ZWINE VHATHU VHA ZWI AMBA

Vhathu vhanzhi vha vhona u nga u gembula a zwo ngo khakhea, arali zwi mulayoni. Hu na mifuda ya u gembula i re mulayoni i ngaho lotto nahone yeneyi mifuda i a thusa nga u ḓisa tshumelo tshitshavhani.

ZWINE BIVHILI YA ZWI AMBA

A hu na fhethu Bivhilini hune ya amba nga ha u gembula nga ho livhaho. Fhedzi i amba zwithu zwine zwa sumbedza uri Mudzimu u ḓipfa hani nga u gembula.

U gembula zwine zwa vha u wana tshelede ngeno vhaṅwe vha tshi xelelwa nga tshelede, zwi lwisana na zwine Bivhili ya zwi funza musi i tshi ri: “Ni ḓilinde uri ni si vhe na tseḓa.” (Luka 12:15) U gembula zwi ṱuṱuwedzwa nga u vha na tseḓa. Hu na khunguwedzo nnzhi dzine dza sumbedza uri vhathu vha nga wana tshelede i si na vhukono, arali vha nga gembula. Fhedzi a vha ambi uri vha nga xelelwa nga tshelede ngauri vha a zwi ḓivha uri vhathu vhane vha ṱoḓa u pfuma vha ḓo betsha tshelede nnzhi kha casino. U gembula zwi ita uri vhathu vha vhe na tseḓa, zwi ita uri vha ṱoḓe u wana tshelede nga nḓila yo leluwaho.

U gembula ndi u vha na tseḓa, ngauri u vha u tshi khou wana tshelede ngeno vhaṅwe vha tshi khou xelelwa ngayo. Bivhili i amba uri ni “ṱoḓe zwi vhuyedzaho muṅwe, hu si zwi vhuyedzaho” inwi muṋe fhedzi. (1 Vhakorinta 10:24) Muṅwe wa Milayo ya Fumi wo vha u tshi ri: “U songo emula . . . tshithu tsha muṅwe muthu.” (Ekisoda 20:17) Musi muthu ane a gembula o livhisa ṱhogomelo kha u wana tshelede, u vha a tshi khou fhulufhela uri vhaṅwe vha xelelwe nga tshelede ngeno ene a tshi ḓo i wana.

Bivhili i dovha ya ri tsivhudza uri ri si dzhie u vha na mashudu zwi zwone zwine zwa ita uri ri wane phaṱhutshedzo. Vhathu vha Isiraele ḽa kale a vho ngo tsha vha na lutendo nahone vha thoma u “lugiselela mudzimu wa Mashudu Mavhuya ṱafula.” Naa Mudzimu o vha o vha tendela uri vha gwadamele “mudzimu wa Mashudu Mavhuya”? Hai, Yehova o ri: “No bvela phanḓa ni tshi ita zwi sa ntakadzi, na nanga zwine zwa ntsinyusa.”​—Yesaya 65:11, 12.

Ndi ngoho uri kha maṅwe mashango, tshelede ine ya shumiswa kha u gembula i a shumiswa kha u badela tshumelo ya tshitshavha, sa u badelela tshikolo, zwa ikonomi na zwiṅwe. Naho yeneyo tshelede i tshi shumiswa u ita zwenezwo zwithu, u gembula zwi ita uri vhathu vha vhe na tseḓa na u humbulela vhone vhaṋe fhedzi.

“U songo emula . . .  tshithu tsha muṅwe muthu.”​—Ekisoda 20:17.

ZWINE BIVHILI YA ZWI AMBA

Bivhili i amba uri “vho ḓiimiselaho u pfuma vha wela mulingoni na tshikwekweni na nyemuloni nnzhi dza vhutsilu dzi huvhadzaho, zwine zwa ita uri vha fheliswe.” (1 Timotheo 6:9) U gembula zwi ṱuṱuwedzwa nga tseḓa nahone tseḓa i a tshinyadza, ndi ngazwo Bivhilini “tseḓa” i tshi vhalwa vhukati ha mikhwa ine muthu a tea u i iledza.​—Vhaefesa 5:3.

U gembula zwi ita uri muthu a livhise ṱhogomelo kha u pfuma nga hu leluwaho, zwine zwa ita uri muthu a fune tshelede, zwine Bivhili ya amba uri ndi “mudzi wa zwithu zwoṱhe zwivhi.” Muthu a nga thoma u langiwa nga lutamo lwa u funa tshelede, zwa ita uri a tsikeledzee nga ho kalulaho na u tshinya vhushaka hawe na Mudzimu. Bivhili i amba uri vhane vha funa tshelede vha “ḓivhangela maṱungu” nga lwa pfanyisedzo.—1 Timotheo 6:10.

U vha na tseḓa zwi ita uri muthu a sa fushee, ha tsha fushea nga zwine a vha nazwo nahone zwi ita uri a sa takale. “Ane a funa siḽiva a nga si fushee ngayo na ane a funa lupfumo ha fushei ngalwo.”—Muhuweleli 5:10.

Vhanzhi vhe vha ungeledzwa uri vha gembule vho no vha na dzema ḽa u gembula. Yeneyi thaidzo i hoṱhe-hoṱhe. Hu anganyelwa uri kha ḽa Amerika fhedzi, hu na vhathu vha dzimiḽioni vha re na dzema ḽa u gembula.

Muṅwe murero u ri: “Ifa ḽo waniwaho nga tseḓa a ḽi nga ḓo vha na phaṱhutshedzo mafheleloni.” (Mirero 20:21) Thaidzo ya u gembula yo ita uri vha re na ḽeneḽo dzema vha vhe na zwikolodo, vha xelelwe na nga mishumo yavho, mbingano na khonani. Muthu a nga kona u iledza masiandoitwa ane a vhangwa nga u gembula, ane a nga kwama vhutshilo hawe na dakalo ḽawe, nga u tevhedza vhulivhisi vhu re Bivhilini.

“Vho ḓiimiselaho u pfuma vha wela mulingoni na tshikwekweni na nyemuloni nnzhi dza vhutsilu dzi huvhadzaho, zwine zwa ita uri vha fheliswe.”​—1 Timotheo 6:9.