Nzumbululo I Yaho Kha Yohane 5:1-14
5 Nda vhona Mudzimu o dzula kha khuluṋoni,+ tshanḓani tshawe tsha u ḽa hu na mupombo wo ṅwaliwaho thungo dzoṱhe, wo valiwa wa nambatedzwa zwiganḓo zwa sumbe.
2 Nda vhona muruṅwa a re na maanḓa a tshi khou vhidzelela a tshi ri: “Ndi nnyi ane a fanelea u vula mupombo na u bvisa zwiganḓo zwawo?”
3 Fhedzi ho vha hu si na muthu ṱaḓulu kana kha ḽifhasi kana nga fhasi ha mavu we a vha a tshi nga kona u vula mupombo kana u u vhala.
4 Nda lila zwihulu ngauri ho vha hu si na ane a fanelea u vula mupombo kana u u vhala.
5 Fhedzi muṅwe wa vhahulwane a amba na nṋe a ri: “U songo lila. Ndau ya lushaka lwa Yuda,+ ya lushaka*+ lwa Davida,+ yo kunda+ uri i kone u vula mupombo na zwiganḓo zwawo zwa sumbe.”
6 Nda vhona ngwana+ i tshi nga yo ṱhavhiwa,+ yo ima vhukati ha khuluṋoni na vhukati ha zwivhumbiwa zwiṋa zwi tshilaho na vhukati ha vhahulwane,+ i na ṋanga dza sumbe na maṱo a sumbe, eneo maṱo a imela mimuya ya Mudzimu ya sumbe+ yo rumiwaho ḽifhasini ḽoṱhe.
7 Ngwana ya ḓa kha Mudzimu we a vha o dzula kha khuluṋoni+ ya dzhia mupombo tshanḓani tshawe tsha u ḽa.
8 Musi Ngwana yo no dzhia mupombo, zwivhumbiwa zwiṋa zwi tshilaho na vhahulwane vha 24+ vha gwadama phanḓa hayo, vhoṱhe vhe na haripa na tshigoḓelo tsha musuku tsho ḓalaho nga zwioro. (Zwioro zwi imela thabelo dza vhakhethwa.)+
9 Vha imba luimbo luswa,+ vha ri: “Wo fanelwa nga u dzhia mupombo na u bvisa zwiganḓo zwawo, ngauri wo ṱhavhiwa, wa rengulula vhathu vha Mudzimu+ nga malofha au. Vhenevho vha bva kha tshaka dzoṱhe na ndimi* dzoṱhe,+
10 wo vha ita mahosi+ na vhotshifhe vha Mudzimu washu,+ vha ḓo vhusa ḽifhasi.”+
11 Nda vhona na u pfa maipfi a vharuṅwa vhanzhi vho tangaho khuluṋoni na zwivhumbiwa zwi tshilaho na vhahulwane, vha zwigidi zwa fumi* zwi tshi andiswa nga zwigidi zwa fumi na zwigidi na zwigidi,+
12 vha tshi khou huwelela vha tshi ri: “Ngwana yo ṱhavhiwaho+ yo fanelwa nga u ṋewa maanḓa, lupfumo, vhuṱali, nungo, u huliswa, vhugala na u fhaṱutshedzwa.”+
13 Nda pfa zwivhumbiwa zwoṱhe zwi re ṱaḓulu na kha ḽifhasi na fhasi ha mavu+ na lwanzheni, zwoṱhe zwi tshi ri: “Mudzimu o dzulaho kha khuluṋoni+ na Ngwana,+ ndi vhone vho fanelwaho nga u fhaṱutshedzwa, u huliswa,+ u ṋewa vhugala na maanḓa lini na lini.”+
14 Zwivhumbiwa zwiṋa zwi tshilaho zwa ri: “Amen!” Vhahulwane vha gwadama vha rabela.
