SAMUSI dzina “mulwa-na-Kristo” hu kale ḽi tshi khou shumiswa kha zwithu zwoṱhe u bva kha mahosi u ya kha mimuvi, ndi zwa nzulele u vhudzisa uri: Ndi nnyi mulwa-na-Kristo? Naa ḽeneḽi ipfi ḽi a shuma na kha riṋe ṋamusi? Zwi tou vha khagala uri fhethu hune ra nga thoma u ṱoḓa vhubvo ha ipfi mulwa-na-Kristo ndi Bivhilini, hune ḽeneḽi ipfi ḽa bvelela luṱanu.

Muṅwali muthihi fhedzi wa Bivhili we a shumisa ipfi “mulwa-na-Kristo” ndi muapostola Yohane. O ṱalusa hani ipfi mulwa-na-Kristo? Ṱhogomela enea maipfi kha vhurifhi hawe ha u thoma: “Inwi vhana, ndi tshifhinga tsha vhufhelo, samusi no zwi pfa uri mulwa-na-Kristo u khou ḓa, na zwino ho no ḓi bvelela vhalwa-na-Kristo vhanzhi; nga zwenezwo ri a ḓivha uri ndi tshifhinga tsha vhufhelo. Vho bva kha riṋe, huno vho vha vhe si vhashu . . . Ndi nnyi muzwifhi arali hu si ane a hanedza uri Yesu ndi ene Kristo? Onoyo ndi mulwa-na-Kristo, ane a hanedza Khotsi na Murwa.”—1 Yohane 2:18, 19, 22.

Ri guda mini kha enea maipfi? Yohane o amba nga ha “vhalwa-na-Kristo vhanzhi,” a tshi sumbedza uri mulwa-na-Kristo a si muthu muthihi, fhedzi ndi tshigwada tsha vhathu. Vhathu kana madzangano vhane vha vha vhalwa-na-Kristo vha phaḓaladza mazwifhi, vha tshi hana uri Yesu ndi Kristo kana Messia nahone vha amba mazwifhi nga ha vhushaka ha Mudzimu na Murwa wawe Yesu Kristo. Vhane vha vha vhalwa-na-Kristo vha ḓivhidza Kristo kana vhaimeleli vhawe, fhedzi ngauri “vho vha vhe si vhashu,” vho ṱutshela ngoho ya pfunzo ya Bivhili. Zwiṅwe hafhu, tshenetshi tshigwada tsho vha tshi hone musi Yohane a tshi ṅwala vhurifhi hawe nga “tshifhinga tsha vhufhelo,” khamusi tsho vha tshi tshifhinga tsha u fhedza tsha vhaapostola vha tshi kha ḓi tshila.

Ndi zwifhio zwiṅwe zwe Yohane a zwi ṅwala malugana na mulwa-na-Kristo? Musi a tshi amba nga ha vhaporofita vha mazwifhi, o sevha a ri: “Mulaedza muṅwe na muṅwe wo hevhedzwaho u ambaho nga ha uri Yesu Kristo o ḓa nga lwa ṋama u bva ha Mudzimu. Fhedzi mulaedza muṅwe na muṅwe wo hevhedzwaho une u si ambe nga ha Yesu a u bvi ha Mudzimu. Zwiṅwe hafhu, ndi mulaedza wo hevhedzwaho wa mulwa-na-Kristo, we na pfa uri u ḓo vha hone, huno zwino wonoyo mulaedza wo no vha shangoni.” (1 Yohane 4:2, 3) Nga zwenezwo, kha vhurifhi hawe ha vhuvhili, Yohane o ombedzela heyi mbuno: “Ho no bvelela vhafhuri vhanzhi shangoni, vhathu vha sa tendi uri Yesu Kristo o ḓa nga lwa ṋama. Onoyo ndi mufhuri na mulwa-na-Kristo.” (2 Yohane 7) Vhukuma, Yohane o vha a tshi pfesesa uri mulwa-na-Kristo ndi vhoṱhe vhane vha phaḓaladza nga khole mazwifhi a vhurereli nga ha Yesu Kristo na pfunzo dza Yesu.

Musi Yohane a sa athu u ṅwala nga ha vhenevha  vhafhuri vha vhurereli, Yesu Kristo o eletshedza vhatevheli vhawe a ri: “Thanyelani vhaporofita vha u zwifha vhane vha ḓa kha inwi vho ambara mikumba ya nngu, ngeno nga ngomu vhe phele dzi re na nḓala.” (Mateo 7:15) Nga hu fanaho, muapostola Paulo o sevha Vhakriste vha Thesalonika a ri: “Ni songo tenda muthu a tshi ni xedza nga nḓila naho i ifhio, ngauri [ḓuvha ḽa Yehova] ḽi nga si swike arali hu songo thoma ha vha na vhugunei na muthu muvhi a sa athu dzumbululwa, murwa ane a ḓo lozwiwa.”—2 Vhathesalonika 2:3.

Nga zwenezwo, ḓanani ḽa u thoma ḽa miṅwaha, vhaporofita vha u zwifha na vhagunei vho vha vho no vha hone, vho ḓiimisela u fhelisa tshivhidzo tsha Vhakriste. Vhoṱhe vhe vha vha vha tshi kwamea kha u phaḓaladza mazwifhi na u fhura vhathu nga ha Yesu Kristo na pfunzo dzawe, Yohane o vha vhidza “mulwa-na-Kristo.” Nḓila ye Paulo a vha ṱalusa ngayo sa “murwa ane a ḓo lozwiwa” zwi sumbedza nḓila ine Yehova a vha dzhia ngayo.

Hu pfi mini ṋamusi? Vhathu na madzangano ane a lwa na Kristo, vha kha ḓi hanedza Kristo na pfunzo dzawe. Vha phaḓaladza nga khole mazwifhi na u fhura vhathu, vhe na tshipikwa tsha u ita uri vhathu vha sa ḓivhe Khotsi ane a vha Yehova Mudzimu na Murwa wawe, Yesu Kristo. Ri na tshiitisi tshi pfalaho tsha u ṱhogomela vhufhura ho raloho. Kha ri ṱolisise tsumbo mbili.

Lwa maḓana a miṅwaha, kereke dzo phaḓaladza pfunzothendwa dza Vhuraruthihi, dzi ambaho uri Khotsi na Murwa ndi muthu muthihi. Mulwa-na-Kristo u kanganyisa na u dzumba uri vhathu vha sa ḓivhe uri Yehova Mudzimu na Yesu Kristo ndi nnyi. Yeneyi pfunzo i ita uri vhathu vho lugaho vha sa edzise Yesu Kristo na u sendela tsini na Mudzimu, samusi Bivhili i tshi ṱuṱuwedza uri vha ite nga u ralo.—1 Vhakorinta 11:1; Yakobo 4:8.

Kereke dzi dovha dza kanganyisa vhathu nga u shumisa ṱhalutshedzelo dza Bivhili dzi si na dzina ḽa Mudzimu, Yehova. Dzi ita zwenezwi hu sa londwi uri dzina Yehova ḽi bvelela lu ṱoḓaho u vha 7 000 kha maṅwalo a u thoma a Bivhili. Ho vha na mvelelo dzifhio? U sa ḓivha dzina ḽa Mudzimu wa ngoho zwo ḓi ṋaṋa zwi tshi ya.

Kha ḽiṅwe sia, u ḓivha dzina ḽa Mudzimu, Yehova, zwo thusa vhagwadameli vhanzhi vha mbilu dzavhuḓi u sendela tsini na Mudzimu. Ndi zwe zwa itea kha Richard, ane a humbula nyambedzano yawe na Ṱhanzi dza Yehova mbili. Richard uri: “Vho ntsumbedza Bivhilini uri dzina ḽa Mudzimu wa ngoho ndi Yehova. Ndo takadzwa nga u ḓivha uri Mudzimu u na dzina, zwithu zwe nda vha ndi sa athu u vhuya nda zwi pfa.” U bva nga tshenetsho tshifhinga, o ita tshanduko vhutshiloni hawe dzine dza tendelana na zwilinganyo zwa Bivhili na u takadza Yehova. “U guda nga ha dzina ḽa Mudzimu zwo nthusa u vha na vhushaka ha tsini nae.”

Lwa miṅwaha ya ḓana, mulwa-na-Kristo o ita uri vhathu vhanzhi vha vhe swiswini nga lwa muya. Fhedzi nga u vhala Ipfi ḽa Mudzimu ḽine ḽa vha Bivhili, ri kona u guda nga ha uri mulwa-na-Kristo ndi nnyi zwa vhukuma na u vhofhololwa kha vhurereli ha mazwifhi ha vhalwa-na-Kristo na vhufhura havho.—Yohane 17:17.