Dotoronomio 28:1-68
28 “Arali wa thetshelesa zwine Yehova Mudzimu wau a zwi amba wa tevhedza nga vhuronwane ndaela dzawe dzoṱhe dzine nda khou u ṋea dzone ṋamusi, Yehova Mudzimu wau u ḓo u hulisa kha dziṅwe tshaka dzoṱhe dza kha ḽifhasi.+
2 Iwe u ḓo wana dzenedzi phaṱhutshedzo dzoṱhe,+ arali wa dzula u tshi thetshelesa zwine Yehova Mudzimu wau a zwi amba:
3 “U ḓo fhaṱutshedzwa muḓini, wa dovha wa fhaṱutshedzwa na masimuni.+
4 “Hu ḓo fhaṱutshedzwa vhana vhau,+ zwibveledzwa zwa mavuni au, zwo dzwalwaho nga zwifuwo zwau na ṋamana na ngwana dzau.+
5 “Hu ḓo fhaṱutshedzwa manngi wau+ na tshigoḓelo tshau tsha u sukela fuḽauru.+
6 “U ḓo fhaṱutshedzwa musi u tshi dzhena na musi u tshi bva.
7 “Yehova u ḓo ita uri maswina ane a lwa na iwe a kundwe u tshi zwi vhona.+ A tshi ḓa u u vutshela a ḓo ḓa nga nḓila nthihi, fhedzi a tshi u shavha a ḓo fara nḓila dza sumbe dzo fhambanaho.+
8 Yehova u ḓo fhaṱutshedza maḓulu au+ na zwoṱhe zwine wa ita, u ḓo u fhaṱutshedza shangoni ḽine Yehova Mudzimu wau a ḓo u ṋea ḽone.
9 Yehova u ḓo ni ita vhathu vhakhethwa khae,+ sa zwe a ni anela,+ ngauri ni bvela phanḓa ni tshi tevhedza ndaela dza Yehova Mudzimu waṋu na tshimbila nḓilani dzawe.
10 Vhathu vhoṱhe kha ḽifhasi vha ḓo vhona uri dzina ḽa Yehova ḽi a vhidzelelwa vhukati haṋu,+ vha ni ofha.+
11 “Yehova u ḓo ita uri u vhe na vhana vhanzhi, zwifuwo zwinzhi na mavu o nonaho kha shango+ ḽe Yehova a anela vhomakhulukuku wau uri u ḓo u ṋea ḽone.+
12 Yehova u ḓo u vulela ḓulu ḽawe ḽavhuḓi, ḽi re ṱaḓulu, a nisela shango ḽau mvula nga tshifhinga tshayo+ na u fhaṱutshedza zwoṱhe zwine wa zwi ita. U ḓo hadzimisa dzitshaka nnzhi, ngeno zwi sa ḓo ṱoḓea uri u hadzime.+
13 Yehova u ḓo u ita uri u vhe ṱhoho, hu si mutshila; iwe u ḓo fhira vhaṅwe,+ a vha nga u fhiri, arali wa bvela phanḓa u tshi tevhedza ndaela dza Yehova Mudzimu wau, dzine nda khou u laya ṋamusi uri u dzi tevhedze.
14 U songo pambuwa kha zwoṱhe zwine nda khou u laya ṋamusi, wa pambutshela kha tsha u ḽa kana kha tsha monde,+ wa tevhela miṅwe midzimu u itela u i shumela.+
15 “Fhedzi arali wa sa thetshelesa zwine Yehova Mudzimu wau a zwi amba nga u tevhedza ndaela dzawe dzoṱhe na maitele awe ane nda khou u ṋea one ṋamusi, masamba ane a ḓo u ḓela ndi haya:+
16 “U ḓo semiwa muḓini, wa dovha wa semiwa na masimuni.+
17 “Hu ḓo semiwa manngi wau+ na tshigoḓelo tshau tsha u sukela fuḽauru.+
18 “Hu ḓo semiwa vhana vhau,+ zwibveledzwa zwa mavuni au, zwo dzwalwaho nga zwifuwo zwau na ṋamana na ngwana dzau.+
19 “U ḓo semiwa musi u tshi dzhena na musi u tshi bva.
20 “Yehova u ḓo u ḓisela samba, u hanganea na u u pfisa vhuṱungu kha zwoṱhe zwine wa lingedza u zwi ita, u swika u tshi fheliswa tshoṱhe nga u ṱavhanya, nga nṱhani ha mishumo yau mivhi na nge wa nndaṱa.+
21 Yehova u ḓo ita uri u lwale u swika u tshi fheliswa shangoni ḽine wa ḓo ḽi dzhia.+
22 Yehova u ḓo u rwa nga lufhiha, mukhushwane,+ u zwimba, biso, banga,+ mufhiso u tshinyadzaho na muunda,+ zwi ḓo u tambudza u swika u tshi fa.
23 Lutombo lune lwa vha nṱha ha ṱhoho yau lu ḓo vha koporo, ḽifhasi ḽine ḽa vha nga fhasi hau ḽa vha tsimbi.+
24 Yehova u ḓo ita uri mvula ya shangoni ḽau i vhe muṱavha na buse zwine zwa ḓo u nela zwi tshi bva ṱaḓulu u swika u tshi fheliswa.
25 Yehova u ḓo ita uri u kundwe nga maswina au.+ U tshi ya u lwa nao u ḓo ya nga nḓila nthihi, fhedzi u tshi shavha u ḓo fara nḓila dza sumbe dzo fhambanaho; mivhuso yoṱhe ya kha ḽifhasi i ḓo tshuwa musi i tshi pfa zwithu zwivhi zwe zwa itea kha iwe.+
26 Zwitumbu zwaṋu zwi ḓo vha zwiḽiwa zwa zwiṋoni zwoṱhe na zwivhanda zwoṱhe zwa kha ḽifhasi, hu si na ane a zwi pandela.+
27 “Yehova u ḓo u ḓisela zwilonda zwa Egipita, zwizwimbo kha pfuralelo, phaḓi na zwilonda, zwi sa ilafhei.
28 Yehova u ḓo ita uri u penge, u si tsha vhona,+ u hanganee.
29 U ḓo phuphuledza nga masiari, vhunga muthu a sa vhoni a tshi phuphuledza swiswini,+ a u nga bveleli kha tshiṅwe na tshiṅwe tshine wa ḓo tshi ita; u ḓo dzulela u fhurwa na u dzhielwa thundu, hu si na ane a u lamulela.+
30 U ḓo fhulufhedzisa u vhinga mufumakadzi, fhedzi muṅwe munna a mu tzhipa. U ḓo fhaṱa nnḓu, fhedzi a u nga dzuli khayo.+ U ḓo lima tsimu ya minḓirivhe fhedzi u sa ḽe mitshelo yayo.+
31 Mboho yau i ḓo ṱhavhiwa u tshi zwi vhona, fhedzi a u nga ḽi ṋama yayo. Donngi yau i ḓo tswiwa u tshi zwi vhona, fhedzi a i nga vhuyi kha iwe. Nngu yau i ḓo ṋewa maswina au, fhedzi a u nga vhi na mulamuleli.
32 Vharwa vhau na vhananyana vhau vha ḓo ṋewa vhaṅwe vhathu+ wo lavhelesa, u ḓo dzula wo lavhelela uri vha vhuye, fhedzi a u nga koni u ita tshithu.
33 Mitshelo yau na zwibveledzwa zwau zwoṱhe zwi ḓo ḽiwa nga vhathu vhane u si vha ḓivhe,+ u ḓo dzulela u fhurwa na u tsikeledzwa.
34 Zwine wa zwi vhona zwi ḓo ita uri u penge.
35 “Yehova u ḓo u rwa nga zwilonda zwi vhavhaho na zwi sa ilafhei kha magona na kha milenzhe, u bva ṋayoni u swika ṱhohoni.
36 Yehova u ḓo pandela iwe na khosi ye wa ḓivhetshela yone a ni isa kha lushaka lune iwe na vhomakhulukuku wau ni si lu ḓivhe,+ henefho iwe u ḓo shumela miṅwe midzimu ya thanda na ya tombo.+
37 Musi u tshi swika fhethu he Yehova a u isa hone, zwithu zwe zwa itea kha iwe zwi ḓo ita uri vhathu vhoṱhe vha henefho vha ofhe. Vha ḓo u nyadza na u u goḓa.+
38 “Iwe u ḓo zwala mbeu nnzhi tsimuni, fhedzi u ḓo kaṋa zwiṱuku,+ ngauri zwi ḓo ḽiwa nga nzie.
39 Iwe u ḓo lima masimu a minḓirivhe na u a ṱahulela, fhedzi a u nga nwi waini, a u nga kaṋi tshithu,+ ngauri i ḓo ḽiwa nga tshivhungu.
40 Iwe u ḓo vha na miṱwari shangoni ḽau ḽoṱhe, fhedzi iwe a u nga ḓoli mapfura ayo, ngauri ṱhwari dzau dzi ḓo moḓa.
41 Iwe u ḓo beba vharwa na vhananyana, fhedzi a vha nga vhi vhau, ngauri vha ḓo thubiwa.+
42 Miri yau yoṱhe na mitshelo zwi ḓo ḽiwa nga zwikhokhonono.
43 Mutsinda a re vhukati hau u ḓo dzula a tshi bvelela u u fhira, ngeno iwe u tshi ḓo dzula u sa bveleli.
44 Ene u ḓo u hadzima, fhedzi iwe a u nga mu hadzimi.+ Ene u ḓo vha ṱhoho, ngeno iwe u tshi ḓo vha mutshila.+
45 “Enea masamba+ oṱhe a ḓo u ḓela u vhuya u swika u tshi fheliswa,+ ngauri a wo ngo thetshelesa Yehova Mudzimu wau nga u tevhedza ndaela dzawe na milayo yawe ye a u laya.+
46 Eneo masamba a ḓo dzula e tshiga na vhuṱolo kha iwe na vhana vhau lini na lini,+
47 nga nṱhani ha uri a wo ngo shumela Yehova Mudzimu wau wo takala na nga mbilu tshena musi wo ḓalelwa nga zwithu zwoṱhe.+
48 Yehova u ḓo rumela maswina au uri a lwe na iwe, u ḓo a shumela+ u na nḓala,+ u na ḓora, u si na zwiambaro, u tshi shaya zwoṱhe. Mudzimu u ḓo vhea dzhogo ya tsimbi mutsingani wau u swika u tshi fheliswa.
49 “Yehova u ḓo u rambela luṅwe lushaka lwa kule uri lu lwe na iwe,+ lu bvaho magumoni a ḽifhasi, lu ḓo u vutshela nga luvhilo sa goni,+ lushaka lune wa sa ḓo pfesesa luambo lwalwo,+
50 lushaka lwa tshiṱuhu, lune lwa sa ḓo khathutshela muhulwane kana muṱuku.+
51 Lu ḓo ḽa zwo dzwalwaho nga zwifuwo zwau na mitshelo yau u swika u tshi fheliswa. A lu nga ḓo sia thoro, waini ntswa, mapfura, ṋamana kana ngwana yau, u swika lu tshi u fhelisa.+
52 Lu ḓo u tanga, lwa u valela nga ngomu ha miḓi* yau shangoni ḽau ḽoṱhe, u swika mbondo dzau khulwane dze wa dzi fhulufhela dzi tshi wa. Lu ḓo u tanga lwa u valela nga ngomu miḓini yau shangoni ḽau ḽoṱhe, ḽe Yehova Mudzimu wau a u ṋea ḽone.+
53 Nga zwenezwo, u ḓo ḽa ṋama ya vharwa vhau na ya vhananyana vhau,+ vhe Yehova Mudzimu wau a u ṋea vhone, nga nṱhani ha u tingiwa honohu hu vhavhaho na u tsikeledzwa nga swina ḽau.
54 “Na munna mutete wa mbilu ya khathutshelo ha nga ḓo pfela wahawe vhuṱungu, mufumakadzi wawe ane a mu funa, kana vhana vhawe vho salaho,
55 ha nga ḓo kovhekana navho ṋama ya muṅwe wa vhana vhawe vhane a ḓo vha ḽa, ngauri u ḓo vha a si tshee na zwiṅwe zwiḽiwa nga nṱhani ha u tingiwa honohu hu vhavhaho na u tsikeledzwa nga swina ḽau miḓini yau.+
56 Na mufumakadzi mutete wa mbilu ya khathutshelo vhukati hau ane a si vhuye a humbula na u kanda fhasi ngauri u mutete,+ a nga si pfele vhuṱungu munna wawe ane a mu funa, murwa wawe kana ṅwananyana wawe,
57 ngauri a nga si ṱoḓe u vha ṋea ṋama naho i ifhio ya vhana vhawe vhane a ḓo vha beba na zwine zwa bva thumbuni yawe nga murahu ha u beba. U ḓo ḽa zwenezwo zwoṱhe o dzumbama nga nṱhani ha u tingiwa honohu hu vhavhaho na u tsikeledzwa nga swina ḽau miḓini yau.
58 “Arali wa sa tevhedza nga vhuronwane maipfi oṱhe a wonoyu Mulayo wo ṅwaliwaho kha yeneyi bugu,+ u si ofhe heḽi dzina ḽa vhugala na ḽi ofhisaho+ ḽa Yehova+ Mudzimu wau,
59 Yehova u ḓo u rwa nga ṱhamu na vhana vhau, ṱhamu khulu i sa ṱavhanyi u fhela,+ na malwadze a ofhisaho a sa fholi.
60 Ene u ḓo u ḓisela malwadze oṱhe a Egipita, e wa vha u tshi a ofha, a ḓo u nambatela.
61 Zwiṅwe hafhu, Yehova u ḓo dovha a u ḓisela vhulwadze vhuṅwe na vhuṅwe kana ṱhamu i songo ṅwaliwaho kha heyi bugu ya Mulayo, u swika u tshi fheliswa.
62 Naho no vha no anda sa ṋaledzi dza ṱaḓulu,+ hu ḓo sala vha si gathi vhaṋu,+ ngauri a no ngo thetshelesa zwe Yehova Mudzimu waṋu a amba.
63 “U fana na musi Yehova o vhuya a takalela u ita uri u bvelele na u u andisa, Yehova u ḓo takalela u u fhelisa; iwe u ḓo bviswa shangoni ḽine ḽa ḓo vha ḽau.
64 “Yehova u ḓo u balanganyela kha tshaka dzoṱhe u bva magumoni a ḽifhasi u ya kha maṅwe magumo a ḽifhasi,+ henengei u ḓo shumela miṅwe midzimu ya thanda na ya matombo, ine iwe na vhomakhulukuku wau ni si i ḓivhe.+
65 U nga si vhe na mulalo vhukati ha dzenedzo tshaka,+ kana u vha na hune mulenzhe wau wa ḓo kanda hone. Yehova u ḓo ita uri u ofhe,+ maṱo au a nete, u fhulufhuwe.+
66 Vhutshilo hau vhu ḓo vha khomboni, u ḓo dzula u tshi ofha vhusiku na masiari; a u nga ḓivhi arali u tshi ḓo ponyoka.
67 Nga matsheloni u ḓo ri, ‘Ngavhe ḽi tshi kovhela!’ musi ḽo no kovhela u ḓo ri, ‘Ngavhe ḽi tshi tsha!’ nga nṱhani ha nyofho na zwine wa ḓo zwi vhona.
68 Yehova u ḓo u humisela Egipita nga tshikepe fhethu he a amba uri, ‘A u tsha ḓo dovha wa hu vhona.’ Musi u tshi swika henefho, u ḓo ḓirengisa kha maswina au wa vha phuli, fhedzi a hu na ane a ḓo u renga.”
Ṱhaluso dzi re magumoni a siaṱari
^ Thevhedz., “khoro.”
