NAA Yehova ndi Muvhusi wa vhuṱali? Iṅwe nḓila ya u fhindula yeneyo mbudziso ndi u ṱolisisa nyeletshedzo ine a i ṋea. Naa i a shuma? Naa u i shumisa zwi ita uri vhutshilo vhu vhe khwine kana vhu vhe na ndivho? Khosi ya vhuṱali Solomo o ṅwala mirero ya maḓana. Yeneyi Mirero i shuma kha masia oṱhe a vhutshilo. Ṱhogomelani dziṅwe tsumbo.

U fulufhela Mudzimu. U fulufhela ndi tshithu tsha ndeme tsha u vha na vhushaka havhuḓi na Yehova. Solomo o ṅwala: “Fulufhedza Mudzimu nga mbilu yau yoṱhe; U songo ḓi-tika nga u ri: Ndi a ṱalukanya. Dzinḓilani dzau dzoṱhe ḓivha Ene, u ḓo U lugisela hune wa tshimbila.” (Mirero 3:5, 6) U fulufhela Mudzimu nga u ṱoḓa vhulivhisi hawe na u mu thetshelesa zwi ita uri vhutshilo vhu vhe na ndivho. Ḽeneḽo buḓo ḽi ita uri vhathu vha takadze mbilu ya Mudzimu na u ṋea Yehova phindulo kha khani dze dza vuswa nga swina Ḽawe, Sathane.—Mirero 27:11.

U shumisana na vhaṅwe nga vhuṱali. Nyeletshedzo ya Mudzimu kha vhanna, vhasadzi, na vhana i tshifhingani ṋamusi u fhira naho hu lini. Mudzimu u vhudza munna uri: “U takalele musadzi wau wa misi iḽa Ú tshee muswa,” zwine zwa amba uri u fanela u dzula a tshi fulufhedzea kha musadzi wawe. (Mirero 5:18-20) Vhasadzi vho vhingwaho vha wana uri bugu ya Mirero i amba nga ha musadzi ane a ita zwoṱhe zwine a nga kona u itela u takalelwa nga munna wawe na vhana vhawe. (Mirero, ndima 31) Nahone vhana vha wana vhulivhisi ha uri vha thetshelese vhabebi vhavho. (Mirero 6:20) Yeneyi bugu i dovha ya sumbedza uri vhukonani ndi ha ndeme, ngauri u ḓiita tshilendele zwi ita uri muthu a vhe na tseḓa. (Mirero 18:1) Khonani dzi nga ri ṱuṱuwedzela u ita zwo lugaho kana zwi songo lugaho, nga zwenezwo ri fanela u dzi khetha nga vhuṱali.—Mirero 13:20; 17:17.

U ḓiṱhogomela nga vhuṱali. Bugu ya Mirero i na nyeletshedzo ya ndeme ya u iledza u shumisa luvhi zwikambi, maḓipfele ane a ḓo ita uri ri vhe na mutakalo wavhuḓi na u lwisana na vhathu vhane vha ri tshinya, na u vha mushumi wa biko. (Mirero 6:6; 14:30; 20:1) I sevha uri u fulufhela vhathu hu si nyeletshedzo ya Mudzimu zwi nga ri dzhenisa khomboni. (Mirero 14:12) I ri ṱuṱuwedza uri ri tsireledze mbilu kha ṱhuṱhuwedzo mmbi, na u ri humbudza uri “[mbilu] ndi yone ine vhutshilo ha bva khayo.”—Mirero 4:23.

Vhathu vha dzimilioni shangoni ḽoṱhe vho wana uri u tshila nga u tevhela nyeletshedzo yo raloho zwi ita uri muthu a vhe na vhutshilo ha khwine. Nga ṅwambo wa zwenezwo, vha na tshiitisi tsha u ṱanganedza Yehova sa Muvhusi wavho.

—Enea mafhungo a wanala kha bugu ya Mirero.