Kha Vharoma 7:1-25
7 Vhahashu, naa a ni zwi ḓivhi uri Mulayo u vhusa muthu a tshi kha ḓi tshila? (Ndi khou amba na vhane vha ḓivha mulayo)
2 Mufumakadzi o vhingwaho o vhofhekanywa na munna wawe nga mulayo musi munna wawe a tshi kha ḓi tshila; fhedzi arali munna wawe a fa, u a vhofhololwa kha mulayo wa munna wawe.+
3 Onoyo mufumakadzi u ḓo vha a tshi khou ita vhupombwe arali a vhingwa nga muṅwe munna,+ musi munna wawe a tshi kha ḓi tshila. Fhedzi arali munna wawe a fa, o vhofhololwa kha mulayo wa munna wawe, u ḓo vha a sa khou ita vhupombwe arali a vhingwa nga muṅwe munna.+
4 Ngauralo vhahashu, na inwi no vha no vhofhiwa nga Mulayo. Fhedzi nga tshiṱhavhelo tsha Kristo na vhofhololwa, zwino ni vha Kristo+ we a vuswa,+ uri ri aṋwele Mudzimu mitshelo.+
5 Musi ri tshi kha ḓi tshila u tendelana na nyemulo dza ṋama, Mulayo wo ita uri zwi vhonale uri nyemulo dza ṋama dzi ita uri mivhili* yashu i ite tshivhi, tshenetsho tshivhi tsha ita uri ri fe.+
6 Zwino ro vhofhololwa kha Mulayo,+ ri nga vha vhalanda nga nḓila ntswa nga u tevhela vhulivhisi ha muya mukhethwa,+ hu si nga nḓila ya kale ya u tevhela mulayo wo ṅwaliwaho.+
7 Fhedzi ri nga ri mini? Naa Mulayo ndi tshivhi? Na khathihi! Ndo vha ndi tshi ḓo vha ndi sa ḓivhi tshivhi arali ho vha hu si Mulayo.+ Ndo vha ndi tshi ḓo vha ndi sa ḓivhi nyemulo arali Mulayo u vhe u songo ri: “U songo emula.”+
8 Fhedzi mulayo wo ita uri tshivhi tshi wane nḓila ya u ita uri ndi emule zwithu zwo fhambanaho. Musi mulayo u sa athu u vha hone tshivhi tsho vha tshi si na maanḓa.+
9 Ndo vhuya nda tshila hu sa athu u vha na mulayo. Musi hu tshi vha na mulayo, tshivhi tsha vha na maanḓa, fhedzi nṋe nda fa.+
10 Milayo ye ya vha i tshi tea u nnyisa vhutshiloni,+ yo nnyisa lufuni.
11 Nga nṱhani ha mulayo, tshivhi tsho wana nḓila ya u mphura na u mmbulaya.
12 Mulayo ndi mukhethwa, na zwe zwa ambiwa kha mulayo ndi zwikhethwa, zwo luga, ndi zwivhuya.+
13 Kani ndi ḓo vhulawa nga zwivhuya?* Na khathihi! Ndi ḓo vhulawa nga tshivhi. Nga nṱhani ha zwivhuya, tshivhi tsho kona u mmbulaya,+ u itela uri hu vhonale zwine tshivhi tsha vha zwone. Mulayo wo zwi sumbedza uri tshivhi tsho vhifha vhukuma.+
14 Ngauri ri a zwi ḓivha uri Mulayo u bva kha Mudzimu; nṋe ndi muthu wa ṋama, ndi phuli ya tshivhi.+
15 Ngauri a thi pfesesi zwine nda zwi ita. Ndi ita zwine nda zwi vhenga, hu si zwine nda zwi tama.
16 Arali ndi tshi ita zwine ndi si zwi tame, zwenezwi zwi sumbedza uri Mulayo wa Mudzimu ndi wavhuḓi.
17 Fhedzi a si nṋe ane a khou ita zwenezwi zwithu, ndi tshivhi tshi re kha nṋe.+
18 Ndi a zwi ḓivha uri ndi muthu wa ṋama, a hu na zwivhuya zwine nda zwi ita. Ndi a tama u ita zwavhuḓi, fhedzi a thi koni u zwi ita.+
19 Ngauri a thi iti zwivhuya zwine nda tama u zwi ita, ndi ita vhuvhi vhune ndi sa tame u vhu ita.
20 Arali ndi tshi ita zwine ndi si zwi tame, a si nṋe ane nda khou zwi ita, ndi tshivhi tshi re kha nṋe.
21 Hu na mulayo u re kha nṋe, ndi wa uri: Musi ndi tshi tama u ita zwivhuya, ndi ita vhuvhi.+
22 Mbilu yanga i takalela mulayo wa Mudzimu,+
23 fhedzi muvhilini* wanga hu na muṅwe mulayo une wa lwa na mulayo u re muhumbuloni wanga.+ Wonoyo mulayo wa tshivhi u nnyisa vhuthubwani.+
24 Ndi muthu a ṱungufhadzaho! Ndi nnyi ane a ḓo mponyokisa kha wonoyu muvhili une wa ḓo ita uri ndi fe?
25 Ndi livhuwa Mudzimu nge a shumisa Yesu Kristo Murena washu! Nga zwenezwo, nṋe muhumbuloni wanga ndi shumela mulayo wa Mudzimu, fhedzi ṋama yanga i shumela mulayo wa tshivhi.+
Ṱhaluso dzi re magumoni a siaṱari
^ Thevhedz., “miraḓo.”
^ “Zwivhuya” zwi ambela kha Mulayo wa Mudzimu.
^ Thevhedz., “miraḓoni.”
