Bugu Ya Vhuvhili Ya Samuele 6:1-23
6 Davida a dovha a kuvhanganya maswole oṱhe ane a vha vhahali kha ḽa Isiraele, vhanna vha 30 000.
2 Davida na vhanna vhoṱhe vhe a vha e navho vha ya Baali-yuda uri vha dzhie Mbulungelo ya Mudzimu wa ngoho,+ ye vhathu vha vha vha tshi vhidzelela phanḓa hayo dzina ḽa Yehova wa mavhuthu,+ o dzulaho nṱha* ha vhakerube.+
3 Naho zwo ralo, vha vhea Mbulungelo ya Mudzimu wa ngoho kha gariki ntswa+ uri vha i bvise nḓuni ya Abinadaba,+ ye ya vha i tshikwarani; Usa na Ahio vharwa vha Abinadaba vho vha vha tshi khou tshimbidza yeneyo gariki ntswa.
4 Vha hwala Mbulungelo ya Mudzimu wa ngoho u bva nḓuni ya Abinadaba i re tshikwarani, yeneyo Mbulungelo yo vha yo rangwa phanḓa nga Ahio.
5 Davida na vhoṱhe vha nnḓu ya Isiraele vho vha vha tshi khou pembela phanḓa ha Yehova vhe na zwilidzo zwo fhambanaho zwo itwaho nga thanda ya muri wa mudzhunipa na haripa, zwilidzo zwi re na ṱhale,+ mirumba,+ simbala+ na zwiṅwe zwilidzo.
6 Musi vha tshi swika fhethu hune ha fhefherwa hone* ngei Nakoni, Usa a isa tshanḓa a fara Mbulungelo ya Mudzimu wa ngoho,+ ngauri kholomo dzo ṱoḓou i wisa.
7 Yehova a sinyutshela Usa, Mudzimu wa ngoho a mu vhulaya+ henefho, nga nṱhani ha u sa ṱhonifha mulayo wa Mudzimu,+ a fela henefho tsini na Mbulungelo ya Mudzimu wa ngoho.
8 Fhedzi Davida a sinyuwa nge Yehova a sinyutshela Usa; henefho fhethu hu vhidzwa Perese-usa u swika na ṋamusi.
9 Nga ḓuvha ḽeneḽo Davida a ofha Yehova,+ a ri: “Mbulungelo ya Yehova i nga ḓiswa hani kha nṋe?”+
10 Davida o vha a si tsha ṱoḓa u ḓisa Mbulungelo ya Yehova hune a dzula hone Muḓini wa Davida.+ Nṱhani hazwo Davida a ita uri i iswe nḓuni ya Obede-edomo+ wa Mugathi.
11 Mbulungelo ya Yehova ya fhedza miṅwedzi miraru i nḓuni ya Obede-edomo wa Mugathi, Yehova a bvela phanḓa a tshi fhaṱutshedza Obede-edomo na muṱa wawe woṱhe.+
12 Khosi Davida a vhigelwa u pfi: “Yehova o fhaṱutshedza muṱa wa Obede-edomo na zwoṱhe zwine zwa vha zwawe nga nṱhani ha Mbulungelo ya Mudzimu wa ngoho.” Davida a ya a dzhia Mbulungelo ya Mudzimu wa ngoho nḓuni ya Obede-edomo a i ḓisa Muḓini wa Davida a tshi khou pembela.+
13 Musi vhahwali+ vha Mbulungelo ya Yehova vho no tshimbila maga a rathi, Davida a ṱavhanya a ṋekedza tshiṱhavhelo tsha mboho na ṋamana yo nonaho.
14 Davida a tshina phanḓa ha Yehova nga nungo dzawe dzoṱhe; Davida o ambara efodo* ya ḽinene.+
15 Davida na vhoṱhe vha nnḓu ya Isiraele vho vha vha tshi khou ḓisa Mbulungelo+ ya mulanga wa Yehova vha tshi khou pembela,+ vha tshi khou lidza ṋanga.+
16 Musi Mbulungelo ya Yehova i tshi swika Muḓini wa Davida, Mihali+ ṅwananyana wa Saulo a ṱolela nga fasiṱere a vhona Khosi Davida a tshi khou fhufha-fhufha a tshi tshina phanḓa ha Yehova; a thoma u mu nyadza mbiluni yawe.+
17 Vha ḓisa Mbulungelo ya Yehova ya mulanga, vha i vhea vhudzuloni hayo nga ngomu denndeni ḽe Davida a ḽi athela yone.+ Davida a ṋekedza zwifhiwa zwa u fhiswa+ na zwiṱhavhelo zwa u pfumedzana+ phanḓa ha Yehova.+
18 Musi Davida a tshi fhedza u ṋekedza zwifhiwa zwa u fhiswa na zwiṱhavhelo zwa u pfumedzana, a fhaṱutshedza vhathu dzinani ḽa Yehova wa mavhuthu.
19 Zwiṅwe hafhu, a ṋea Vhaisiraele vhoṱhe, munna muṅwe na muṅwe na mufumakadzi muṅwe na muṅwe ḽofo* ya vhurotho, khekhe ya mitshelo ya mutshevho na khekhe i re na nḓirivhe, nga murahu vhathu vhoṱhe vha ṱuwa, muṅwe na muṅwe a vhuyelela nḓuni yawe.
20 Musi Davida a tshi vhuya u fhaṱutshedza vha muṱa wawe, Mihali ṅwana wa Saulo+ a bva a mu ṱanganedza. A ri: “Khosi ya Isiraele yo ḓinyadzisa musi i tshi ḓiṱana ṋamusi phanḓa ha vhafumakadzi vha dziphuli vha vhashumeli vhayo, u fana na tsilu ḽi tshi ḓiṱana khagala!”+
21 Davida a amba na Mihali a ri: “Ndo vha ndi tshi khou pembela phanḓa ha Yehova, we a nanga nṋe a litsha khotsi au na vha nnḓu yawe yoṱhe, a nanga nṋe uri ndi range phanḓa vhathu vha Yehova vha Isiraele.+ Ngauralo, ndi ḓo pembela phanḓa ha Yehova,
22 ndi ḓo ḓiṱukufhadza u fhira zwenezwi, nda ḓidzhia ndi tshi nyadzea. Fhedzi ndi ḓo huliswa nga vhafumakadzi vha dziphuli vhe wa amba nga havho.”
23 Mihali+ ṅwana wa Saulo ho ngo vha na vhana u swika a tshi fa.
Ṱhaluso dzi re magumoni a siaṱari
^ Kana khamusi, “vhukati.”
^ Kana “luvhatani.”
^ Sedzani Mutevhe Wa Ṱhalutshedzo Ya Maipfi.
^ Yeneyi ḽofo yo vha i na buli vhukati.
