Bivhili I Shandula Vhutshilo

MUṄWE mufumakadzi we a aluswa nga nḓila i vhavhaho o ḓivha hani zwine a khou tshilela zwone? Zwo ḓa hani uri muthu wa dzikhakhathi ane a lwa na muvhuso une wa khou vhusa shangoni ḽa hawe a shanduke a vha muhuweleli wa mafhungo maḓifha a re na mulalo? Vhalani mafhungo a tevhelaho u itela u wana phindulo.

“Ndo vha ndi tshi khou ṱoḓa u funiwa.”​—INNA LEZHNINA

ṄWAHA WA MABEBO: 1981

SHANGO: RUSSIA

ZWE ZWA ITEA: O ALUSWA NGA NḒILA I VHAVHAHO

VHUTSHILO HANGA HA TSHIFHINGANI TSHO FHIRAHO: Ndo bebwa ndo dzinga nḓevhe nga vhabebi vho dzingaho nḓevhe. Miṅwaha ya u thoma ya rathi ndi kha ḓi bva u bebwa yo vha i tshi takadza. Ha ḓa he vhabebi vhanga vha ṱalana. Naho ndo vha ndi tshee muṱuku, ndo vha ndi tshi zwi ḓivha uri zwi amba mini uri vho ṱalana nahone zwo mmbaisa nga maanḓa. Musi vhabebi vhanga vho no ṱalana, khotsi anga na khaladzi anga ane a vha muhulwane kha nṋe vho sala ḓoroboni ya Troitsk, nṋe na mme anga ra pfulutshela ḓoroboni ya Chelyabinsk. Nga u ya ha tshifhinga, mme anga vho dovha vha vhingwa nga muṅwe munna. Vhenevho munna vho vha vhe tshidakwa nahone vho vha tshi anzela u rwa nṋe na mme anga.

Khaladzi anga ane nda mu funa vhukuma o mbo ḓi nwela khothe nga 1993. Tshenetshi tshiwo tsho ri tshuwisa vhukuma. Mme anga vho mbo ḓi thoma u nwa halwa u itela u sedzana na honoho vhuṱungu nahone vha thoma u ntambudza u fana na khotsi anga vha si vha malofhani. Ndo thoma u ṱoḓana na vhutshilo ha khwine. Ndo vha ndi tshi khou ṱoḓa u funiwa. Nda thoma u ya kerekeni dzo fhambananaho, ndi tshi khou ṱoḓa u khuthadzwa, fhedzi zwa sokou sea zwi tshi ṱanama.

NḒILA YE BIVHILI YA SHANDULA NGAYO VHUTSHILO HANGA: Musi ndi na miṅwaha ya 13, muṅwe musidzana ane nda dzhena nae kiḽasini, we a vha e Ṱhanzi ya Yehova, o mmbudza zwiṱori zwa Bivhilini. Ndo zwi takalela vhukuma u guda nga vhathu vha re Bivhilini vha ngaho Noaxe na Yobo, vhe vha shumela Mudzimu naho vho fara tsha u konḓa. Ndo mbo ḓi thoma u guda Bivhili na Dziṱhanzi na u ya miṱanganoni.

U guda Bivhili zwo ita uri ndi gude zwithu zwinzhi zwavhuḓi. Zwo nkwama mbilu musi ndi tshi guda uri Mudzimu u na dzina. (Phisalema 83:18) Ndo takadzwa na nga u vhona nḓila ye Bivhili ya porofita ngayo zwithu zwe zwa vha zwi tshi ḓo itea “maḓuvhani a vhufhelo.” (2 Timotheo 3:1-5) Nahone ndo takadzwa vhukuma nga u guda nga ha fhulufhelo ḽa u vuswa ha vhafu. Humbulani nga hazwo, ndo vha ndi tshi ḓo dovha nda vhona khaladzi anga.​—Yohane 5:28, 29.

Fhedzi a si vhoṱhe vhe vha takala na nṋe nga ha zwithu zwiswa zwi takadzaho zwe nda zwi guda. Mme anga na khotsi anga vha si vha malofhani vho vha vha sa fari zwavhuḓi Ṱhanzi dza Yehova. Vho lingedza u ntsikeledza uri ndi litshe u guda Bivhili. Fhedzi ndo vha ndi tshi funa zwe nda vha ndi tshi khou zwi guda nahone ho vha hu si na ane a ḓo nnditshisa.

Zwo vha zwi songo leluwa u pikiswa nga vha muṱani wahashu. Ro dovha ra tshuwa musi khaladzi anga muṱuku ane a vha ṅwana wa mme anga na khotsi anga vha si vha malofhani, we a vha a tshi mphelekedza miṱanganoni ya Ṱhanzi dza Yehova, a tshi nwela khothe. Ṱhanzi dzo ntikedza. Vho mpfuna nga nḓila ye nda ndi tshi ṱoḓa u funiwa ngayo u bva kale. Ndo zwi ḓivha uri hovhu ndi vhurereli ha ngoho. Nga 1996 ndo lovhedzwa, nda vha Ṱhanzi ya Yehova.

NḒILA YE NDA VHUYELWA NGAYO: Ndo no vha na miṅwaha ya rathi zwino ndo vhingwa nga Dmitry ane a vha munna wavhuḓi vhukuma. Ri khou shuma roṱhe davhini ḽa Ṱhanzi dza Yehova ḽa St. Petersburg. Nga u ya ha tshifhinga, vhabebi vhanga vho shandula nḓila ine vha ḓipfa ngayo nga ha zwine nda zwi tenda.

Ndi a livhuwa vhukuma uri ndi a ḓivha Yehova. U mu shumela zwi ita uri muthu a ḓivhe zwine a khou tshilela zwone.

“Ndo vha ndi na mbudziso nnzhi nga ha vhutshilo dzine dza mmbilaedzisa.”​—RAUDEL RODRÍGUEZ RODRÍGUEZ

ṄWAHA WA MABEBO: 1959

SHANGO: CUBA

ZWE ZWA ITEA: O LWA NA MUVHUSO UNE WA KHOU VHUSA SHANGONI ḼA HAWE

VHUTSHILO HANGA HA TSHIFHINGANI TSHO FHIRAHO: Ndo bebelwa Havana kha ḽa Cuba nahone ndo aluswa fhethu he ha vha hu tshi tambuliwa, he ha vha hu tshi anzela u lwiwa tshiṱaraṱani. Musi ndi tshi khou ḓi hula, ndo thoma u funa mitambo ya dzinndwa na une wa pfi judo.

Ndo vha ndi tshi mutshudeni wavhuḓi nahone vhabebi vhanga vho nṱuṱuwedza uri ndi ye yunivesithi. Musi ndi henefho, ndo thoma u vhona uri nḓila ine zwithu zwa poḽitiki zwa itwa ngayo shangoni ḽa hashu zwi tea u shandulwa. Nda mbo ḓi thoma u lwa na muvhuso. Nṋe na muṅwe ane nda dzhena nae kiḽasini ro lwa na pholisa, ri tshi khou ṱoḓa u ḽi dzhiela tshigidi tshaḽo. Yeneyi nndwa yo ita uri ḽeneḽi pholisa ḽi vhaisale kha ṱhoho. Zwa ita uri nṋe na onoyu muṱhannga ri farwe, ra gwevhiwa ha pfi ri ḓo tou thuntshiwa nga mapholisa u swika ri tshi fa. Ndo vha ndi tshi tou vha na miṅwaha ya 20 fhedzi nahone ndo vha ndo sedzana na lufu.

Musi ndo dzula ndi ndoṱhe seleni, ndo vha ndi tshi khou lugiselela zwine nda ḓo zwi ita musi ndi phanḓa ha eneo mapholisa. Ndo vha ndi sa ṱoḓi u vhonala ndo tshuwa. Nga tshenetsho tshifhinga, ndo vha ndi na mbudziso nnzhi dzine dza khou mmbilaedzisa. Ndo ḓivhudzisa uri: ‘Ndi ngani vhathu vha tshi farwa luvhi nga u rali shangoni? Naa a hu na vhutshilo ha khwine kha uvhu?’

NḒILA YE BIVHILI YA SHANDULA NGAYO VHUTSHILO HANGA: Tshigwevho tshashu tsha uri ri tou vhulawa tsho mbo ḓi shandulwa, ha pfi ri tea u tou fhedzi miṅwaha ya 30 dzhele. Nga tshenetshi tshifhinga, ndo mbo ḓi ṱangana na vhaṅwe vhane vha vha Ṱhanzi dza Yehova, vhe vha vha vho farwa nga nṱhani ha zwine vha zwi tenda. Ndo takadzwa nga nḓila ine vha vha na tshivhindi ngayo, ngeno vha tshi dovha vha vha vhathu vha mulalo. Naho vho farwa zwi songo tea, vho vha vha songo sinyuwa kana u bilufhala.

Ṱhanzi dzo ngudisa uri hu na zwine Mudzimu a ṱoḓa u zwi itela vhathu. Dzo ntsumbedza Bivhilini uri Mudzimu u ḓo shandula ḽifhasi ḽa vha pharadiso, ha si tsha vha na vhuvemu na u farwa luvhi ha vhathu. Dzo ngudisa na uri ḽifhasi ḽi ḓo ḓala nga vhathu vhavhuḓi, vhane vha ḓo vha na tshibuli tsha u tshila tshoṱhe hu si na zwi dinaho.​—Phisalema 37:29.

Ndo vha ndi tshi takalela zwine nda khou zwi guda kha Dziṱhanzi, fhedzi dzo vha dzi tshi ḓo vhuya vhukuma uri ndi vhe muthu o dzikaho na a re na mulalo u fana na Dziṱhanzi. Ndo vha ndi tshi vhona u nga u sa dzhia sia kha zwa poḽitiki kana u sokou ṋekedzela shama ndi nga si zwi kone. Ndo mbo ḓi ita phetho ya u ḓivhalela Bivhili. Musi ndi tshi i fhedza, ndo kona u zwi vhona uri Ṱhanzi dza Yehova ndi dzone fhedzi dzine dza tshila u fana na Vhakriste vha u thomani.

U guda Bivhili zwo nthusa u vhona uri ndi tea u ita tshanduko khulwane. Sa tsumbo, ndo vha ndi tshi tea u shandula nḓila ine nda amba ngayo, ngauri ndo vha ndi na mukhwa wa u semana nga maṱamba. Ndo vha ndi tshi tea na u litsha u daha. Nahone ndo vha ndi tshi tea u litsha u dzhia sia kha zwa poḽitiki. Dzo vhuya vhukuma musi ndi tshi khou ita dzenedzi tshanduko, fhedzi Yehova o nthusa uri ndi kone u dzi ita.

Tshiṅwe tshe tsha nkonḓelesa ho vha u langa mbiti dzanga. Na zwino ndi kha ḓi humbela Mudzimu uri a nthuse uri ndi kone u ḓifara. Ndo thuswa vhukuma nga ndimana dza Bivhili dzi ngaho Mirero 16:32, ine ya ri: “Ane a lenga u sinyuwa u khwine u fhira munna wa maanḓa, ane a langa mbiti dzawe u khwine u fhira ane a kunda muḓi.”

Nga 1991 ndo lovhedzwa, nda vha Ṱhanzi ya Yehova. Ndo lovhedzelwa kha fagi ngei dzhele. Nga ṅwaha u tevhelaho, vhaṅwe vhashu ro vhofhololwa, ra iswa Spain ngauri ro vha ri na mashaka henefho. Musi ri tshi swika Spain, ndo mbo ḓi ya miṱanganoni ya Ṱhanzi dza Yehova. Ṱhanzi dza henefho dzo nṱanganedza, zwa tou nga ndi kale ndi henefho. Nahone dzo nthusa musi ndi tshi thoma vhutshilo hanga henefho Spain.

NḒILA YE NDA VHUYELWA NGAYO: Ndi muthu o takalaho nahone ndi khou shumela Mudzimu na mufumakadzi wanga na vhana vhashu vhavhili vha vhasidzana. Ndi na ndugelo ya u fhedza vhunzhi ha tshifhinga tshanga ndi tshi khou thusa vhathu u guda Bivhili. Nga zwiṅwe zwifhinga ndi a humbula nga ha tshifhinga tsha musi ndi tshee muswa ndi tsini na u fa nahone ndi dzhiela nṱha zwe nda vhuyelwa ngazwo u bva tsheetsho. Ndi khou tshila nahone ndi na fhulufhelo. Ndo sedza phanḓa kha Pharadiso yo fhulufhedziswaho, musi vhathu vha tshi farwa zwavhuḓi na tshifhinga tshine ‘lufu lwa si tsha ḓo vha hone.’​—Nzumbululo 21:3, 4.

[Maipfi o ṱumbulwaho]

“Zwo nkwama mbilu musi ndi tshi guda uri Mudzimu u na dzina”

[Tshifanyiso]

Nṋe na munna wanga ri takalela u ṋea vhathu vho dzingaho nḓevhe khandiso dza vhathu vha ambaho luambo lwa zwanḓa