Nzumbululo I Yaho Kha Yohane 3:1-22
3 “Ṅwalela muruṅwa wa tshivhidzo tsha Saradesi uri: A re na mimuya ya Mudzimu ya sumbe+ na ṋaledzi dza sumbe,+ u ri: ‘Ndi a ḓivha mishumo yau, u nga u a tshila, fhedzi wo fa.+
2 Fhaṱuwa,+ u khwaṱhise zwi re tsini na u fa, ngauri a u iti zwoṱhe zwine Mudzimu wanga a ṱoḓa u tshi zwi ita.
3 U songo hangwa zwe wa zwi wana na u zwi pfa, u dzule u tshi zwi tevhedza, u rembuluwe.+ Arali wa sa fhaṱuwa, ndi ḓo ḓa sa mbava+ nga tshifhinga tshine wa sa tshi ḓivhe.+
4 “‘Naho zwo ralo, hu na vhaṅwe vha si gathi henefho Saradesi vha songo tshikafhadzaho zwiambaro zwavho,+ vha ḓo tshimbila na nṋe vho ambara zwiambaro zwitshena,+ ngauri zwo vha tea.
5 Ane a kunda+ u ḓo ambadzwa zwiambaro zwitshena,+ a thi nga thuthi* dzina ḽawe kha bugu ya vhutshilo,+ ndi ḓo amba uri ndi a ḓivha dzina ḽawe phanḓa ha Khotsi anga na vharuṅwa vhawe.+
6 A re na nḓevhe nga a pfe zwine muya mukhethwa wa vhudza zwivhidzo.’
7 “Ṅwalela muruṅwa wa tshivhidzo tsha Filadelefia uri: Ane a vha mukhethwa+ wa ngoho,+ a re na khii ya Davida,+ ene ane a vula hu si vhe na ane a vala, ane a vala hu si vhe na ane a vula, u ri:
8 ‘Ndi a ḓivha mishumo yau. Ndo u vulela muṋango,+ une hu si vhe na ane a nga u vala. Ndi a ḓivha uri a u na nungo, wo ita zwe nda amba, wo dzula u tshi fhulufhedzea kha nṋe.*
9 Ndi ḓo ita uri vha sinagogo ya Saṱhane vha ḓe vha gwadame* milenzheni yau, nda ita uri vha ḓivhe uri ndi a u funa. Vhenevho vha a zwifha, vha ḓiita Vhayuda ngeno vhe si Vhayuda.+
10 Ngauri wo konḓelela+ u fana na nṋe,* ndi ḓo u tsireledza nga tshifhinga tsha mulingo+ tshine tsha ḓo ḓa ḽifhasini ḽoṱhe, uri hu lingwe vho dzulaho kha ḽifhasi.
11 Ndi khou ḓa nga u ṱavhanya.+ Dzula wo farelela zwine wa vha nazwo, uri hu si vhe na ane a u dzhiela khare yau.+
12 “‘Ane a kunda ndi ḓo mu ita phuphu thembeleni ya Mudzimu wanga, u ḓo dzula e khayo, ndi ḓo mu ṅwala dzina ḽanga ḽiswa,+ ḽa Mudzimu+ na ḽa muḓi wa Mudzimu, une wa vha muḓi Muswa wa Yerusalema+ u bvaho ṱaḓulu kha Mudzimu.
13 A re na nḓevhe nga a pfe zwine muya mukhethwa wa vhudza zwivhidzo.’
14 “Ṅwalela muruṅwa wa tshivhidzo tsha Laodikea+ uri: Amen+ ane a vha ṱhanzi+ i fhulufhedzeaho na ya ngoho,+ wa u thoma u sikwa nga Mudzimu,+ u ri:
15 ‘Ndi a ḓivha mishumo yau, a u rotholi kana u fhisa. Ndi tama wo vha u tshi rothola kana u tshi fhisa.
16 Ndi ḓo u pfela kule ngauri u a dudela, a u fhisi+ kana u rothola.+
17 Ngauri u ri, “Ndo pfuma,+ ndo kuvhanganya lupfumo, a hu na tshine nda tshi shaya,” fhedzi a wo ngo takala, u a pfisa vhuṱungu, u mushai, a u vhoni, a wo ngo ambara,
18 ndi khwine u tshi ḓa kha nṋe wa renga musuku wo kunakiswaho nga mulilo uri u kone u pfuma, u renge na zwiambaro zwitshena u ambare uri u si shone,+ u renge na mushonga wa maṱo+ uri u kone u vhona.+
19 “‘Vhoṱhe vhane nda vha funa ndi a vha kaidza na u vha laya.+ Ngauralo, rembuluwa+ kha zwivhi zwau, u shumele Mudzimu nga mbilu yoṱhe.
20 Ndo ima muṋangoni ndi khou khokhonya. Ane a pfa ipfi ḽanga a mvulela vothi, ndi ḓo dzhena nḓuni yawe ra ḽa tshilalelo.
21 Ane a kunda+ ndi ḓo mu tendela uri a dzule na nṋe kha khuluṋoni yanga,+ samusi na nṋe ndo kunda nda dzula+ na Khotsi anga kha khuluṋoni yawe.
22 A re na nḓevhe nga a pfe zwine muya mukhethwa wa vhudza zwivhidzo.’”
Ṱhaluso dzi re magumoni a siaṱari
^ Kana “phumuli.”
^ Thevhedz., “dzina ḽanga.”
^ Kana “loshe.”
^ Kana khamusi, “wo edzisa tsumbo yanga ya u konḓelela.”
