1. Vhambedzani mavhonele a vhathu o ḓoweleaho nga ha u vha phuli na zwe zwa ṱuṱuwedzwa kha Vharoma 12:11.

NḒILA ine Vhakriste vha dzhia ngayo u vha phuli, yo fhambana vhukuma na zwine vhathu vhanzhi vha humbula zwone. Mihumbuloni yavho, u vha phuli zwi amba u farwa luvhi na u tsikeledzwa. Fhedzi Ipfi ḽa Mudzimu ḽo hevhedzwaho ḽi amba nga ha vhupuli vhune ha katela u shumela Muṋe a re na lufuno nga u ḓifunela. Zwi re zwone ndi uri musi muapostola Paulo a tshi ṱuṱuwedza Vhakriste vha ḓanani ḽa u thoma ḽa miṅwaha uri vha “shumele Yehova vhunga phuli,” o vha a tshi khou vha ṱuṱuwedza uri vha ite tshumelo khethwa nga nṱhani ha uri vha funa Mudzimu. (Vharoma 12:11) Vhupuli honovhu vhu katela mini? Ri nga iledza hani u vha phuli ya Sathane na shango ḽawe? Nahone ndi afhio malamba a u shuma nga u fulufhedzea sa phuli ya Yehova?

2. (a) Ndi mini zwe zwa vha zwi tshi nga ita uri phuli ya Muisiraele i litshe tshibuli tsha uri i vhofhololwe? (b) Ndi mini zwe zwa vha zwi tshi sumbedzwa nga u phula nḓevhe ya phuli ya u ḓifunela?

² Kha Mulayo we Mudzimu a u ṋea Vhaisiraele, ri guda nga ha mufuda wa vhupuli vhune Yehova a vhu ṱoḓa kha riṋe. Phuli ya Muheberu yo vha i tshi ṋewa mbofholowo nga ṅwaha wa vhusumbe kha vhupuli hayo. (Ek. 21:2) Naho zwo ralo, Yehova o ita ndugiselelo yavhuḓi u itela phuli ye ya vha i tshi funa vhukuma muṋe wayo nahone i na lutamo lwa u bvela phanḓa i tshi mu shumela. Muṋe o vha a tshi fanela uri a imise phuli yawe tsini ha vothi kana muhangammbwa nahone a i phule nḓevhe nga murumbulo. (Ek. 21:5, 6) Ndi zwithu zwi swayeaho uri enea maitele o vha a tshi katela nḓevhe. Nga Luheberu, muhumbulo wa u thetshelesa u ṱaluswa nga ipfi ḽine ḽa tshimbidzana na u pfa. Phuli ya u ḓifunela yo vha i na lutamo lwa u bvela phanḓa i tshi shumela muṋe wayo. Zwenezwi zwi ri thusa u dzhiela nṱha zwine u ḓiṋekedza kha Yehova zwa katela zwone—u thetshelesa Mudzimu nga u ḓifunela zwi ṱuṱuwedzwa nga lufuno lune ra vha nalwo.

3. U ḓiṋekedzela hashu kha Mudzimu zwo thewa kha mini?

 ³ Musi ri tshi lovhedzwa sa Vhakriste, ro vha ro no dzhia phetho ya u shumela Yehova, ya u vha phuli yawe. Ro ḓiṋekedzela nga nṱhani ha uri ri tama u thetshelesa Yehova na u ita zwine a zwi funa. A hu na muthu we a ri kombetshedza u ita nga u ralo. Ndi ngoho uri na vhaswa vhane vha lovhedzwa vha ita zwenezwo musi vho no dzhia phetho ya muthu nga eṱhe ya u ḓiṋekedzela kha Yehova, hu si nga nṱhani ha u ṱoḓa u takadza vhabebi vhavho. U ḓiṋekedza hashu ha Vhukriste zwo thewa kha lufuno lune ra vha nalwo kha Muṋe washu wa ṱaḓulu, Yehova. Muapostola Yohane o ṅwala uri: “U funa Mudzimu zwi amba uri ri tevhedze ndaela dzawe.”—1 Yoh. 5:3.

4. Ndi mini zwine zwa ṱoḓea arali ri tshi ṱoḓa u vha “vhalanda vha u luga”?

⁴ Ri a livhuha vhukuma nge Yehova a ita uri zwi konadzee uri ri vhe phuli dzawe! Lutendo lwashu kha tshiṱhavhelo tsha Kristo tsha tshirengululi lu ri vhofholola kha dzhogo ya tshivhi. Naho ri songo fhelela, ri fhasi ha vhuvhusi ha Yehova na Yesu nga u ḓifunela. Paulo o ṱalutshedza zwenezwi zwavhuḓi kha luṅwe lwa marifhi awe o hevhedzwaho: “Ivhani vho faho siani ḽa tshivhi, fhedzi ni vhe vha tshilelaho u ita zwine Mudzimu a zwi funa nga Kristo Yesu.” Nga murahu ha zwenezwo a ri: “Naa a ni zwi ḓivhi uri ane na ḓikumedza khae sa vhalanda nahone na thoma u mu thetshelesa, ni vha vhalanda vha onoyo ane na mu thetshelesa, zwine zwa amba uri ni nga kha ḓi vha vhalanda vha tshivhi tshine tsha isa lufuni, kana vhalanda vhane vha thetshelesa vhane vha ḓo pfi vho luga? Fhedzi ri livhuha Mudzimu uri naho kale no vha ni vhalanda vha tshivhi, fhedzi na vho thetshelesa zwi tshi bva mbiluni na ṱanganedza pfunzo ye na funzwa yone. Zwino no vhofhololwa kha tshivhi, no no vha vhalanda vha u luga.” (Vharoma 6:11, 16-18) Ṱhogomelani uri muapostola u amba nga u “thetshelesa zwi tshi bva mbiluni.” Vhukuma, u ḓiṋekedzela hashu kha Yehova zwi ri ita “vhalanda vha u luga.”

5. Ndi ifhio nndwa ya nga ngomu ye roṱhe ra sedzana nayo, nahone ndi ngani?

⁵ Naho zwo ralo, hu na zwithithisi zwine ra fanela u zwi kunda arali ri tshi ṱoḓa u tshila u tendelana na u ḓiṋekedzela hashu. Ro sedzana na nndwa mbili. Ya u thoma, ndi nndwa ye Paulo a vha o sedzana nayo. O ṅwala uri: “Ndi a takalela vhukuma mulayo wa Mudzimu u ya nga zwine nda vha zwone nga ngomu hanga, fhedzi ndi dovha nda vhona muṅwe mulayo miraḓoni yanga une wa lwisana na mulayo u re muhumbuloni wanga nahone wa nnyisa vhuthubwani ha tshivhi tsha mulayo wa tshivhi u re miraḓoni yanga.” (Vharoma 7:22, 23) Na riṋe ri na u sa fhelela he ra hu mamela. Nga zwenezwo, ri dzula ri tshi lwisana na nḓowelo dzashu dza lwa ṋama. Muapostola Petro o ri ṱuṱuwedza uri: “Samusi ni vhathu vho vhofholowaho, ni songo shumisa mbofholowo yaṋu sa tshithu tsha u ḓidzumba uri ni ite vhukhakhi, fhedzi ni i shumise sa vhalanda vha Mudzimu.”—1 Pet. 2:16.

6, 7. Sathane u ita hani uri ḽino shango ḽi vhonale ḽi tshi kunga?

⁶ Nndwa ya vhuvhili ye ra sedzana nayo ndi ya u lwa na ḽino shango ḽine ḽa ṱuṱuwedzwa nga madimoni. Muvhusi wa ḽino shango ane a vha Sathane u shumisa zwihali zwoṱhe u itela uri ri si tsha fulufhedzea kha Yehova na Yesu. U ṱoḓa u ri ita phuli nga u ri linga uri ri ḓiṋekedzele kha ṱhuṱhuwedzo yawe i tshinyadzaho. (Vhalani Vhaefesa 6:11, 12.) Iṅwe nḓila ine Sathane a ita zwenezwo ngayo ndi nga u ita uri shango ḽawe ḽi vhonale ḽi tshi kunga. Muapostola Yohane o sevha a ri: “Arali muthu a tshi funa shango, ha funi Khotsi; ngauri zwoṱhe zwi re shangoni—nyemulo ya ṋama na nyemulo ya maṱo na u ṱongisa zwine muthu a vha nazwo—a zwi bvi ha Khotsi, fhedzi zwi bva shangoni.”—1 Yoh. 2:15, 16.

⁷ Lutamo lwa u vha na zwithu zwi vhonalaho lwo anda shangoni. Sathane u ṱuṱuwedza vhathu uri vha tende uri tshelede i ḓo vha ḓisela dakalo. Ho ḓala mavhengele.  Vhakunguwedzi vha ṱuṱuwedza matshilele a u vha na thundu nnzhi na u ḓimvumvusa. Khamphani dza zwa vhuendi dzi kunguwedza nyendo dza u dalela mashango a manaka-naka dzine kanzhi wa enda na vhathu vha re na mavhonele a shango. Vhukuma, ro tangwa nga muya wa u ṱoḓa u ḓikhwinisa—fhedzi u ya nga zwilinganyo zwa shango.

8, 9. Ndi ifhio khombo ine ya vha hone, nahone ndi ngani?

⁸ Musi a tshi amba nga vhe vha vha vhe tshivhidzoni tsha Vhukriste tsha ḓanani ḽa u thoma ḽa miṅwaha vhe vha vha vho no vha na mavhonele a shango, Petro o ri: “Vha ḓiphiṋa nga u fusha nyemulo dzavho dza ṋama masiari tshivhangalala. Vha tou vha madondo, vha takalela pfunzo dzavho dza vhufhura ngeno vha tshi khou ḽa na inwi. Ngauri vha amba maipfi a u ḓikukumusa a sa ri tshithu. Vha shumisa nyemulo dza ṋama na vhuḓifari vhu shonisaho uri vha kunge vhathu vhane vha kha ḓi tou bva u ponyoka vhukati ha vhane vha tshila nga nḓila yo khakheaho. Vha vha fulufhedzisa mbofholowo, ngeno vhone vhaṋe vhe phuli dza vhuḓifari ho tshinyalaho. Ngauri arali muthu a tshi kundwa nga muṅwe, u vha phuli ya onoyo muthu.”—2 Pet. 2:13, 18, 19.

⁹ U fusha “nyemulo ya maṱo” a zwi vhofhololi muthu. Nṱhani hazwo, u mbo ḓi vha phuli ya muṋe wa ḽino shango, Sathane Diabolo. (1 Yoh. 5:19) Hu na khombo khulwane ya u vha phuli ya zwithu zwi vhonalaho—vhupuli vhune zwa konḓa u bva khaho.

10, 11. Sathane o livhisa ṱhogomelo kha vhafhio ṋamusi, nahone pfunzo ya shango i ita uri vha vhe na vhuleme vhufhio?

¹⁰ Na ṋamusi, Sathane u livhisa ṱhogomelo kha vha si na tshenzhelo, samusi o zwi ita tsimuni ya Edeni. U vutshela vhaswa nga maanḓa. Sathane ha zwi takaleli musi muswa kana muthu naho e ufhio a tshi ḓiṋekedzela u vha phuli ya Yehova nga u ḓifunela. Ḽeneḽi swina ḽa Mudzimu ḽi ṱoḓa vhoṱhe vhane vha ṋekedza vhutshilo havho kha Yehova vha tshi kundelwa u ḓikumedza na u fulufhedzea.

¹¹ Kha ri dovhe ri humbule nga ha tsumbo ya phuli ye ya tenda u phulwa nḓevhe. Yeneyo phuli i nga vha yo pfa vhuṱungu lwa tshifhinganyana; fhedzi vhuṱungu honoho ho mbo ḓi fhira, ya sala i na luswayo lwa tshoṱhe lwa u vha phuli. Zwi fanaho na zwenezwo, u khetha buḓo ḽo fhambanaho na ḽa thangana dzau dza murole zwi nga konḓa na u vhavha kha muthu muswa. Sathane u ṱuṱuwedza mahumbulele a uri u vha na mushumo kha ḽino shango zwi ḓo fusha muthu, fhedzi Vhakriste vha fanela u dzhiela nzhele ndeme ya u fusha ṱhoḓea yavho ya muya. Yesu o funza a ri: “Hu  takala vhane vha ṱhogomela uri vha ṱoḓa u ḓivha Mudzimu.” (Mat. 5:3) Vhakriste vho ḓiṋekedzelaho vha tshilela u ita zwi funwaho nga Mudzimu, hu si Sathane. Vha takalela mulayo wa Yehova, nahone vha elekanya ngawo masiari na vhusiku. (Vhalani Psalme ya 1:1-3.) Naho zwo ralo, khoso nnzhi ṋamusi a dzi ṋei mushumeli wa Yehova tshifhinga tsho eḓanaho tsha u elekanya na u fusha ṱhoḓea yawe ya lwa muya.

12. Ndi khetho ifhio ye vhaswa vha sedzana nayo ṋamusi?

¹² Muṋe wa shango a nga konḓisela phuli ya Mukriste vhutshilo. Kha vhurifhi hawe ha u thoma he a vhu ṅwalela Vhakorinta, Paulo o vhudzisa uri: “Naa wo vhidzwa u mulanda?” Nga murahu ha zwenezwo a vha eletshedza uri: “Zwenezwo zwi songo u dina; fhedzi arali u tshi nga kona u vhofholowa, shumisa tshenetsho tshibuli.” (1 Vhakor. 7:21) Zwo vha zwi khwine u vhofhololwa vhupulini. Ṋamusi, mashangoni manzhi mulayo uri vhana vha fanela u ya tshikoloni u swikela miṅwaha yo vhewaho. Nga murahu ha zwenezwo, vhagudiswa vha ṋewa mbofholowo ya u ḓikhethela. U bvela phanḓa nga pfunzo ya shango u itela uri u vhe na vhumatshelo kha ḽino shango zwi nga ita uri muthu a si vhe na mbofholowo ya u tovhola tshumelo ya tshifhinga tsho ḓalaho.—Vhalani 1 Vhakorinta 7:23.

13. Ndi pfunzo ya mufuda-ḓe ine ya ḓo vhuyedza vhukuma vhashumeli vha Yehova?

¹³ Paulo o sevha Vhakriste vha Kolosa a ri: “Itani vhungoho ha uri hu si vhe na muthu ane a ni thuba nga pfunzo dza maṱali na vhufhura ha sialala ḽa vhathu, u ya nga zwithu zwa mutheo zwa shango, hu si u ya nga Kristo.” (Vhakol. 2:8) “Pfunzo dza maṱali na vhufhura ha sialala ḽa vhathu” zwi a vhonala ṋamusi kha mahumbulele a shango ane a ṱuṱuwedzwa nga vhaḓivhi vhanzhi. Pfunzo ya nṱha ine ya ombedzela u funzea, kanzhi a i thusi vhagudiswa uri vha ḓivhe mushumo, nahone zwenezwo zwi nga ita uri vha si kone u tandulula thaidzo dzine vha ṱangana nadzo vhutshiloni ha ḓuvha ḽiṅwe na ḽiṅwe. Zwo fhambanaho na zwenezwo, vhashumeli vha Yehova vha khetha pfunzo ine ya vha thusa uri vha vhe na vhutsila vhu ṱoḓeaho u itela uri vha vhe na vhutshilo vhu leluwaho vha tshi khou shumela Mudzimu. Vha dzhiela nṱha nyeletshedzo ye Paulo a i ṋea Timotheo musi a tshi ri: “Ndi ngoho uri u ḓikumedza kha Mudzimu zwi a vhuyedza vhukuma arali ri tshi fushea nga zwine ra vha nazwo. Ngauralo, arali ri na zwiḽiwa na zwa u fuka, nga ri fushee nga zwenezwo zwithu.” (1 Tim. 6:6, 8) Nṱhani ha u ṱoḓa dzidigirii na maṅwalo ane a vha ambelela, Vhakriste vha ngoho vha livhisa  ṱhogomelo kha u wana ‘maṅwalo a u themendela’ nga u ṱanganela nga vhuḓalo vhuḓinḓani ha tsimu nga hune zwa nga konadzea ngaho.—Vhalani 2 Vhakorinta 3:1-3.

14. U ya nga Vhafilipi 3:8, Paulo o dzhia hani ndugelo yawe ya u vha phuli ya Mudzimu na Kristo?

¹⁴ Ṱhogomelani mafhungo a muapostola Paulo. O vha o funzwa nga mugudisi wa Mulayo wa Tshiyuda ane a pfi Gamaliele. Pfunzo ye Paulo a i wana i nga vhambedzwa na pfunzo ya yunivesithi ṋamusi. Fhedzi Paulo o dzhia hani yeneyo pfunzo musi a tshi i vhambedza na ndugelo yawe ya u vha phuli ya Mudzimu na Kristo? O ṅwala uri: “Ndo ṱutshela zwithu zwoṱhe ndi tshi itela nḓivho ya ndeme vhukuma ya Kristo Yesu Murena wanga.” Nga murahu a dovha a ri: “Nga nṱhani hawe, ndo ṱutshela zwithu zwoṱhe nahone nda zwi dzhia zwi mathukhwi, uri ndi wane Kristo.” (Vhafil. 3:8) Honohu u ḓiṱolisisa hu nga thusa Vhakriste vhaswa na vhabebi vhavho vha ofhaho Mudzimu uri vha ite khetho ya vhuṱali musi zwi tshi ḓa kha pfunzo. (Sedzani zwifanyiso.)

15, 16. Ndi pfunzo ifhio ine ndangulo ya Yehova ya i ṋea, nahone i livhisa ṱhogomelo kha mini?

¹⁵ Vhuimo ndi vhufhio magudedzini manzhi a ḽino shango a pfunzo ya nṱha? Kanzhi ndi fhethu hu re na khakhathi dza zwa dzipolitiki na dza tshitshavha. (Vhaef. 2:2) Zwo fhambanaho na zwenezwo, ndangulo ya Yehova i ṋea pfunzo ya nṱhesa tshivhidzoni tsha Vhukriste tshi re na mulalo. Muṅwe na muṅwe washu u na tshibuli tsha u vhuyelwa nga Tshikolo tsha Vhuḓinḓa ha lwa Ṱaḓulu vhege iṅwe na iṅwe. Hu dovha ha vha na khoso dzo khetheaho dza vhahashu vha tshinnani vha songo vhingaho vha vhavulanḓila (Tshikolo Tsha Bivhili Tsha Vhahashu Vha Tshinnani Vha Songo Vhingaho), na dza vhavhingani vha vhavulanḓila (Tshikolo Tsha Bivhili Tsha Vhavhingani Vha Vhakriste). Yeneyo pfunzo ya lwa ṱaḓulu i ri thusa u thetshelesa Yehova, Muṋe washu wa ṱaḓulu.

¹⁶ U itela u wana lupfumo lwa muya, ri nga ita ṱhoḓisiso kha Watch Tower Publications Index kana kha Watchtower Library i re kha CD-ROM. Yeneyi pfunzo i livhisa ṱhogomelo kha vhurabeli ha Yehova. I ri funza nḓila ya u thusa vhaṅwe uri vha pfumedzane na Mudzimu. (2 Vhakor. 5:20) Zwenezwo zwi ḓo vha thusa uri na vhone vha kone u funza vhaṅwe.—2 Tim. 2:2.

17. U khetha pfunzo ya nṱhesa zwi na malamba afhio?

¹⁷ Kha tshifanyiso tsha Yesu tsha dzitalente, vhalanda vhavhili vha fulufhedzeaho vho khoḓwa na u takalelwa nga muṋe wavho nga u ṋewa mushumo wo engedzeaho. (Vhalani Mateo 25:21, 23.) U khetha pfunzo ya nṱhesa ṋamusi zwi ri ḓisela dakalo na malamba. Ṱhogomelani tsumbo ya Michael. O vha o phasa zwavhuḓi tshikoloni lwe vhadededzi vhawe vha mu ramba muṱanganoni wa uri vha haseledze nga ha u ya yunivesithi. Zwe zwa vha mangadza ndi uri Michael o khetha khoso pfufhi ye nga murahu ya mu thusa u ḓiṱhogomela sa muvulanḓila wa tshifhinga tshoṱhe. Naa u ḓipfa u nga o xelelwa nga zwiṅwe zwithu? O ri: “Pfunzo ya lwa ṱaḓulu ye nda i wana sa muvulanḓila—na zwino sa muhulwane wa tshivhidzo—yo vha ya ndeme vhukuma. Phaṱhutshedzo na ndugelo dzine nda vha nadzo dzi fhira kule tshelede naho i ifhio ye nda vha ndi tshi nga vha ndo i wana. Ndo takala vhukuma nge ndi si khethe u tovhola pfunzo ya nṱha.”

18. Ndi mini zwine zwa ni ṱuṱuwedza u khetha pfunzo ya nṱhesa?

¹⁸ Pfunzo ya nṱhesa i ri funza zwine Mudzimu a zwi funa nahone ya ri thusa u vha phuli dza Yehova. I ri ṋea tshilavhelelwa tsha u “vhofhololwa vhupulini ha u sina” na u wana “vhugala ha vhana vha Mudzimu vho vhofholowaho.” (Vharoma 8:21) Zwihuluhulu, ri guda nḓila ya u sumbedza uri ri funa Muṋe washu wa ṱaḓulu, Yehova nga mbilu dzashu dzoṱhe.—Ek. 21:5.