YEHOVA o vha a tshi zwi ḓivha uri Murwa mufunwa wawe o vha a tshi ḓo shengela nahone a fa ḽiṅwe ḓuvha. Vhuporofita ho ṅwalwaho kha Genesi 3:15 a ho ngo bvisela khagala eneo mafhungo. Naa Mudzimu o vha a tshi ḓo vhudza vhathu uri u ḓo pfa vhuṱungu nga ṅwambo wa tshiṱhavhelo tsha Murwa wawe? Bivhili i ri vhudza tsumbo ya vhukuma ya zwe zwa itea kha khotsi na murwa wawe. Mudzimu o humbela Abrahamu uri a ite murwa mufunwa wawe Isaka tshiṱhavhelo.

Abrahamu o vha e na lutendo luhulwane nga maanḓa. Humbulani uri Mudzimu o vha o mu fulufhedzisa uri Muvhofhololi kana Mbeu we a dzula o ambiwa o vha a tshi ḓo bva kha Isaka. A tshi fulufhela uri Mudzimu u ḓo vusa Isaka arali zwo tea, Abrahamu o vha a tshi ḓo ita murwa wawe tshiṱhavhelo. Fhedzi muruṅwa a bvaho ha Mudzimu o mbo ḓi vhudza Abrahamu uri a songo tsha ita murwa wawe tshiṱhavhelo. A tshi khoḓa Abrahamu nge a vha a tshi khou ṱoḓa u ṋekedza tshithu tshe tsha vha tshi tsha ndeme khae, Mudzimu o dovha a vhudza onoyo musimulalushaka a fulufhedzeaho mafulufhedziso Awe.

Nga murahu Isaka o mbo ḓi vha na vharwa vhavhili, Esau na Yakobo. Nge a vha o fhambana na Esau, Yakobo o vha a tshi dzhiela nṱha zwithu zwa muya nahone o mbo ḓi lambedzwa. Mudzimu o mbo ḓi shandula dzina ḽa Yakobo a vho pfi Isiraele, nahone vharwa vha 12 vha Isiraele vho mbo ḓi vha ṱhoho dza tshaka dza Isiraele. Fhedzi wonoyo muṱa wo vha hani lushaka luhulwane?

Zwiitea zwine zwa khou tevhekana zwo thoma musi vhaṅwe vharwa vha tshi vha na vivho kha murathu wavho Yosefa. Vho mu rengisa sa phuli, nahone o mbo ḓi iswa Egipita. Fhedzi Mudzimu o fhaṱutshedza onoyo muṱhannga a fulufhedzeaho na a re na tshivhindi. Hu sa londwi vhuleme, mafheleloni Yosefa o mbo ḓi khethiwa nga Farao muvhusi wa Egipita, nahone a mu ita mulanguli muhulwane. Zwenezwo zwo itea nga tshifhinga tshavhuḓi, ngauri nḓala yo ita uri Yakobo a rume vhaṅwe vharwa vhawe ngei Egipita uri vha ye u renga zwiḽiwa—nahone Yosefa, ho vha hu ene ane a langa zwiḽiwa zwoṱhe! Nga murahu ha u hangwela vhakomana vhawe vho rembuluwaho, Yosefa o ita ndugiselelo dza uri muṱa woṱhe u pfulutshele Egipita. Vho ṋewa shango ḽavhuḓi, he vha vha vha tshi nga bvela phanḓa vha tshi anda na u bvelela. Yosefa o vha a tshi pfesesa uri Mudzimu o dzhenelela kha enea mafhungo u itela u ḓadzisa fulufhedziso Ḽawe.

Yakobo o tshila vhutshilo hawe hoṱhe ngei Egipita, a tshi khou vhona muṱa wawe u tshi khou engedzea. Musi a sa athu fa, o dzula o amba nga ha Mbeu yo fulufhedziswaho, kana Muvhofhololi, uri u ḓo vha Muvhusi a re na maanḓa ane a ḓo bebiwa kha mutevhe wa lushaka lwa murwa wawe Yuda. Musi a sa athu fa, Yosefa o porofita uri ḽiṅwe ḓuvha Mudzimu u ḓo bvisa muṱa wa Yakobo ngei Egipita.

—Eneo mafhungo a wanala kha Genesi dzindima 20 u swika kha 50; Vha-Heberu 11:17-22.