Pensa in quel che l’è pi importante. La Bìblia la dise: ‘Gavé de esser sicuri de quale che le ze le robe pi importante’. (Filipensi 1:10) Fà una strissa de quel che te ocore far e desside quale che le ze le robe pi importante e quale te toca farle suito, o tute due. Ricòrdate che una roba la pol esser importante, ma fursi no te ocore farla suito, come par esémpio, ndar comprar qualcossa nel mercado. O anca, pol esser che ghen sìpia qualcossa che te par che te ocore farla suito, ma che no la ze importante, come vardar un programa de television che te piase. a

Gàpia in mente quel che te vè far. Eclesiasti 10:10 el dise che, se una feramenta no la taia pi e nissuni la sgusa, bisognarà far pi forsa par taiar. Questo vol dir che, se una persona la sgusa la so manera vanti de scominsiar a laorar, la sarà bona de farlo pi svelto. Alora, se se fermemo par pensarghe sora quel che ndemo far, ndaremo doperar meio el nostro tempo. Fà dopo o assa de banda le robe che no le ze tanto importante, cossita, no te perdi tempo gnanca forsa. Se te finissi de far qualcossa e te vedi che te ghè ancora tempo, dopera questo tempo e fà nantra roba che ocore. Quando te pensi vanti in quel che te ghè de far, te sarè bon de far pi robe.

Gàpia una vita sémplisse. Dighe de nò ale robe che no le ze mia importante o che le va sol farte perder tempo. Se te ghè massa robe de far, te pol restar stufo e perder la alegria.

Sìpia sicuro nele to dessision e no stà assar tuto par dopo. “Quel che el varda el vento no’l ndarà semenar, e quel che el varda le nùvole no’l ndarà tor su.” (Eclesiasti 11:4) Cossa che questo vol dir? La persona che la assa tuto par dopo la perde tempo e no la ze mia bona de far tante robe. Un colono no’l speta che sìpia tuto perfeto par scominsiar a impiantar, parché senò no’l va mai semenar gnanca tor su gnente. Dela medèsima maniera, anca noantri no podemo mia spetar fin che savemo tuti i detali de un assunto, senò la paura de far una dessision sbaliada la ne farà deventar una persona che no la se desside mai. (Eclesiasti 11:6) Ma, ancora che no ghen’è come saver de tuto quel che ndarà suceder, l’è bon sempre pensarghe sora vanti de far una dessision importante, come dise Proverbi 14:15: “El sàbio el pensa ben vanti de far qualcossa.”

No stà voler che tuto sìpia perfeto. Tiago 3:17 dise: “La sabedoria che la vien de sora [o sia, de Dio] la ze in primo posto rasoàbile.” L’è pròpio bel quando volemo far el nostro meio. Ma se sempre volemo che tuto sìpia perfeto, ndaremo restar disgustadi e no saremo mia boni de far quel che voléino. Par esémpio, una persona che la ze drio imparar nantra léngua la ga de saver che la ndarà sbaliar e che la ndarà imparar de questi sbali. Magari, se la vol far tuto perfeto, la gavarà tanta paura de parlar sbalià che no la sarà mia bona de imparar tanto. Invesse, no ghemo de spetar massa de noantri stessi, ghemo de acetar che no semo mia boni de far diverse robe. Alora, no restaremo mia disgustadi e cativi quando femo qualche sbàlio, ma saremo boni de rider de noantri stessi. La Bìblia la dise che una persona cossita la ze sàbia. — Proverbi 11:2.

Sìpia laorador, ma cata anca tempo par godertela. “L’è meio una sbranca de descanso che due sbranche de tanto laoro e corer par ciapar el vento.” (Eclesiasti 4:6) Quei che i sà sol laorar no i se la gode del so laoro parché ghe manca tempo e forsa. El miserion, magari, el riposa massa e el perde massa tempo. La Bìblia la ne dà el consìlio de gaver echilìbrio. Alora, sìpia un brao laorador, ma anca gode del to laoro. Questo l’è un presente che Dio el ne dà. — Eclesiasti 5:19.

Dorme ben. La Bìblia la dise: “Vao butarme do e dormir in pace.” (Salmo 4:8) La pi granda parte dele persone le ghe ocore dormir intorno de 8 ore par gaver una bona salute. Dormir l’è una maniera de doperar ben el tempo, parché giuta la nostra testa a laorar ben, ne giuta a imparar de pi, semo boni de consentrarse meio e de ricordarse de pi robe. Invesse, se no dormimo che basta restaremo cativi, ndaremo sbaliar de pi, no saremo mia boni de imparar tanto e podaremo farghe mal a qualchedun o a noantri stessi.

Pensa in quel che te pol pròpio gaver. L’è meio contentarse con quel che vedemo che ndarghe drio de quel che volemo. (Eclesiasti 6:9) La persona che la ze sàbia no la assa che tuto quel che la vol controle la so vita, ancora de pi se la vol una roba che no la pol gaver. No la se assa imbroiar cole propagande e no la va in serca de ciapar soldi de una maniera fàcile. Ma invesse la se contenta con quel che la pol gaver.

Pensa in quel che l’è pi importante par ti. Te savarè se qualcossa la ze bona e se la val a pena de acordo con quel che l’è pi importante par ti. Se pol dir che la vita la ze come una fressa che la va nela diression de quel che l’è pi importante par noantri. Par quela, ghemo de esser sicuri che le robe che le ze pi importante par noantri le ze giuste e bone. Cossita, doperaremo ben el nostro tempo. Alora, come che podemo saver quel che l’è pi importante par noantri? Tante persone le lede la Bìblia e cossita le ga visto che le pol gaver tanta sabedoria. — Proverbi 2:6, 7.

El amor el ga de esser el pi importante. Colossensi 3:14 dise: “El amor el une de maniera perfeta.” Sensa amor no se pol esser felice e gnanca sentirse ben, ancora de pi nela fameia. Le persone che le cata che i soldi e el laoro i ze pi importanti no le sarà mia felice. Par quela, la Bìblia la dise diverse volte che el amor l’è la roba pi importante dela vita. — 1 Corinti 13:1-3; 1 Gioani 4:8.

Toghi tempo par cognosser meio a Dio. Geoff el gavea una dona che lo amea tanto, gavea due brai fioi, boni amighi e un bon laoro. Ma come el laorea nela ambulansia, tante volte lu el vedea le persone sofrir e morir. Alora, lu el se domandea: “Gala de esser pròpio cossita la vita?” Un di, lu el ga ledesto arquante publicassion dele Testimònie de Geovà e el ga bio la risposta ala so domanda.

Geoff el ghe ga contà ala so dona e ai so fioi quel che l’era drio imparar. Anca lori i ze restadi interessadi e alora tuta la fameia la ga scominsià a studiar la Bìblia. Quel che lori i ga imparà ga fato la so vita restar tanto meio e ghe ga giutà a doperar ben el tempo. Par causa del so stùdio dela Bìblia, adesso lori i ga una bela speransa de viver par sempre in un mondo sensa sofrimento e robe che no le ga valor. — Apocalisse 21:3, 4.

Gesù Cristo el ga dito che quei che i sà dele so nessessità spirituai i ze felici, e la stòria de Geoff la mostra questo. (Mateo 5:3) Cossa càtito de doperar un poco del to tempo par cognosser meio a Dio? Te pol esser sicuro che questo te giutarà a gaver sabedoria par doperar ben el to tempo e cossita te podarè goderte nò sol el to di, ma anca la to vita.