Bivhili i a amba nga ha vhanna na vhafumakadzi vha vhukuma vhe vha tshenzhela maḓipfele o fhambanaho. Musi ri tshi khou vhala tshenzhelo dzavho Bivhilini, ri nga wana uri hu na muṅwe we a vha e na maḓipfele ane a fana na ashu.

Roṱhe ri a ṱoḓa u ḓivha uri vhaṅwe vha a pfesesa nḓila ine ra ḓipfa ngayo. Zwenezwo ndi zwa ndeme vhukuma musi ri tshi khou lwisana na vhulwadze ha muhumbulo. Musi ri tshi vhala Bivhili, ri guda nga ha vhaṅwe vhe vha humbula na u ḓipfa nga nḓila ine riṋe ra ḓipfa ngayo. Zwenezwi zwi ita uri ri vhone uri a ri roṱhe, na vhaṅwe vho ḓipfa nga u ralo musi vha tshi khou lwisana na mbilaelo dzine dza thithisa nḓila ine vha ḓipfa ngayo.

• Bivhili i amba nga ha vhathu vhanzhi vhe na vhone vha ḓipfa vho neta nahone vho hanganea. Naa na inwi no no vhuya na pfa u nga ni nga si tsha kona u konḓelela? Mushe, Elia na Davida vho ḓipfa nga u ralo.​—Numeri 11:14; 1 Dzikhosi 19:4; Phisalema 55:4.

• Bivhili i ri vhudza nga ha Hanna we a pfa o “ṱungufhala vhukuma” ngauri o vha a sa koni u wana vhana nahone muhadzinga wawe a tshi dzulela u mu kolela.​—1 Samuele 1:6, 10.

• Bivhili i ri vhudza nga ha Yobo ane khamusi ri nga vha ri tshi ḓipfa u fana nae. Naho o vha e munna a re na lutendo luhulu, o vhaisala vhukuma lwe a tsikeledzea a amba uri: “Ndi nengwa vhutshilo hanga; a thi tsha ṱoḓa u tshila.”​—Yobo 7:16.

Musi ri tshi guda nga ha vhenevha vhabvumbedzwa vha Bivhili vhe vha kona u kunda mahumbulele a si avhuḓi, na riṋe ri nga kona u wana maanḓa a u konḓelela musi ro tsikeledzea.