Vhahaṱuli 2:1-23
2 Muruṅwa wa Yehova+ a bva Giligala+ a ya Bokime, a ri: “Ndo ni bvisa Egipita nda ni ḓisa shangoni ḽe nda anela vhomakhulukuku waṋu.+ Zwiṅwe hafhu, ndo ri: ‘Ndi nga si vhuye nda pfuka mulanga wanga we nda u vhofha na inwi.+
2 Ni songo vhofha mulanga na vhadzulapo vha heḽi shango,+ ni thuthe aḽeṱare dzavho.’+ Fhedzi inwi a no ngo nthetshelesa.+ No zwi itela mini?
3 Ndi ngazwo ndo dovha nda ri: ‘Ndi nga si ḓo vha pandela phanḓa haṋu,+ vha ḓo vha zwikwekwe kha inwi,+ midzimu yavho i ḓo ni ungeledza.’”+
4 Musi muruṅwa wa Yehova o no fhedza u amba na Vhaisiraele vhoṱhe eneo mafhungo, vhathu vha thoma u vusa tshililo tshihulu.
5 Ngauralo, vha ri henefho fhethu hu pfi Bokime,* henefho vha itela Yehova zwiṱhavhelo.
6 Musi Yoshua a tshi litsha vhathu vha tshi ṱuwa, Muisiraele muṅwe na muṅwe a ya kha shango ḽe a kovhelwa ḽone.+
7 Vhathu vha bvela phanḓa vha tshi shumela Yehova misini yoṱhe ya Yoshua na ya vhahulwane vhe Yoshua a vha sia vha tshi kha ḓi tshila na vhe vha vhona mishumo mihulu yoṱhe ya Yehova ye a i itela Vhaisiraele.+
8 Yoshua murwa wa Nunu, mushumeli wa Yehova, o fa e na miṅwaha ya 110.+
9 Ngauralo, vha mu vhulunga shangoni ḽa ifa ḽawe ngei Thiminatha-herese,+ hune ha vha dzinguni ḽa thavhani dza Efuraimi, devhula ha Thavha ya Gaasi.+
10 Murafho wonoyo woṱhe wa fa wa vhulungwa na vhomakhulukuku wawo, muṅwe murafho we wa tevhela wo vha u sa ḓivhi Yehova kana zwe a zwi itela Vhaisiraele.
11 Vhaisiraele vha ita zwi sa takadzi Yehova, vha shumela* Vhobaali.+
12 Vha laṱa Yehova Mudzimu wa vhokhotsi avho we a vha bvisa shangoni ḽa Egipita.+ Vha tevhela miṅwe midzimu ya vhathu vhane vha dzula navho,+ vha i gwadamela vha sinyusa Yehova.+
13 Vha laṱa Yehova vha shumela Baali na zwifanyiso zwa Asiterothe.+
14 Yehova a sinyutshela Vhaisiraele, a vha kumedzela zwanḓani zwa mavemu e a vha thuba.+ A vha kumedzela zwanḓani zwa maswina o vha tangaho,+ vha si tsha kona u lwa na maswina avho.+
15 Tshifhinga tshoṱhe musi vha tshi ya u lwa, Yehova o vha a sa imi navho a tshi vha ḓisela khombo,+ ha itea zwe Yehova a amba na zwe Yehova a vha anela,+ vho vha vho tsikeledzea zwihulu.+
16 Ngauralo, Yehova a vha ṋea vhahaṱuli vhane vha ḓo vha tshidza zwanḓani zwa mavemu.+
17 Fhedzi vho hana na u thetshelesa vhahaṱuli vhavho, vha ita vhupombwe na miṅwe midzimu vha i gwadamela. Vho ṱavhanya vha pambuwa kha nḓila ye vhomakhulukuku wavho vha vha vho fara yone, vhe vha thetshelesa ndaela dza Yehova.+ Vho vha vha sa fani na vhomakhulukuku wavho.
18 Musi Yehova a tshi vha ṋea vhahaṱuli,+ Yehova o vha a tshi ima na onoyo muhaṱuli, a vha tshidza zwanḓani zwa maswina avho misini yoṱhe ya muhaṱuli; ngauri Yehova o vha a tshi vha pfela vhuṱungu+ musi a tshi vhona vha tshi khou tambudzwa nga vhatsikeledzi vhavho+ na vhane vha vha fara luvhi.
19 Musi onoyo muhaṱuli a tshi fa, vho vha vha tshi dovha vha humela kha nḓila mmbi dza vhokhotsi avho vha tevhela miṅwe midzimu, vha i shumela vha i gwadamela.+ A vho ngo laṱa nḓila dzavho na swili yavho.
20 Mafheleloni Yehova a sinyutshela Vhaisiraele,+ a ri: “Ngauri holwu lushaka lwo pfuka mulanga+ we nda u vhofha na vhomakhulukuku walwo, a lwo ngo nthetshelesa,+
21 na nṋe ndi nga si pandele na lushaka na luthihi kha dzenedzi tshaka dze Yoshua a dzi sia musi a tshi fa.+
22 Hezwi ndi u itela u linga Vhaisiraele arali vha tshi ḓo fara nḓila ya Yehova+ u fana na vhokhotsi avho.”
23 Nga zwenezwo, Yehova a litsha dzenedzo tshaka. Ho ngo dzi pandela nga u ṱavhanya, ho ngo dzi kumedzela zwanḓani zwa Yoshua.
