Cossa che i predicadori del Regno i conta?

La ga catà un ogetivo ntela vita

GESÙ el cognosse le so piégore e le persone bone che ga amor par la pace e la giustìssia anca le vol restar insieme i seghidori de Gesù. (Gioani 10:14) Queste persone le vegnarà a saver che la vita la ga un ogetivo e l’è questo che ga sucedesto con una dona nela Bèlgica. Ledemo la so stòria:

“Mi ero drio passar par un bruto colpo ntela me vita. Pensea fin de coparme. Alora, le Testimònie de Geovà le ze vegneste là casa e me ga piasesto tanto quando le me ga insegnà che le brute robe che sucede ntel mondo le ndarà suito finirse. Ma no me piasea mia pensar che l’era Dio che el ndaria far questo. Fea 8 ani che mi no ndea pi in ciesa parché odiea veder che le persone là le disea una roba e le fea nantra. Ma no l’è mia stà cossita quando go parlà cole Testimònie de Geovà. Mi go capio che le me disea pròpio la verità e me son nicorta che no semo gnente sensa Dio.

“Le Testimònie de Geovà le ze vegneste là casa arquante volte, ma dopo no me go pi catà con lore. Mi gavea una vita pròpio triste. Fumea tanto e go fin scominsià a doperar droghe. Mi volea tanto parlar col me nono che l’era belche morto. Alora, son ndata in serca de qualchedun che me giutesse a far questo. Go patio par tanti mesi e me fea tanta paura restar sola parché i demoni i me atachea.

“Un giorno son ndata caminar e go ciapà una strada difarente de quela che sempre ndea. Son rivada nte una granda costrussion e go visto le Testimònie de Geovà fando su un Salon del Regno. Alora, me go ricordà come ero contenta quando le vegnea là casa e go pensà che el mondo el saria pròpio un bel posto de viver se tuti i fesse compagno lore.

“Mi gavea pròpio caro che le Testimònie de Geovà le me visitesse nantra volta. Alora, go parlà con arquante de lore in quela costrussion. Go pregà a Dio e, diese giorni dopo, el primo omo che me gavea visità l’è vegnesto là casa. Lu el me ga domandà se volea tornar a studiar e mi ghe go dito de sì. Lu el me ga anca convidà par ndar ntel Salon del Regno. Quando son ndata par la prima volta, son restada maraveiada parché mai gavea visto una roba compagna. Vedea che tuti i era contenti e i se tratea ben. Mi ero in serca de persone cossita!

“Go scominsià a ndar a tute le riunion. Dopo de tre stimane me go fermà de fumar e go anca butà via tuti i me libri de spiritismo e le cansion dei demoni. Alora, go visto che i demoni no i me atachea pi. Go indrissà la me vita de acordo con quel che la Bìblia la insegna. Tre mesi dopo, go scominsià a predicar. Dopo de sei mesi son stata batesada e due giorni dopo, go scominsià de pioniera aussiliar.

“Son pròpio contenta e ringràssio tanto a Geovà par tute le bele robe che el ga fato par mi. Adesso sì mi go un ogetivo nela vita. Infati, el nome de Geovà l’è una tore forte ndove go catà protession. (Proverbi 18:10) Me sento compagno a quel che ga scrito el Salmo 84:10 che el ga dito che un di ntela casa de Geovà l’è meio che mila in nantro posto. Lu el gavea dessidio star lì invesse de far quel che l’è sbalià.

Questa dona la ze una bona persona e, par quela, la ga savesto che la vita la ga un ogetivo. Questo sucede con tuti quei che i ga un bon cuor e che i va in serca de Geovà.