Vhekanyani zwithu nga nḓila yavhuḓi. Bivhili i ri eletshedza uri: ‘Ni ḓivhe zwine zwa vha zwa ndeme vhukuma.’ (Vhafilipi 1:10) Itani mutevhe wa zwine na tea u zwi ita. Naho zwithu zwoṱhe zwine zwa vha kha mutevhe waṋu zwi zwa ndeme, zwiṅwe ndi zwa ndeme u fhira zwiṅwe. Itani zwine zwa vha zwa ndemesa u thoma. *

Ivhani na mbonelaphanḓa. Muhuweleli 10:10 i ri: “Arali tshishumiswa tsha tsimbi tsho gomala, muthu a si tshi ṱuṱule, u ḓo fanela u shumisesa maanḓa. Fhedzi vhuṱali vhu ḓo mu thusa uri a bvelele.” Ri guda mini? Ḓilugiseni hu tshee nga phanḓa, arali na ita nga u ralo, zwi ḓo ni thusa uri ni shumise tshifhinga tshaṋu nga nḓila i bvelelaho. Vhetshelani thungo nahone ni sendele kule na mishumo i si ya ndeme ine ya ni fhedzela tshifhinga na nungo dzaṋu. Arali na ṱavhanya u fhedza mishumo yaṋu nga tshifhinga, ndi ngani ni sa shumisi tshenetsho tshifhinga u itela u ita mushumo we khamusi na vha no u lugiselela u u ita nga tshiṅwe tshifhinga? Nga u vha na mbonelaphanḓa, ni ita mishumo yo engedzeaho sa munna o ṱalifhaho ane a ḓilugiselela hu tshee nga phanḓa.

Ni ḓidzime zwiṅwe zwithu. Gudani u hana u ita zwithu zwine zwi si vhe zwa ndeme na zwine zwa ni ḽela tshifhinga. U vha na mishumo minzhi nga tshifhinga tshiṱuku zwi nga ni vhangela mitsiko i sa ṱoḓei nahone zwa ita uri ni si takale.

U sa dzhia phetho na u teledza. “Ane a lavhelesa muya ha nga zwali mbeu, na ane a lavhelesa makole ha nga kaṋi.” (Muhuweleli 11:4) Ri guda mini? U teledza zwi ita uri ni si kone u shuma nahone zwi ni ḽela tshifhinga. Rabulasi ane a lindela zwiimo zwi tshi vha zwavhuḓi ha koni u gobela kana u kaṋa zwe a lima. Nga hu fanaho, na riṋe ri nga tendela zwiimo zwine zwi si vhe zwavhuḓi zwa shango zwi tshi ita uri u ḓidzhiela phetho riṋe vhaṋe zwi vhonale zwi tshi konḓa. Khamusi ri nga vhona zwo tea uri ri lindele uri ri thome ri wane mafhungo o engedzeaho uri ri kone u dzhia phetho. Ndi ngoho, ri fanela u ita ṱhoḓisiso na u ḓivha zwo engedzeaho ri sa athu u dzhia phetho dza ndeme. Mirero 14:15 i ri: “Wa vhuṱali u elekanya nga ha zwine a ḓo zwi ita.” Fhedzi ngoho ndi ya uri zwi a konḓa u dzhia phetho.​—⁠Muhuweleli 11:6.

U ḓivhona ri vha khwine. Yakobo 3:17 i ri: ‘Vhuṱali vhu bvaho ṱaḓulu [kana vhu bvaho kha Mudzimu] vhu ita uri muthu a humbulele.’ Ngoho ndi ya uri u lavhelela uri riṋe vhaṋe ri ite zwithu zwavhuḓi zwi a khoḓea. Fhedzi nga zwiṅwe zwifhinga zwi nga ita uri ri pfe ri tshi kulea nungo nahone ra kundelwa. Sa tsumbo, muthu ane a khou guda luṅwe luambo u fanela u dzula a tshi zwi ḓivha uri a nga ita vhukhakhi, musi a tshi ita honoho vhukhakhi u fanela u guda kha vhukhakhi hawe. Muthu ane a ḓidzhia e wa khwine zwi nga mu konḓela vhukuma nga nṱhani ha uri ha ṱoḓi u ita vhukhakhi nahone zwenezwo zwi mu kundisa u guda. Ndi khwine u ḓiṱukufhadza! Mirero 11:2 i ri: “Vhuṱali vhu na vha ḓiṱukufhadzaho.” Vhane vha ḓiṱukufhadza a vha ḓikukumusi nahone vha takalela mishumo ya zwanḓa zwavho.

Linganyiselani tshifhinga tsha u shuma na tsha u ḓimvumvusa. “Ndi khwine u vha na zwo eḓanaho tshanḓani tshithihi tshi awelaho u fhira u vha na zwinzhi zwanḓani zwivhili zwi shumaho nga maanḓa hu u pandamedza muya.” (Muhuweleli 4:6) Kanzhi ane a shumesa ha na tshifhinga tsha u takalela mishumo ya zwanḓa zwawe. A vha na tshifhinga tsha u ita zwenezwo. Fhedzi tsilu ḽi peta zwanḓa zwaḽo nahone ḽa tambisa tshifhinga tshine tsha vha tsha ndeme. Bivhili i ṱuṱuwedza uri ri vhe na mavhonele o linganelaho: Shumani nga maanḓa nahone ni ḓifhelwe nga mishumo ya zwanḓa zwaṋu. Heḽi dakalo ndi “tshifhiwa tsha Mudzimu.”​—⁠Muhuweleli 5:19.

Eḓelani lwo linganaho. Muṅwe wa vhaṅwali vha Bivhili o ri: “Ndi ḓo lala nda eḓela nga mulalo.” (Phisalema 4:8) Vhaaluwa vhanzhi vha fanela u eḓela awara dzi ṱoḓaho u vha malo uri vha kone u awela zwavhuḓi na uri vha dovhe vha vhe na maanḓa. Samusi zwo ambiwa kha lwonolo luṅwalo, u eḓela ndi zwavhuḓi, zwi ita uri mivhili yashu i takale nahone mihumbulo yashu i shume zwavhuḓi i na maanḓa. U sa eḓela lwo linganelaho zwi nga ita uri ri si kone u guda, ri pfe ri tshi borea, ri kulee nungo nahone zwenezwo zwi nga ita uri ri ite vhukhakhi na khombo.

Vheani zwipikwa zwine na nga kona u zwi swikelela. “Ndi khwine u ḓiphiṋa nga zwine maṱo a kona u zwi vhona u fhira u tovhola zwine muthu a zwi tama.” (Muhuweleli 6:9) Ri guda mini? O ṱalifhaho ha tendeli mahumbulele o kalulaho a tshi langa vhutshilo hawe, zwihuluhulu mahumbulele a zwithu zwine zwa nga vhonala zwi tshi konḓa vhukuma uri a zwi swikelele. Zwo ralo, ha tendi u kungwa nga ho leluwaho. Nṱhani hazwo, u shuma u tendelana na zwine a nga zwi swikelela, “zwine maṱo [awe] a kona u zwi vhona.”

Humbulani nga ha zwine zwa tea u vha zwa ndeme. Zwenezwi zwi ḓo ni thusa uri ni ite phetho dzavhuḓi na uri ni shumise tshifhinga nga vhuṱali. Ndi mini zwine zwa nga ni thusa uri ni ḓivhe zwine zwa vha zwa ndeme? Vhunzhi ha vhathu vha tenda u livhiswa nga Bivhili musi vha tshi ṱhogomela nḓivho na vhuṱali zwine ya vha nazwo.​—Mirero 2:6, 7.

Itani uri u vha na lufuno zwi vhe zwa ndeme kha inwi. Vhakolosa 3:14 i ri: “Lufuno lu ita uri vhathu vha vhe na vhuthihi nga ho fhelelaho.” Ri nga si takale nga ho fhelelaho arali ri si na lufuno zwihuluhulu muṱani. Vhathu vhane vha ita uri tshelede na mushumo zwi vhe zwa ndeme vhutshiloni havho vha nga si takale. Bivhili i ita uri lufuno lu vhe tshithu tshavhuḓi. Lwo bulwa lunzhi-lunzhi Bivhilini.​—1 Vhakorinta 13:1-3; 1 Yohane 4:8.

Vhetshelani tshifhinga thungo tshine ngatsho na ḓo guda Bivhili u itela u ḓivha Mudzimu nga ho engedzeaho. Muṅwe munna ane a pfi Geoff o vha e na mufumakadzi wavhuḓi na vhana vhavhuḓi, muṱhannga na musidzana nahone a na mushumo wavhuḓi u holelaho vhukuma a tshi shuma sa paramedic. Naho zwo ralo, mushumo wawe wo vha u tshi ita uri a vhone vhathu vha tshi pfa vhuṱungu na u lovha. O ḓivhudzisa a ri: “Naa iyi ndi nḓila ine vhutshilo ha fanela u vha ngayo?” Ḽiṅwe ḓuvha o vhala iṅwe ya bugu dza Ṱhanzi dza Yehova nahone a wana phindulo dzi takadzaho vhukuma.

Geoff o ṱalutshedza mufumakadzi wawe na vhana zwe a zwi guda nahone na vhone vha zwi takalela. Zwenezwo zwo shandukisa muṱa wawe, zwa ita uri vha thome u guda Bivhili na u shumisa tshifhinga tshavho nga vhuṱali. U guda havho Bivhili zwo vha thusa uri vha vhe na fhulufhelo ḽa u tshila tshoṱhe kha shango ḽi si na tshengelo.​—⁠Nzumbululo 21:3, 4.

Tshenzhelo ya Geoff i ita uri ri humbule nga maipfi a Yesu ane a ri: “Hu takala vhane vha ṱhogomela uri vha ṱoḓa u ḓivha Mudzimu.” (Mateo 5:3) Naa no ḓiimisela u vhetshela thungo tshifhinga tshiṱuku u itela u guda Bivhili? Ngoho ndi uri a hu na tshiṅwe tshithu tshine tsha nga ri thusa uri ri shumise tshifhinga tshashu nga vhuṱali lwa vhutshilo hashu hoṱhe.