Kha Vhahevheru 5:1-14
5 Ane a nangwa uri a vhe tshifhe muhulu, u shumela vhathu kha zwithu zwi tshimbidzanaho na vhurabeli havho kha Mudzimu,+ uri a ṋekedze zwifhiwa na zwiṱhavhelo a tshi itela zwivhi zwavho.+
2 U a kona u pfela vhuṱungu vhane vha khakha nga u sa ḓivha,* samusi na ene a tshi shaya nungo,
3 ndi ngazwo a tshi fanela u ṋekedza zwiṱhavhelo a tshi itela zwivhi zwawe, samusi a tshi ṋekedza zwiṱhavhelo a tshi itela zwivhi zwa vhaṅwe.+
4 Muthu ha tou ḓinanga uri a vhe tshifhe muhulu, u nangwa nga Mudzimu, samusi o nanga Aroni.+
5 Na Kristo ho ngo ḓiṋea vhugala+ nga u vha tshifhe muhulu, fhedzi o ṋewa vhugala nga We a amba nae a ri: “Iwe u murwa wanga; ṋamusi ndi khotsi au.”+
6 Kha luṅwe luṅwalo o ri, “U tshifhe wa lini na lini nga maitele a Melkizedeke.”+
7 Musi Kristo e kha ḽifhasi, o humbela na u rabela nga mukosi muhulu na zwililo+ kha We a vha a tshi kona u mu tshidza lufuni, o pfiwa ngauri u ofha Mudzimu.
8 Naho e murwa wa Mudzimu, o guda u pfa nga nṱhani ha u tambudzwa.+
9 Musi o no itwa uri a pfe nga ho fhelelaho,+ o ṋewa vhuḓifhinduleli ha u tshidza vhoṱhe vhane vha mu thetshelesa,+
10 ngauri o nangwa nga Mudzimu uri a vhe tshifhe muhulu nga maitele a Melkizedeke.+
11 Ri na zwinzhi zwine ra nga zwi amba nga hae, fhedzi zwi a konḓa u ṱalutshedza ngauri a ni ṱavhanyi u pfa.
12 Naho zwino no vha no fanela u vha ni tshi khou funza vhaṅwe, ni kha ḓi ṱoḓa muthu wa u ni funza u bva mathomoni zwithu zwa mutheo+ zwi re ipfini ḽikhethwa ḽa Mudzimu, no humela murahu ni vho ṱoḓa mafhi, hu si zwiḽiwa zwo dziaho.
13 Ane a bvela phanḓa a tshi mama mafhi ho ngo ḓowelana na ipfi ḽo lugaho, ngauri u kha ḓi vha ṅwana.+
14 Fhedzi zwiḽiwa zwo dziaho ndi zwa vho vhibvaho, vhe vha gudisa maanḓa avho a u ṱalukanya uri vha kone u khethekanya zwo lugaho na zwi songo lugaho.
Ṱhaluso dzi re magumoni a siaṱari
^ Kana “vha zwiito zwi sa ḓivhalei.”
