MUSI Simisoni a si tsha vha muhaṱuli, Samuele o mbo ḓi vha muporofita na muhaṱuli kha ḽa Isiraele. Vhaisiraele vho vha vha tshi dzulela u mu vhudza uri vha khou ṱoḓa u fana na dziṅwe tshaka nahone vha khou ṱoḓa khosi. Naho yeneyi khumbelo yo vha i tshi sinyusa Mudzimu, o vhudza Samuele uri a ite zwine vha khou ṱoḓa. Mudzimu o khetha munna ane a ḓiṱukufhadza ane a pfi Saulo uri a vhe khosi. Naho zwo ralo, nga u ya ha tshifhinga Khosi Saulo o mbo ḓi thoma u ḓikukumusa na u sa thetshelesa. Yehova ha ngo tsha ṱoḓa uri a vhe khosi nahone a amba na Samuele uri a khethe iṅwe khosi—ine ya vha muṱhannga ane a pfi Davida. Naho zwo ralo, zwo vha zwi tshi ḓo dzhia miṅwaha minzhi uri Davida a vhuse sa khosi.

Musi a tshi kha ḓi vha miṅwahani ya vhufumi, Davida o dalela vhakomana vhawe vhe vha vha vhe mmbini ya Saulo. Mmbi yoṱhe yo vha i tshi khou ofha swina ḽithihi ḽa ḽiswole, muswonḓa une wa vhidzwa Goliata, we a vha a tshi dzulela u vha nyadza kathihi na Mudzimu wavho. O sinyuwa, Davida a tenda uri u ḓo lwa na wonoyo muswonḓa. O ḓiṱama nga gatho na matombo a si gathi, onoyo muṱhannga o bva u itela u ṱangana na swina ḽawe, ḽe ḽa vha ḽo lapfa mithara dzi ṱoḓaho u vha tharu. Musi Goliata a tshi mu holedza, Davida o fhindula a ri o vha o ḓiṱama khwine u fhira onoyo muswonḓa, ngauri Davida o lwa nga dzina ḽa Yehova Mudzimu! Davida o vhulaha Goliata nga tombo ḽithihi nahone a mbo ḓi tumula ṱhoho ya muswonḓa nga pfumo ḽaḽo. Mmbi ya Vhafilisita ya mbo ḓi shavha nga nyofho.

Mathomoni, Saulo o vha o takadzwa nga tshivhindi tshe Davida a vha e natsho nahone a mbo ḓi mu dzhenisa kha mmbi yawe. Fhedzi u ḓivha ha Saulo uri Davida u ḓo vha khosi zwo ita uri a vhe na vivho ḽihulwane. Davida o vha a tshi fanela u shavha u itela u ḓitsireledza na u tshila sa mushavhapfumo lwa miṅwaha minzhi. Zwiṅwe hafhu, Davida o dzula a tshi fulufhedzea kha khosi ye ya vha i tshi khou lingedza u mu vhulaha, a tshi humbula uri Khosi Saulo o khethiwa nga Yehova Mudzimu. Mafheleloni Saulo a mbo ḓi fa nndwani. Nga u ṱavhanya nga murahu ha zwenezwo, Davida o mbo ḓi vha khosi, samusi Yehova o fulufhedzisa.

Samusi o vhe e khosi, Davida o vha e na lutamo luhulwane lwa u fhaṱela Yehova thembele. Naho zwo ralo, Yehova o vhudza Davida uri i ḓo fhaṱiwa nga muṅwe wa vharwa vhawe. Salomo murwa wa Davida ndi ene we a i fhaṱa. Naho zwo ralo, Mudzimu o lambedza Davida, nga u vhofha nae mulanga u takadzaho: U fhambana na miṅwe miṱa mutevhe wa muṱa wawe u ḓo bveledza mahosi. Mafheleloni, u ḓo bveledza Muvhofhololi, kana Mbeu, ye ya fulufhedziswa Edeni. Onoyo u ḓo vha Messia, zwine zwa amba “Muḓodzwa,” o khethiwaho nga Mudzimu. Yehova o fulufhedzisa uri Messia u ḓo vha Muvhusi wa hulumeni, kana Muvhuso, une wa ḓo dzula u hone nga hu sa fheli.

Nga dakalo ḽihulwane, Davida o kuvhanganya thundu nnzhi dza u fhaṱa thembele. O dovha a ṅwala na dzipsalme nnzhi. Musi e tsini na u fa, Davida o ṱhogomela uri: “Kha nṋe hu amba muya wa Yehova. Lulimi lwanga lu na fhungo ḽawe.”—2 Samuele 23:2.

—Enea mafhungo a wanala kha 1 na 2 Samuele; 1 Vha-Koronika; Yesaya 9:7; Mateo 21:9; Luka 1:32; Yohane 7:42.