Yeremia 5:1-31
5 Tendelekani na nḓila dza Yerusalema.
Ni lavhelese ni ṱhogomele.
Ni ṱoḓe khoroni dzawo ni vhoneArali ni tshi nga wana munna ane a haṱula nga nḓila yo teaho,+Ane a ṱoḓa u fhulufhedzea,Ndi hone ndi tshi ḓo hangwela Yerusalema.
2 Naho vha tshi ri: “Ri ana nga Yehova a tshilaho!”
Vha ḓi bvela phanḓa vha tshi ana mazwifhi.+
3 Iwe Yehova, naa maṱo au ha lavhelesi vhathu vha fhulufhedzeaho?+
Wo vha rwa, fhedzi a vho ngo pfa vhuṱungu.
Wo vha fhelisa, fhedzi vha hana ndayo.+
Vha omisa zwifhaṱuwo zwavho u fhira tombo,+Vha hana u rembuluwa.+
4 Fhedzi nda humbula nda ri: “Ngangoho, havha vha nga vha vhe vhashai.
Vha ita zwa vhutsilu, ngauri a vha ḓivhi nḓila ya Yehova,Khaṱhulo ya Mudzimu wavho.
5 Ndi ḓo ya kha vhanna vha vhaḓivhalea nda amba navho,Ngauri vha nga vha vha tshi dzhiela nṱha nḓila ya Yehova,Khaṱhulo ya Mudzimu wavho.+
Fhedzi vhoṱhe vho vunḓa dzhogoVha ṱhukhula ngeḓane.”
6 Ndi ngazwo ndau ya ḓaka i tshi vha vutshela,Ṱarelwa* ḽa midavhini ya sogani ḽi tshi dzulela u vha vhulaya,Nngwe yo vha lalela miḓini yavho.
Ane a bvela nnḓa u a ṱhukhukanywa.
Ngauri vhutshinyi havho ndi vhunzhi;Mishumo yavho ya u sa fhulufhedzea ndi minzhi.+
7 Ndi nga ni hangwela hani zwenezwi?
Vharwa vhaṋu vho nndaṱa,Vha ana nga zwi si Mudzimu.+
Ndi vha fusha nga zwine vha shaya,Fhedzi vha dzulela u ita vhupombwe,Vho kuvhangana nḓuni ya murengisi wa muvhili.
8 Vha nga bere dzo hwelwaho,*Muṅwe na muṅwe u tevhela mufumakadzi wa muṅwe munna.+
9 “Naa a tho ngo fanela u vha sengisela zwenezwi zwithu?” u ralo Yehova.
“Naa a tho ngo fanela u ḓilifhedzela kha lushaka lwo raloho?”+
10 “Iḓani ni reme na u tshinya masimu a minḓirivhe,Fhedzi ni songo a tshinyadza tshoṱhe.+
Ni reme matavhi ayo maswa,Ngauri a si a Yehova.
11 Ngauri vha nnḓu ya Isiraele na ya YudaVho nnyitela tshimbevha tshihulu,” u ralo Yehova.+
12 “Vho landula Yehova, vha bvela phanḓa vha tshi ri:
‘A hu na zwine a ḓo ita.*+
A hu na maṱungu ane a ḓo ri ḓela;Ri nga si vhone banga kana nḓala.’+
13 Vhaporofita vha amba zwi sa vhuyedzi,Na ipfi* a ḽiho khavho.
Zwine vha zwi amba kha zwi itee khavho!”
14 Ngauralo, zwe Yehova Mudzimu wa mavhuthu a zwi amba, ndi hezwi:
“Ngauri vhenevha vhanna vha khou amba zwenezwi,Ndi ḓo ita uri maipfi anga a vhe mulilo mulomoni wau,+Vhenevha vhathu ndi khuni,Wonoyo mulilo u ḓo vha fhisa.”+
15 “Ndi khou ni ḓisela lushaka lune na sa lu ḓivhe lu bvaho kule, inwi vha nnḓu ya Isiraele,”+ u ralo Yehova.
“Ndi lushaka lwa lini na lini.
Ndi lushaka lwa kale,Lune na si ḓivhe luambo lwalwo,Lushaka lune na sa ḓo pfesesa kuambele kwalwo.+
16 Mikhwama yavho ya misevhe i fana na vhiḓa ḽo aṱamaho;Vhoṱhe ndi vhahali.
17 Vha ḓo ḽa zwe na kaṋa na zwiḽiwa zwaṋu.*+
Vha ḓo vhulaya vharwa na vhananyana vhaṋu.
Vha ḓo fhedza masambi aṋu a nngu na a kholomo.
Vha ḓo tshinyadza minḓirivhe na mihuyu yaṋu.
Vha ḓo phusukanya nga banga miḓi yaṋu yo tsireledzwaho nga mbondo ine na fhulufhela yone.”
18 “Na misini yeneyo,” u ralo Yehova, “a thi nga ni fhelisi tshoṱhe.+
19 Musi vha tshi vhudzisa uri, ‘Ndi ngani Yehova Mudzimu washu o ri ita zwenezwi zwoṱhe?’ ni vha fhindule ni ri, ‘Samusi no nndaṱa na shumela mudzimu wa mazwifhi shangoni ḽaṋu, nga zwenezwo, ni ḓo shumela vhatsinda kha shango ḽine ḽa si vhe ḽaṋu.’”+
20 Zwi huweleleni kha vha nnḓu ya Yakobo,Ni zwi ḓivhadze Yuda, ni ri:
21 “Thetshelesani inwi vhathu vha matsilu vha si na ṱhalukanyo+Vhane vha vha na maṱo, fhedzi vha sa vhoni;+Vhane vha vha na nḓevhe, fhedzi vha sa pfi.+
22 ‘Naa a ni nnyofhi?’ u ralo Yehova,‘Naa a no ngo fanela u tetemela phanḓa hanga?
Ndi nṋe we nda vhea muṱavha uri u vhe mukano wa lwanzhe,Mulayo wa tshoṱhe une lwanzhe lwa sa ḓo u pfuka.
Naho magabelo a tshi ya ngeno na ngei, a nga si kone u u pfuka;Naho a tshi unga, a nga si kone u u pfuka.+
23 Fhedzi vhenevha vhathu vha na swili, ndi mashandukwa;Vho pambuwa vha fara nḓila yavho.+
24 Mbiluni dzavho a vha ambi uri:
“Zwino kha ri ofhe Yehova Mudzimu washu,Ane a ri nisela mvula nga tshifhinga tshayo,Mvula ya tshifhefho na mvula ya luṱavula,Ane a ita vhungoho ha uri hu vhe na vhege dza khaṋo.”+
25 Vhukhakhi haṋu ho thivhela zwenezwi zwithu;Zwivhi zwaṋu zwo ita uri ni shaye zwivhuya.+
26 Ngauri vhukati ha vhathu vhanga hu na vhathu vhavhi.
Vha dzula vho lalela sa vharei vha zwiṋoni.
Vha rea nga tshikwekwe.
Vha fasha vhathu.
27 U fana na hoko yo ḓalaho zwiṋoni,Nnḓu dzavho dzo ḓala vhufhura.+
Ndi ngazwo vhe na maanḓa, vho pfuma.
28 Vho khwaṱha, vha a penya;Vhuvhi havho ho kalula.
A vha tikedzi ṅwana a si na khotsi tsengoni,+Vha tshi itela uri zwavho zwi nake;Vha ita uri mushai a si haṱulwe nga nḓila yo teaho.’”+
29 “Naa a tho ngo fanela u vha sengisela zwenezwi zwithu?” u ralo Yehova.
“Naa a tho ngo fanela u ḓilifhedzela kha lushaka lwo raloho?
30 Ho itea zwithu zwi mangadzaho na zwi ofhisaho shangoni:
31 Vhaporofita vha porofita mazwifhi,+Vhotshifhe vha shumisa maanḓa avho u itela u vhusa vhaṅwe.
Vhathu vhanga vha zwi funa zwo tou ralo.+
Fhedzi ni ḓo ita mini musi vhufhelo vhu tshi ḓa?”
Ṱhaluso dzi re magumoni a siaṱari
^ Kana “Mmbwa ya ḓaka.”
^ Kana “dzi ṱoḓaho u ita vhana.”
^ Kana khamusi, “Haho.”
^ Ndi ipfi ḽa Mudzimu.
^ Thevhedz., “vhurotho haṋu.”
