Nzumbululo I Yaho Kha Yohane 16:1-21
16 Nda pfa ipfi ḽihulu ḽi bvaho fhethu hukhethwa+ ḽi tshi amba na vharuṅwa vha sumbe ḽi tshi ri: “Iyani ni tevhulele zwigoḓelo zwa sumbe zwa mbiti dza Mudzimu kha ḽifhasi.”+
2 Muruṅwa wa u thoma a tevhulela tshigoḓelo tshawe kha ḽifhasi.+ Vhathu vha re na luswayo lwa tshivhanda+ na vhe vha rabela tshifanyiso+ tshatsho vha bva zwilonda+ zwi sa fholi.
3 Wa vhuvhili a tevhulela tshigoḓelo tshawe lwanzheni.+ Lwa shanduka lwa nga malofha+ o kheṱhaho a muthu o faho, zwoṱhe zwi tshilaho zwi re lwanzheni zwa fa.+
4 Wa vhuraru a tevhulela tshigoḓelo tshawe milamboni na zwisimani,+ zwa vha malofha.+
5 Nda pfa muruṅwa a langaho maḓi a tshi ri: “Iwe u Mudzimu a fhulufhedzeaho,+ we a vha e hone na a re hone,+ wo haṱula nga yeneyo nḓila ngauri wo luga.+
6 Zwo tea uri u nwise+ vhenevho vhathu malofha ngauri vho shulula malofha a vhakhethwa na a vhaporofita.”+
7 Nda pfa ipfi ḽi bvaho kha aḽeṱare ḽi tshi ri: “Yehova* Mudzimu Ramaanḓaoṱhe,+ khaṱhulo dzau ndi dza ngoho, dzo luga.”+
8 Wa vhuṋa a tevhulela tshigoḓelo tshawe kha ḓuvha,+ ḓuvha ḽa ṋewa maanḓa a u fhisa vhathu nga mulilo.
9 Vhathu vha swa nga mufhiso muhulu, fhedzi vha si rembuluwe, vha sema dzina ḽa Mudzimu; vha si ṋee vhugala Mudzimu a re na maanḓa a u ita uri dzenedzo ṱhamu dzi vhe hone.
10 Wa vhuṱanu a tevhulela tshigoḓelo tshawe kha khuluṋoni ya tshivhanda. Zwoṱhe zwine tsha zwi vhusa zwa swifhala,+ vhathu vha shengekanya maṋo nga u pfa vhuṱungu,
11 fhedzi vha si rembuluwe kha mishumo yavho mivhi, vha sema Mudzimu wa ṱaḓulu nge vha pfa vhuṱungu na u pfa u vhavha nga nṱhani ha zwilonda.
12 Wa vhurathi a tevhulela tshigoḓelo tshawe mulamboni muhulu wa Yufuratha,+ maḓi awo a xa,+ uri hu lugiselelwe nḓila ya mahosi+ a bvaho vhubvaḓuvha.
13 Nda vhona mulomoni wa ḽigweṋa+ na wa tshivhanda na wa muporofita wa mazwifhi hu tshi bva mimuya miraru mivhi i ngaho zwiḓula i re na tshika.
14 Yeneyi mimuya mivhi ndi madimoni, a ita vhuṱolo,*+ a ya kha mahosi a ḽifhasi ḽoṱhe, a a kuvhanganyela nndwani+ ya ḓuvha ḽihulu ḽa Mudzimu Ramaanḓaoṱhe.+
15 “Ndi khou ḓa sa mbava.+ Hu takala ane a dzula o fhaṱuwa+ uri a si dzhielwe zwiambaro zwawe, a sa ḓo tshimbila e fhedzi a vho shona vhukati ha vhathu.”+
16 Eneo madimoni a kuvhanganyela mahosi fhethu hune nga Tshihevheru ha pfi Haramagedo.*+
17 Muruṅwa wa vhusumbe a tevhulela tshigoḓelo tshawe muyani. Ha pfala ipfi ḽi bvaho kha khuluṋoni fhethu hukhethwa,+ ḽi tshi ri: “Zwo fhela!”
18 Ha vha na dziphenyo na mibvumo, nda pfa na maipfi, ha vha na mudzinginyo muhulu vhukuma, u sa athu u vhuya wa vha hone u bva tshee vhathu vha sikwa kha ḽifhasi.+
19 Muḓi muhulu+ wa fhanduwa wa bva zwipiḓa zwiraru, ha wa miḓi ya vhathu vha dzitshaka; Mudzimu a humbula u nwisa Babele Ḽihulu+ tshinwelo tsha waini ya vhuhali ha mbiti dzawe.+
20 Zwiṅwe hafhu, zwiṱangadzime zwoṱhe zwa ngalangala na thavha dzi si tsha wanala.+
21 Vhathu vha welwa nga matombo mahulu a tshifhango a bvaho ṱaḓulu,+ ane tshileme tshao tsha lingana na talente,* fhedzi vha sema Mudzimu nga nṱhani ha tshenetsho tshifhango+ ngauri tsho tshinyadza zwihulu.
Ṱhaluso dzi re magumoni a siaṱari
^ Thevhedz., “zwiga.”
^ Nga Tshigerika ndi Harmagedon, ḽine ḽa bva kha ipfi ḽa Tshihevheru ḽine ḽa amba uri “Thavha Ya Megiddo.”
^ Talente ya Gerika i lingana na khilogramu dza 20,4. Sedzani Ṱhume. B14.
