Naa Mudzimu u ḓo tendela vhathu vha tshi bvela phanḓa vha tshi vhusana na u vhea vhumatshelo ha vhathu khomboni? Hai, samusi ro zwi vhona, u ḓo dzhenelela nahone a fhelisa maṱhupho na u tsikeledzea zwe zwa vha zwi hone u bva kale. Musiki wa vhathu na ḽifhasi u ṱoḓa uri ni ḓivhe uri tshifhinga tshawe tshi khou swika tshau dzhia vhukando. U bvukulula hani yeneyo nḓivho ya ndeme?

Ṱhogomelani tshifanyiso hetshi: Musi ni tshi khou tshimbila nga goloi, ni nga thoma na sedza nḓila kha Inthanethe, mimapa na vhulivhisi ho ṅwalwaho fhasi. Nga zwenezwo, musi ni tshi vhona tswayo na zwifhaṱo zwine zwa tshimbidzana na hune na khou ya hone, zwi ita uri ni vhe na fulufhelo ḽa uri ni tsini na hune na khou ya hone. Nga hu fanaho, Mudzimu o ri ṋea Ipfi ḽawe, ḽine ḽa ṱalusa tshanduko dzine dza ḓo kwama shango ḽoṱhe. Musi ri tshi vhona zwenezwo zwiga zwi tshi ḓadzea, ri vha na vhungoho ha uri ri kha tshifhinga tshine tsha khou ya vhufheloni.

Bivhili i ṱalutshedza uri ḓivhazwakale ya shango i ḓo swika kha tshifhinga tsho khetheaho, tshi konḓaho tshine tsha ḓo itea vhufheloni. Tshenetsho tshifhinga tshi ḓo vha tshi zwiitea zwo ṱanganaho zwa shango ḽoṱhe na zwiimo zwo fhambanaho na zwa ḓivhazwakale ya vhathu. Ṱhogomelani zwiṅwe zwiga zwo ambiwaho Ipfini ḽa Mudzimu.

1. KHAKHATHI SHANGONI ḼOṰHE Vhuporofita ho ṅwalwaho kha Mateo ndima ya 24 vhu na mutevhe wa zwiitea zwa kha ḽifhasi zwine zwa ṱanganyisa zwiga zwoṱhe. Zwiga zwenezwo zwi ḓo sumbedza “vhufhelo ha ano maitele a zwithu” nahone ha livhisa kha tshifhinga tsha musi “vhufhelo vhu tshi ḓo ḓa.” (Ndimana 3, 14) Zwenezwi zwi katela zwithu zwine ra zwi vhona zwi nga ho dzinndwa, u ṱahela ha zwiḽiwa, midzinginyo fhethu ho fhamba-fhambanaho, u engedzea ha vhuvhi, u fhungudzea ha lufuno na vhukwila vhu itwaho nga vharangaphanḓa vha vhurereli u itela u xedza vhathu. (Ndimana 6-26) Ndi ngoho uri zwiṅwe zwa zwenezwi zwithu zwi khou itea u bva ḓanani ḽa miṅwaha. Naho zwo ralo, musi vhufhelo vhu tshi khou sendela, zwenezwi zwithu zwoṱhe zwi ḓo itea nga tshifhinga tshithihi tshi konḓaho. Zwi ḓo dovha zwa tevhelwa nga zwiga zwiraru zwa tsevho.

2. MAVHONELE A VHATHU Bivhili i ri “maḓuvhani a vhufhelo”—maḓuvha a ri isaho vhufheloni—a ḓo vhonala nga u ṋaṋa ha mavhonele mavhi a vhathu. Ri a vhala: “Ngauri vhathu vha ḓo funa vhone vhaṋe fhedzi, vha ḓo vha vhafuni vha tshelede, vhazuwi, vhadzia-u-ḓihudza, vhadzia-maṱamba, vha sa thetshelesi vhabebi, vha sa livhuhi, vha sa fulufhedzei, vha si na lufuno, vha songo ḓiimiselaho u vhofha thendelano naho i ifhio, vhadzia-zwitshele, vha sa koni u ḓifara, vhadzia-khakhathi, vha sa funi zwivhuya, vhafheṱi, vhadzia-swili, vhane vha ḓikukumusa, vhane vha funa miḓifho u fhira Mudzimu.” (2 Timotheo 3:1-4) Ndi ngoho uri u sa ṱhonifhana ha vhathu a zwo ngo thoma zwino, ndi “maḓuvhani a vhufhelo” fhedzi hune eneo mavhonele a ḓo ṋaṋa, lune tshenetsho tshifhinga ra ḓo tshi vhidza “zwifhinga zwi lemelaho zwi konḓaho u sedzana nazwo.” Naa no no vhuya na ṱhogomela eneo mavhonele a shonisaho kha vhathu?

3. ḼIFHASI ḼI KHOU TSHINYADZWA Bivhili i ri Mudzimu u ḓo “lozwa vha tshinyadzaho ḽifhasi.” (Nzumbululo 11:18) Vhathu vha ḓo tshinyadza ḽifhasi nga nḓila-ḓe? Tshifhinga tshee Noaxe a tshila khatsho tsho ṱaluswa nga nḓila i fanaho: “Shango ḽa ḓi ṋaṋisa u tshinya ḽi tshi ya Mudzimu a tshi zwi vhona, ha ḓala zwa mavemu shangoni. Huno Mudzimu a tshi vhona shango a wana ḽó tshinyala.” Nga zwenezwo, Mudzimu o amba nga ha vhenevho vhatshinyi a ri: “Zwino ndi ḓo vha fhedza.” (Genesi 6:11-13) Naa no no ṱhogomela vhuṱanzi ho engedzeaho ha uri ḽifhasi ḽi khou ṋaṋa nga vhuvemu? Zwiṅwe hafhu, vhathu vha kha vhuimo ho khetheaho kha ḓivhazwakale: Vha na vhukoni ha u tshinyadza ḽifhasi nga u fhelisa vhathu vhoṱhe vha re khaḽo. Vha na zwihali. Nahone ḽifhasi ḽi khou tshinyadzwa nga iṅwe nḓila. Zwithu zwine zwa tikedza vhutshilo kha ḽifhasi—muya une ra u fema, zwipuka na zwimela, lwanzhe—zwi bvela phanḓa zwi tshi tshinyadzwa ngauri vhathu a vha khou zwi shumisa nga nḓila yo teaho.

Ḓivhudziseni uri, ‘Naa ḓanani ḽa miṅwaha ḽo fhiraho, vhathu vho vha vhe na maanḓa a u tshinyadza  ḽifhasi?’ Fhedzi ṋamusi vhathu vha khou bveledza maanḓa eneo nga u ita zwihali zwo bvelaho phanḓa na nga u tshinyadza mupo. Zwishumiswa zwa thekinolodzhi zwi khou kandela phanḓa nahone zwenezwo zwi ita uri vhathu vha kundelwe u pfesesa kana u langa masiandoitwa. Naho zwo ralo, vhumatshelo ha ḽifhasi a vhu ho zwanḓani zwa muthu. Musi vhutshilo hoṱhe ha kha ḽifhasi vhu sa athu u fheliswa, Mudzimu u ḓo dzhenelela a fhelisa vha tshinyadzaho ḽifhasi. Ḽeneḽo ndi fulufhedziso ḽawe!

4. MUSHUMO WA U HUWELELA WA SHANGO ḼOṰHE Tshiṅwe tshipiḓa tsha tshiga tsha vhufhelo tsho dzula tsho amba nga ha mushumo muhulwane: “Mafhungo maḓifha aya a Muvhuso a ḓo ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe, nga murahu ndi hone vhufhelo vhu tshi ḓo ḓa.” (Mateo 24:14) Ḽeneḽi fulo ḽa u huwelela ḽi ḓo fhambana vhukuma na pfunzo nnzhi dza vhurereli dze dza funzwa u bva ḓanani ḽa miṅwaha. Maḓuvhani a vhufhelo, mulaedza wo khetheaho wa “mafhungo maḓifha aya a Muvhuso,” u ḓo ombedzelwa nga ho livhaho. Naa ni a ḓivha tshigwada tsha vhurereli tshine tsha ombedzela wonoyo mulaedza? Naho vhaṅwe vha tshi vhonala u nga vha khou huwelela mulaedza wo raloho, naa ndi tshigwada tsha henefho hune na dzula hone kana vho no phaḓaladza enea mafhungo maḓifha “ḽifhasini ḽoṱhe uri zwi vhe vhuṱanzi kha tshaka dzoṱhe”?

Web site ya www.pr418.com i livhisa ṱhogomelo yayo kha “mafhungo maḓifha aya a Muvhuso.” Yeneyi Web site i na khandiso dzi ṱalutshedzaho wonoyo mulaedza nga nyambo dzi fhiraho 700. Naa hu na muṅwe mushumo une na u ḓivha une wa ombedzela mafhungo maḓifha a Muvhuso ḽifhasini ḽoṱhe? Tshifhingani tsho fhiraho, musi Inthanethe i sa athu u vha hone, Ṱhanzi dza Yehova dzo vha dzi tshi ḓivhelwa vhuḓidini hadzo ha u huwelela mafhungo maḓifha a Muvhuso wa Mudzimu. U bva nga 1939, gwati ḽa thero iṅwe na iṅwe ya magazini wa Tshiingamo ḽi sumbedza maipfi ane a ri: “Tshi Ḓivhadzaho Muvhuso wa Yehova.” Bugu i ambaho nga ha vhurereli yo amba uri mushumo wa u huwelela wa Ṱhanzi dza Yehova “a u vhambedzwi na tshithu kha nḓila ine wa huwelela ngayo.” Dzenedzi Ṱhanzi dzi ombedzela mafhungo maḓifha a uri hu si kale “vhufhelo vhu . . . ḓo ḓa” musi Muvhuso wa Mudzimu u tshi dzhia vhukando.

Naa no no ṱhogomela uri vhuṋa ha dzenedzo tsevho dzoṱhe dza Bivhili dzo ṱaluswaho kha ino thero dzi khou vhonala tshifhingani tshaṋu? Lwa miṅwaha i fhiraho ḓana, wonoyu magazini u khou ṋea vhavhali vhawo mafhungo nga ha zwiitea zwa shango u itela u vha thusa uri vha ḓivhe uri ri tsini na vhufhelo. Ndi ngoho uri vhaṅwe vha a timatima naho hu  na vhuṱanzi vhu pfalaho nahone vha phetha nga ḽa uri zwi ya nga mahumbulele a muthu nga eṱhe nahone zwi nga shandulwa. Vha dovha vha amba uri samusi u davhidzana ha shango hu tshi khou ḓi bvela phanḓa hu tshi engedzea, vhuimo ha shango vhu vhonala vhu tshi khou ṋaṋa. Naho zwo ralo, vhuṱanzi vhu khou bvela phanḓa vhu tshi sumbedza uri ri magumoni a tshifhinga tsho khetheaho tsha ḓivhazwakale ya vhathu.

Vhaṅwe vhaḓivhi vha amba uri ri tsini na u vhona tshanduko khulu kha ḽeneḽi ḽifhasi. Sa tsumbo, nga 2014, Science and Security Board of the Bulletin of the Atomic Scientists yo sevha United Nations Security Council nga ha zwithu zwihulu zwi vheaho vhutshilo ha vhathu vhoṱhe khomboni. Vhorasaintsi vho amba uri: “U ṱolisisa dzenedzo khombo nga vhuronwane zwo ri ita uri ri phethe nga ḽa uri zwishumiswa zwa thekinolodzhi zwine zwa nga ita khombo khulu zwi kha ḓi vha zwinzhi.” Vhathu vhanzhi vha khou tenda nga ho engedzeaho uri ro swika kha tshifhinga tsha ndeme vhukuma kha ḓivhazwakale ya shango. Vhagandisi vha yeneyi magazini na vhunzhi ha vhavhali vhayo a vha timatimi uri tshenetshi tshifhinga tsho khetheaho ndi maḓuvha a vhufhelo na uri vhufhelo vhu tsini. Fhedzi nṱhani ha u ofha vhumatshelo, ni nga takalela zwine zwa ḓo ḓa. Ndi ngani zwo ralo? Ngauri ni nga ponyoka vhufhelo!