḓo kumedzelwa zwanḓani zwaṋu.”
15 Khosi ya ri: “Ndi u anise lungana uri u mmbudze ngoho fhedzi dzinani ḽa Yehova?”
16 Mikaya a ri: “Ndi khou vhona Vhaisiraele vhoṱhe vho balangana dzithavhani, vha tshi nga nngu dzi si na mulisa.+ Yehova u ri: ‘Avha vhathu a vha na muṋe. Muṅwe na muṅwe nga a vhuyelele nḓuni yawe nga mulalo.’”
17 Khosi ya Isiraele ya amba na Yehoshafati ya ri: “Naa a tho ngo u vhudza nda ri: ‘A nga si porofite zwavhuḓi nga ha nṋe, u porofita zwivhi fhedzi’?”+
18 Mikaya a ri: “Ipfa zwine Yehova a amba: Ndo vhona Yehova o dzula kha khuluṋoni yawe+ na mavhuthu awe oṱhe a ṱaḓulu+ o ima nga thungo yawe ya tsha u ḽa na nga thungo yawe ya tsha monde.+
19 Yehova a ri: ‘Ndi nnyi ane a ḓo fhura Ahaba wa Isiraele, uri a ye u fela Ramothe-giḽiada?’ Muṅwe a amba izwi, muṅwe a amba zwiḽa.
20 Ha ḓa muruṅwa+ a ima phanḓa ha Yehova a ri: ‘Nṋe ndi ḓo mu fhura.’ Yehova a ri: ‘U ḓo zwi itisa hani?’
21 Muruṅwa a ri: ‘Ndi ḓo ya nda ita uri vhaporofita vhawe vhoṱhe vha zwifhe.’ Mudzimu a ri: ‘Iwe u ḓo mu fhura, u ḓo kunda. Ṱuwa u ite zwenezwo.’
22 Yehova o ita uri vhaporofita vhau vha zwifhe.+ Fhedzi Yehova o amba uri u ḓo welwa nga khombo.”
23 Tsedekia+ murwa wa Kenana a sendela a rwa Mikaya+ kha shama+ a ri: “Zwo ḓa hani uri muya wa Yehova u bve kha nṋe u ambe na iwe?”+
24 Mikaya a ri: “U ḓo zwi vhona uri zwo ḓa hani ḓuvha ḽine wa ḓo shavhela kamarani ya nga ngomu-ngomu uri u dzumbame.”
25 Khosi ya Isiraele ya ri: “Dzhiani Mikaya ni mu ise kha Amoni murangaphanḓa wa muḓi na kha Yoasi murwa wa khosi.
26 Ni vha vhudze uri: ‘Khosi i ri: “Valelani hoyu muthu dzhele,+ ni mu ṋee vhurothonyana na maḓinyana u swika ndi tshi vhuya nga mulalo.”’”
27 Fhedzi Mikaya a ri: “Arali wa vhuya nga mulalo, hu ḓo vha hu si Yehova we a amba na nṋe.”+ A dovha a ri: “Vhathu vhoṱhe thetshelesani.”
28 Khosi ya Isiraele na Yehoshafati khosi ya Yuda vha ya Ramothe-giḽiada.+
29 Khosi ya Isiraele ya amba na Yehoshafati ya ri: “Ndi ḓo ambara zwiṅwe zwiambaro uri ndi si ḓivhiwe, nda dzhena nndwani, fhedzi iwe u fanela u ambara dza vhuhosi.” Khosi ya Isiraele ya ambara zwiṅwe zwiambaro, vha dzhena nndwani.
30 Khosi ya Siria ya laya vhalangi vhayo vha gariki ya ri: “Ni songo lwa na muthu na muthihi hu sa londwi uri ndi muṱuku kana ndi muhulwane, nga nnḓa ha khosi ya Isiraele.”
31 Musi vhalangi vha gariki vha tshi tou vhona Yehoshafati, vha amba nga tshavho vha ri: “Heyi ndi khosi ya Isiraele.” Vha rembuluwa uri vha lwe nae; Yehoshafati a ṱavha mukosi uri vha mu thuse,+ Yehova a mu thusa, a ita uri vha mu ṱutshele.
32 Musi vhalangi vha gariki vha tshi vhona uri a si khosi ya Isiraele, vha litsha u mu pandamedza.
33 Fhedzi muṅwe munna a sokou* pfula nga vhura hawe, a pfula khosi ya Isiraele he tshiambaro tshayo tsha u ḓitsireledza nndwani tsha vha tsho ṱanganywa hone. Khosi ya amba na mutshimbidzi wayo wa gariki ya ri: “Rembulusa gariki u mbvise nndwani ngauri ndo huvhala.”+
34 Ha lwiwa ḓuvha ḽoṱhe, khosi ya Isiraele ya imiswa kha gariki yo livhana na Vhasiria u swika ḽi tshi kovhela; ya fa nga madekwana.+
