VHASWA
12: Zwipikwa
ZWINE ZWA AMBA ZWONE
Zwipikwa a si u sokou ḽora uri zwiṅwe zwithu zwi itee. Zwipikwa zwi katela u dzudzanya, u tendelana na zwiimo na u shuma nga maanḓa.
Hu na zwipikwa zwine zwa dzhia maḓuvha kana dzivhege uri ri zwi swikelele. Zwiṅwe zwi dzhia miṅwedzi, zwiṅwe zwa dzhia ṅwaha kana u fhira. U itela uri ri kone u swikelela zwipikwa zwine zwa dzhia ṅwaha kana u fhira, ri tea u thoma ra swikelela zwine zwa dzhia maḓuvha, dzi vhege na miṅwedzi.
NDI NGANI ZWI ZWA NDEME
U swikelela zwipikwa zwi nga ita uri ni ḓifhulufhele, ni khwaṱhise vhukonani haṋu na vhaṅwe na u ita uri ni takale.
U ḓifhulufhela: Musi ri tshi swikelela zwipikwa zwiṱuku zwe ra ḓivhetshela zwone zwi ri ṱuṱuwedza uri ri ḓivhetshele na zwihulwane zwine zwa konḓa. Zwi nga dovha zwa ita uri ni ḓifhulufhele musi ni tshi sedzana na thaidzo dza ḓuvha ḽiṅwe na ḽiṅwe dzi fanaho na mutsiko wa thangana dza murole.
Vhukonani: Vhathu vha takalela u fhedza tshifhinga na vhane vha ḓivhetshela zwipikwa nahone vha lwela u zwi swikelela. Zwiṅwe hafhu, musi ni tshi shumisana na khonani yaṋu u itela u swikelela zwipikwa zwi fanaho zwi ḓo ita uri vhukonani ha vhoiwe vhu khwaṱhe.
U takala: Musi ni tshi swikela zwipikwa zwe na ḓivhetshela zwone, ni a ḓirwa khana
Christopher o amba uri: “Ndi a funa u ḓivhetshela zwipikwa. Zwi ita uri ndi dzule ndo farekanea na u ita uri ndi lwele u swikelela zwiṅwe zwithu. Musi ni tshi swikelela zwipikwa zwaṋu ni ḓipfa no takala nahone na ri ‘Ndo shuma, ndo swikelela zwe nda vha ndi tshi khou ṱoḓa u ita.’”
ZWINE BIVHILI YA AMBA: “Ane a lavhelesa muya ha nga zwali mbeu, na ane a lavhelesa makole ha nga kaṋi.”—Muhuweleli 11:4.
ZWINE NA NGA ITA
Itani zwi tevhelaho u itela u ḓivhetshela zwipikwa na u zwi swikelela.
Ḓivhani zwine na ṱoḓa u ita. Ṅwalani zwipikwa zwine na ṱoḓa u zwi swikelela nahone ni livhise ṱhogomelo khazwo. Ni khethe zwine na ṱoḓa u thoma ngazwo u swika zwi tshi fhelela.
Dzudzanyani. Itani zwi tevhelaho u itela u swikelela tshipikwa tshiṅwe na tshiṅwe:
Ḓivhetsheleni tshifhinga tshine tsha swikelelea.
Dzudzanyani uri ni tea u ita mini uri ni tshi swikelele.
Humbulani nga ha zwithithisi na uri ni ḓo zwi kunda hani.
Dzhiani vhukando. Ṱavhanyani ni thome u itela u swikelela tshipikwa tshaṋu, ni songo lindela u thoma na vha na zwidodombedzwa zwoṱhe. Ḓivhudziseni uri ‘ndi nga thoma nga u ita mini u itela u swikelela tshipikwa tshanga?’ Nga murahu ni zwi ite. Ni sedze mvelaphanḓa ine na khou i ita u itela u swikelela tshipikwa tshaṋu.
ZWINE BIVHILI YA AMBA: “Maano a mushumi wa biko a ita uri a bvelele ngangoho.”—Mirero 21:5.
