Cossa che la naturesa la insegna?
Cossa che la naturesa la insegna?
“Ma, par piaser, domàndaghe ale bèstie e lore le te insegnarà, domàndaghe ai osei dei cieli e lori i ndarà dirte. O varda ben la tera e la te insegnarà, e i pessi del mar i te contarà.” — GIÒ 12:7, 8.
NO fà mia tanti ani che ingegneri e sientisti i ze drio imparar dele piante e dele bèstie. Lori li stùdia e i imita come che i ze stati fati. Cossita i fà robe nove e i fà meio le màchine che belche le ghen’è. Questo stùdio l’è cognossesto come biomimètica. Dopo de leder i esempi che vederemo, domàndate: ‘Chi che ga pròpio el mèrito de questo?’
Cossa che le barbatane dela balena le ne insegna?
Cossa che quei che i ga progetà i avioni i ga imparà dela balena giubarte, o balena goba? Par quel che se vede se pol imparar tante robe. Una balena goba la pol pesar intorno de 30 mila chili, che l’è el peso de un camignon cargo. El so corpo l’è meso duro, con grande barbatane, che le par ale. Questa bèstia con 12 metri de longhessa la se move con facilità soto àqua. Par esémpio, quando la vol magnar, la balena goba la nada in su girando par soto dei pessi e dei sciosi, intanto che la sùfia come se i fusse pìcoli baloneti. Questi pìcoli baloneti, che i ga la misura sol de 1,5 metri, i ze doperadi come una tràpola par ciapar el so magnar. Dopo, la balena la magna quel che la ga catà con una boconada.
Ma quel che ga assà pi curiosi i studiosi l’è che questa bèstia, anca se la ga el corpo duro, la ze bona de far giri tanto pìcoli intanto che la nada. Lori i ga descobrio che l’è par causa de come che le ze state fate le so barbatane. Le parte davanti dele barbatane no le ze mia lise, come una ala de un avion, ma le ze rùspighe, come le sésole. Queste parte le ga nome tubèrcoli.
Intanto che la balena la nada svelta nel àqua, questi tubèrcoli i ghe dà de pi forsa par mantegnerla nadando e la assa che la nada pi lìbera, sensa gnente che la intrighe. Come? La revista Natural History la spiega che i tubèrcoli i assa passar la àqua par la barbatana de maniera lìbera, come la àqua che la passa nte una impìria, anca quando la balena la va su col corpo ben drito. Se la barbatana la gavesse la parte davanti lisa, la balena no la saria mia bona de far i so giri tanto pìcoli quando la ndesse in su. Questo sucederia parché la àqua la se moveria tanto svelta e vegnaria fora una spiral de drio dela barbatana che ghe cavaria le forse che la ga de bisogno par nadar.
Come che questo podaria esser doperà par far un progeto? Se le ale dei avioni le fusse fate come le barbatane dele balene, no i gavaria bisogno de quele altre ale pi pìcole par controlar la ària. Queste ale le saria pi sicure e saria pi fàcile far la manutension. John Long, che el ga studià questo, el pensa che un giorno, “l’è ben probàbile che tuti i avioni comersiai i gàpia le ale rùspighe come le barbatane dela balena goba”.
La imitassion dele ale del gavion del mar
Savemo che le ale dei avioni belche le imita le ale dei osei. Ma no fà tanto tempo che i ingegneri i ga doperà questa cognossensa par far altre robe. La revista New Scientist la dise che “studiosi dela Università dela Flòrida i ga fato un modelo de avion che l’è comandà par controle remoto, che el ga la capacità de fermarse par aria, zolar in su e in do svelto come un gavion del mar”.
Questi osei i ze boni de far bei movimenti e giri par ària parché lori i dópia le ale nel gumbio e nela spala. Copiando el progeto de questa ala, “el modelo del avion, de 61 sentimetri, el dopera un pìcolo motor par controlar bastoni de metal che i move le ale”, dise la revista. Queste ale che le ze state tanto ben progetade, le giuta el pìcolo avion a zolar e ndar in su e in do in meso ale costrussion. La Forsa Aèrea dei Stati Unidi la vol pròpio far un avion bon de far movimenti e giri con facilità par ndar in serca dele arme chimiche e biològiche nele grande cità.
La imitassion dele sate dela lusèrtola
Podemo imparar tanto anca dele bèstie che le vive sora la tera. Par esémpio, la lusèrtola, o lagartissa, la ze bona de ndar su par le parede e de tacarse su al sofito. Belche nel tempo dela Bìblia questa bèstia la era cognossesta par gaver questa capacità. (Proverbi 30:28) Come che la lusèrtola la pol far questo?
Questa bèstia la ze bona de far questo parché la ga intorno dele sate pìcole robe, che par fii de cavei. No ghen’è mia una cola nele so sate, invesse de questo, le sate le dopera una pìcola forsa molecolar. Le molècole che ghen’è intorno dele sate le se taca ndove la lusèrtola la se taca nela parede, par causa de forse che le ze ciamade de forse de Van der Waals. La gravità la ze bona de vinser queste forse con facilità, par quela che una persona no la pol mia rampegarse nte una parede sol cole so man. Ma i pìcoli fii che ghen’è intorno dele sate dela lusèrtola i resta pi grandi nel posto che la se taca nela parede. I miliari de fii insieme cole forse de Van der Waals i ze boni de tegner su el peso dela bestioleta.
Cossa che se pol far con questo che i ga descobrio? I podaria imitar le sate dela lusèrtola par far una roba nel posto del velcro, che anca lu l’è stà copià dela naturesa. a La revista The Economist la parla de un peschisador che el ga dito che un material doperà cola “fita-lusèrtola podaria esser doperà par i dotori nel posto de una fita chimica”.
Chi che ga el mèrito?
La Administração Nacional de Aeronáutica e Espaço, NASA, la ze drio far una màchina de oto gambe che la camina come un scorpion. Anca ingegneri dela Finlàndia i ga fato un trator de sei gambe che l’è bon passar par sora dele robe come se fusse un bisso grando. Altri studiosi i ga fato un tipo de roba che la ga come se fusse pìcole ale che le se verde e le se sera cossita come una bòcia de pignon. Una fàbrica de auti la ze drio far un auto che el se someia col pesse-cassa, che el ga la forsa par ndar contra l’àqua. E altri studiosi i ze drio studiar un tipo de scioso del mar par capir come che lori i ze boni de tegner bota. Lori i vol far un tipo de gilè con un material che pesa manco e che el dura de pi, ma anca bon de tegner la forsa de un tiro.
Le ze tante le bone idee che i ga catà, che i studiosi i ga fato un registro con miliari de informassion dela naturesa. Come dise la revista The Economist, in questo posto de informassion, i sientisti i pol ndar in serca de “solussion naturai par i problemi dei so progeti”. Le informassion che le ze meteste via lì, le ze cognosseste come “marche registrade biològiche”. Quasi sempre, l’è el paron dela marca registrada o la società che registra nela lege una nova idea o una nova màchina. Parlando sora questo, la medèsima revista la dise: “Quando lori i dise che le idee che lori i cata fora nela naturesa le ze una ‘marca registrada biològica’, in verità, i ze drio dir che el paron dela marca registrada l’è la naturesa.”
Come che la naturesa la ga bio queste maraveiose idee? Tanti studiosi i dise che questi progeti i ze el resultà de milioni de ani dela naturesa proando evoluir. Altri studiosi i pensa de nantra maniera. Un studioso ciamà Michael Behe el ga scrito nel giornal The New York Times nel 2005: “Quando vedemo el progeto che ghen’è nela naturesa, ghemo la sémplisse spiegassion: se una roba la se someia con una anara, la camina come una anara, la canta come una anara e se no ghen’è gnente contra questo, podemo dir che la ze una anara.” Cossa che lu el ga capio? “Sol parché una roba la ze stata fata de maniera sémplisse, no ghe vol dir che no la gàpia bio un progeto.”
Savemo che un ingegnero che fà una ala de avion pi sicura e che la va meio el ga el mèrito de quel che el ga inventà. Dela stessa maniera, quel che inventa una fita adesiva pi pràtica, una roba pi confortàbile o un auto che laora ben, el ga el mèrito par quel che ga creà. In verità, se una persona la còpia quel che nantra persona la ga creà e no la dà el mèrito al vero inventor, questo pol esser considerà un crime.
I studiosi i proa imitar la naturesa ma no i ze boni de far compagno a ela. Alora, dopo de considerar tuto questo, te par una roba lògica che lori i parle che tuto l’è vegnesto dela evolussion? Se par far una imitassion ghe vol un bon de un progetista, imagina par far el progeto original. Chi che ga el mèrito? Quel che ga creà o quel che ga imità?
Un risultado ciaro
Dopo de studiar le prove che tuta la naturesa la ga bio un progeto, tante persone le ga bio el medèsimo sentimento che el salmista, che el ga scrito: “Quante le ze le to òpere, ò Geovà! Te ghè fato tuto col to grando saver. La tera la ze piena de quel che te ghè fato.” (Salmo 104:24) Paolo, un scritor dela Bìblia, anca el ga dito: “Parché le so qualità invisìbile, o sia el so eterno poder e el fato che lu l’è veramente Dio, se pol veder de maniera ciara dela creassion del mondo avanti.” — Romani 1:19, 20.
Ma tante persone sinsiere che le crede nela Bìblia e in Dio fursi le pensa che Dio el ga doperà la evolussion par far la naturesa. Ma cossa che la Bìblia la insegna sora questo?
[Nota]
a El velcro l’è un tipo de material con pìcoli gànci che i fà con che due robe le se tache intrà de lore. Questo progeto l’è baseà nele semense dela bardana, una pianta che la se someia con un tipo de pétole.
[Comentàrio nela pàgina]
Come che la naturesa la ga bio cossita tante bele idee?
[Comentàrio nela pàgina]
Chi che ga la marca registrada dela naturesa?
[Quadro/Stampa nela pàgina]
Se par far una còpia ghe vol una persona inteligente, tanto de pi par far la original, mia vera?
Questo avion che el se move con facilità, el imita le ale del gavion de mar
Le sate de una lusèrtola no le se sporca mia, no le assa sporco in volta e le se taca a tute le superfissie, ma nò nel Teflon, e le se taca e le se distaca con poco sforso. I studiosi i ze drio proar far una còpia de queste
I ga fato un auto fando còpia dela strutura del pesse-cassa
[Crèdito dele stampe]
Avion: Kristen Bartlett/University of Florida; sata dela lusèrtola: Breck P. Kent; pesse cofre e auto: Mercedes-Benz USA
[Quadro/Stampa nela pàgina]
“LE SÀ PAR ISTINTO COSSA FAR”
Tante bèstie “le sà par istinto cossa far” e le sà guidarse. (Proverbi 30:24, 25) Vedemo due esempi.
◼ Come che le formighe le ze bone de guidarse Come che le formighe che le va in serca del so magnar le ze bone de ritornar al so gnaro? Studiosi nel Regno Unido i ga descobrio che par ndove che le passa, le formighe le assa un odor e che ghen’è altre che le fà una strada par ritornar al so gnaro. Par esémpio, le formighe-faraò “le fà strade del gnaro par diversi posti e dopo una strada la deventa due o tre strade nte un àngolo de 50 a 60 gradi”, dise la revista New Scientist. Parché che questo l’è interessante? Quando una formiga la ritorna al so gnaro, ela la torna indrio par la strada pi curta parché la sà par istinto cossa far. “Le strade che le formighe le fà, assa pi fàcile par lore ndar e ritornar al so gnaro. Se le fusse par una strada sbaliada, le guastaria de pi forsa”, dise la revista.
◼ Un guida par i osei Tanti osei i sà par ndove che i ga de ndar de maniera giusta, anca che sìpia tanto distante o che el tempo el sìpia bruto. Come? Studiosi i ga descobrio che i osei i sente la forsa che ghen’è intorno dela Tera, come un ìman. Sol che “queste forse le càmbia de acordo col posto dela Tera e gnanca sempre le guida par el nort”, dise la revista Science. Cossa che giuta questi osei a rivar nel posto giusto? Lori i se guida de acordo come che va do el Sol cada giorno. La posission del Sol quando che el va do, el càmbia par causa dela distansa intrà el nort e el sud e le stagion. I peschisadori i ga capio che i osei che i ze boni de guidarse “sempre i ga savesto i cambiamenti che ghen’è intrà le diverse epoche del ano”, dise la revista Science.
Chi che ga fato la formiga che la sà guidarse ela sola? Chi che ghe ga dato la capacità par i osei guidarse de acordo cola stagion del ano e un sarvel par giutarli a far questo e rivar nel posto giusto? Una evolussion sensa inteligensa? O un Creador inteligente?
[Crèdito dele stampe]
© E.J.H. Robinson 2004