LA VERITÀ sora che? Sora arquante domande tanto importante che le persone le se ga belche fato. Par esémpio, dele volte te te ghè belche domandà:

• Sarà che Dio veramente el fa caso de noantri?

• La guera e el sofrimento i se finirà qualche di?

• Cossa che sucede dopo dela morte?

• I morti i viverà nantra volta qua ntela Tera?

• Cossa che me toca far par Dio scoltar le mee orassion?

• Come che te pol catar la vera felicità?

Ndove che te pol catar la risposta a ste domande? Se te ghe domandi a arquante persone, tante volte, le te darà risposte diferente una delʼaltra. Anca se te ghe domandi a quei che i ga autorità religiosa o a quei che i è studiadi e rispetadi, ancora cossita, lori i te darà risposte diferente. Dele volte, ste risposte le è bone par un tempo, ma dopo le resta sensa valor.

Ma ghenʼè un libro che el ga risposte che se pol creder. Lʼè un libro che el ga la verità. In una orassion a Dio, Gesù el ga dito: ‘La toa parola la è la verità.ʼ (João 17:17) Nei giorni de ancoi, noantri cognossemo sta Parola come la Sacra Bìblia. Adesso, te vederè in poche parole le risposte che la Bìblia la da ale domande che te ghè ledesto ntel scomìnsio.

PARCHÉ FAR STA DOMANDA: Semo drio viver in un mondo pien de persone che ghe piase tanto far el mal, un mondo de ingiustìssia. Tante religion le insegna che el nostro sofrimento l’è dela volontà de Dio.

COSSA CHE LA BÌBLIA LA INSEGNA: Dio mai el causa el mal. ‘Distante ze del vero Dio far cose rugne, e del Tuto Poderoso far cose che no le è mia giuste!’, dise Jó 34:10. Dio el ga la intension de far sol el ben par le persone nel mondo. L’è par quela che Gesù el ga insegnà tuti a far sta orassion: ‘Nostro Pare nei cieli, . . . Vegna el too regno. Sìpia fata la toa volontà, come nel cielo, cossita anca ntela tera.’ (Mateus 6:⁠9, 10) Dio el fa tanto caso de tuti noantri che el ga fato sforsi sensa mesura par garantir la realisassion del soo propòsito. — João 3:​16.

Ledi anca Gênesis 1:26-28; Tiago 1:⁠13 e 1 Pedro 5:⁠6, 7.

PARCHÉ FAR STA DOMANDA: La guera ancora la ze drio copar tante persone. Tuti noantri gavemo passà par qualche tipo de sofrimento.

COSSA CHE LA BÌBLIA LA INSEGNA:

Dio el dise che el farà che ghen sìpia pace in tuta la Tera nel futuro. Quando Dio scominsiar a governar del cielo, le persone no le ‘impararà mia pi la gueraʼ. Invesse, lore le ndarà ‘far dele soe spade aradi’. (Isaías 2:⁠4) Dio el finirà con tuta la ingiustìssia e anca col sofrimento. La Bìblia la garante: ‘[Dio] sugarà cada làgrima dei soi ocii, e no ghen sarà mia pi la morte, gnanca pi lamentassion, gnanca clamor, gnanca dolor. Le cose che ghenʼera vanti [anca la ingiustìssia e el sofrimento de ancoi] le ga belche passà.’ — Revelação (Apocalipse) 21:3, 4.

Ledi anca Salmo 37:10, 11; 46:⁠9 e Miqueias 4:⁠1-⁠4.

PARCHÉ FAR STA DOMANDA: Quasi tute le religion le insegna che qualcossa rento dela persona resta ancora viva dopo dela morte del corpo. Ghenʼè de quei che i dise che i morti i pol far el mal o giutar i vivi. Anca, i dise che Dio el castiga le persone rugne, e che le è atormentade par sempre in un inferno de fogo.

COSSA CHE LA BÌBLIA LA INSEGNA:

Quando le persone le more le assa de esistir. ‘I morti . . . no i ze mia pi cossienti [o: no i sa mia] de pròpio gnente’, dise Eclesiastes 9:⁠5. Lora, come che i morti no i sa mia pi de gnente, no i pol mia sentir e far gnente, cossita i pol mia far el mal — gnanca giutar — i vivi. — Salmo 146:3, 4.

Ledi anca Gênesis 3:⁠19 e Eclesiastes 9:⁠6, 10.

PARCHÉ FAR STA DOMANDA: Tuti noantri volemo viver ben e star insieme cola nostra fameia e i amici. Lʼè giusto gaver voia de veder nantra volta le persone che ghe piaseino tanto e che le è belche morte.

COSSA CHE LA BÌBLIA LA INSEGNA:

Quasi tuti quei che i ze morti i ndarà ressussitar. Questa la è una promesa de Gesù: ‘I morti che i ze nei sepolcri . . . i vegnarà fora.ʼ (João 5:⁠28, 29) Come lʼèra par esser nel prinsìpio, i ressussitadi i gavarà la oportunità de viver par sempre nel paradiso qua ntela Tera. (Lucas 23:43) Nel futuro che Dio el promete, le persone che lo scolta i gavarà sempre salute e i viverà par tuta la eternità. La Bìblia la dise: ‘I giusti, si lori pròpio, i ndarà ricever la tera e i viverà par sempre sora ela.’ — Salmo 37:⁠29.

Ledi anca Jó 14:14, 15; Lucas 7:11-17 e Atos 24:⁠15.

PARCHÉ FAR STA DOMANDA: Persone de quasi tute le religion le fa orassion. Ma tanti i cata no ver mia risposte ale soe orassion.

COSSA CHE LA BÌBLIA LA INSEGNA:

Gesù el ga insegnà a tuti par no far mia le orassion sempre cole medèsime parole. Lu el ga dito: ‘Quando te fè una orassion, no sta mia dir le medèsime parole una volta drio lʼaltra.’ (Mateus 6:⁠7) Se volemo che Dio scolte le nostre orassion, gavemo de farle dela soa maniera. Par quela, gavemo de imparar quala che la è la soa volontà e dopo far le orassion come che Lu el vol. Ledemo in 1 João 5:⁠14: ‘No importa cossa che ghe domandemo, secondo la soa volontà, lu scolta a noantri.’

Ledi anca Salmo 65:⁠2; João 14:6, 14 e 1 João 3:⁠22.

PARCHÉ FAR STA DOMANDA: Tanti i cata che la belessa, la fama e i soldi i pol farli felice. Cossita, lori i fa tanti sforsi par ver ste cose — ma, dopo che le ga, i vede che ancora no i è mia felice.

COSSA CHE LA BÌBLIA LA INSEGNA: Gesù el ga mostrà la ciave par la felicità quando el ga dito: ‘Felice i è quei che i sa [o: che i ricognosse] la soa nessessità spiritual.’ (Mateus 5:⁠3) Par catar la vera felicità, gavemo bisogno de saver la verità sora Dio e cossa che El ga in mente far par noantri. Sta verità la ze nela Bìblia. Par saver cossa che lʼè pròpio importante, o che no l’è mia de tanta importànsia, ghe vol che cognossemo sta verità. Quando savemo la verità dela Bìblia e assemo che le nostre decision e la nostra conduta le sìpia orientade par sta verità, lora gavemo una vita de vero contentamento. — Lucas 11:⁠28.

Ledi anca Provérbios 3:⁠5, 6, 13-18 e 1 Timóteo 6:⁠9, 10.

 Queste le è le risposte che la Bìblia la da, in poche parole, a sie domande. Te vol saver de pi? Se te si de quei ‘che i ricognosse la soa nessessità spiritualʼ lora te volerè saver de pi. Pol esser che te gàpie altre domande come queste: ‘Se Dio veramente el fa caso dele persone, parchè che el assa che ghen sìpia tante persone che le fa el mal e anca tanta tribolassion par tanto tempo? Come che se pol ver una vita meio in fameia? La Bìblia la ga risposte che se pol fidarse a queste e a altre tante domande.

Ancoi, tante persone no le lede mia la Bìblia parchè le cata che la è un libro massa grando e, dele volte, mia fàcile de capir. Te piaseria che qualchedun te giutesse a catar ste risposte nela Bìblia? Lora, le Testimònie de Geovà le vol mostrarte due cose che le pol giutarte.

La prima la è el libreto Scolta a Dio e Te Viverè par Sempre, scrito par giutar le persone che le vol saver le risposte che la Bìblia la da. Sto libreto el da risposte giuste e franche a ste domande che le è importante e de tanta nessessità. La seconda la è un stùdio dela Bìblia che no te costarà gnente. Una Testimònia de Geovà, la pol ndar nela toa casa o nantro posto che te vol par giutarte a imparar sora la Bìblia sensa cobrarte gnente. Sto stùdio lʼè fato in un per de minuti par stimana. Milioni de persone nel mondo le ze drio imparar col stùdio dela Bìblia e, cossita, le ga cambià la soa vita par meio. Tante de queste le se ga emossionà quando le se ga dato conta: “Go catà la verità!”

No ghenʼè gnente pi valioso che la verità. La verità dela Bìblia la giuta a libertarse dei insegni falsi, dele busie e de ver massa paura. Sta verità la da a noantri alegria, speransa e un propòsito nela vita. Gesù el ga dito: ‘Cognosseré la verità e la verità la ve libertarà.ʼ — João 8:⁠32.