THERO I RE KHA GWATI | NAA ZWI A KONADZEA—U TSHILA NGA MURAHU HA U FA?
Hu Itea Mini Musi Muthu A Tshi Fa?
“Ndo vha ndi tshi humbula u nga hu na fhethu huraru hune muthu a ya hone musi o fa: ṱaḓulu, heleni kana phagathori. Ndo vha ndi tshi zwi ḓivha uri ndo vha ndi si muvhuya o lugelaho u ya ṱaḓulu kana muvhi ane a nga ya heleni. Zwo vha zwi si khagala kha nṋe uri hu itea mini zwa vhukuma ngei phagathori. A tho ngo vhuya nda vhona zwiṅwe zwa zwenezwo Bivhilini. Zwo vha zwi zwithu zwe vhathu vha zwi amba.”—Lionel.
“Ndo funzwa uri vhathu vhoṱhe vha ya ṱaḓulu musi vha tshi fa, fhedzi ndo vha ndi sa zwi tendi. Ndo vha ndi tshi humbula u nga lufu ndi ambadzifhele na uri vho faho a vha na vhumatshelo.”—Fernando.
Naa no no vhuya na ḓivhudzisa uri: ‘Hu itea mini musi muthu a tshi fa? Naa vhafunwa vhashu vho faho vha khou shengela huṅwe fhethu? Naa ri ḓo dovha ra vha vhona? Ri nga vha hani na vhuṱanzi?’ Ṱolisisani zwine Bivhili ya funza zwone. Kha ri thome ri ṱolisise zwine Bivhili ya zwi amba nga ha lufu. Nga murahu, ri ḓo haseledza nga ha fulufhelo ḽine Ipfi ḽa Mudzimu, Bivhili ḽa ri ṋea ḽone.
Vhuimo ha vhafu ndi vhufhio?
BIVHILI I A FHINDULA: “Ngauri vha tshilaho vha ḓivha uri vha ḓo fa; vho faho a vha na tshine vha tshi ḓivha; a vha tshee na tshine vha ṋewa, ngauri vho hangwiwa. Zwoṱhe zwine tshanḓa tshau tsha zwi kona, U zwi ite, nga maanḓa au U zwi ite; ngauri ngei vhudzula-vhafu hune wa ya hone, a hu na mushumo, a hu na ngelekanyo, a hu na nḓivho, a hu na vhuṱali.” *—Muhuweleli 9:5, 10.
Vhudzulavhafu ndi fhethu hune vhathu vha ya hone musi vha tshi fa; ndi fhethu kana vhuimo ha lwa pfanyisedzo hune vhathu vho faho vha sa pfe tshithu kana u ita mushumo. Yobo munna a fulufhedzeaho o dzhia hani Vhudzulavhafu? O xelelwa nga thundu dzawe dzoṱhe na vhana vhawe vhoṱhe nga ḓuvha ḽithihi, nahone o rwiwa nga mamota a ṱhoṱhonaho muvhili woṱhe. O humbela Mudzimu, a ri: “Ngavhe wa tou mbulunga vhafuni [“heleni,” u ya nga Douay Version ya Vhakatolika] . . . wó ndzumba.” (Yobo 1:13-19; 2:7; 14:13) Vhukuma, Yobo ho ngo dzhia Vhiḓa ḽi hele ya mulilo, fhethu hune a ḓo tambula vhukuma u fhira nḓila ine a khou tambula ngayo. Nṱhani hazwo, o hu dzhia hu fhethu ha vhuawelo.
Hu na iṅwe nḓila ine ra guda nga ha vhuimo ha vhafu. Ri nga ṱolisisa Bivhilini vhathu vha malo vhe vha vuswa vhafuni.—Sedzani bogisi “ Mvuwo Dza Malo Dze Dza Bulwa Bivhilini.”
A hu na na muthihi kha vhenevho vha malo we a amba nga ha u vha ṱaḓulu kana fhethu hu shengedzwaho. Arali vhathu vhe vha vuswa vho ya henefho fhethu musi vha tshi fa, naa vho vha vha tshi ḓo vha vha songo vhudza vhathu nga hazwo? Nahone naa zwenezwo zwo vha zwi sa ḓo ṅwalwa Bivhilini uri vhathu vhoṱhe vha zwi ḓivhe? Bivhilini, a hu na zwithu zwo raloho. Zwi tou vha khagala uri vhenevho vhathu vha malo vho vha vhe si na zwine vha nga zwi amba nga ha eneo mafhungo. Ndi ngani? Ngauri vho vha vha sa pfi tshithu, zwi tshi tou nga vho eḓela. Zwi re zwone ndi uri nga zwiṅwe zwifhinga Bivhili i fanyisa u eḓela na lufu. Sa tsumbo, musi Lazaro o fa Yesu o ri: “Ndi khou ya henengei uri ndi mu vuse.”—Yohane 11:11.
Nga zwenezwo, ndi ḽifhio fulufhelo nga ha vhafu? Naa vha nga vuwa khofheni?
^ par. 7 Kha New World Translation of the Holy Scriptures, ipfi “Vhudzulavhafu” ḽi shumiswa u bula ipfi ḽa Luheberu ḽine ḽa vha “Sheol” na ipfi ḽa Lugerika ḽine ḽa vha “Hades.” Dziṅwe Bivhili dzi shumisa ipfi ‘hele,’ fhedzi mahumbulele a uri hu na fhethu ha mulilo hune vhafu vha tambudzwa hone, haho Bivhilini.
