Domande dei Letori

De acordo col comando dela Bìblia sora come doperar el sangue, cossa che le Testimònie de Geovà le pensa sora doperar el so pròpio sangue in tratamenti mèdichi?

Tuti i cristiani i ga de far dessision de acordo con quel che la Bìblia la dise, invesse de farlo drio quel che ghe piase o quel che el mèdico el dise. La ze una question intrà el cristian e Geovà.

Geovà, che el ne ga dato la vita, el ga dito che el sangue no gavea de esser magnà. (Génesi 9:3, 4) Nela Lege che Dio el ga dato al antigo Israel, Lu el ga dito cossa che se pol far o nò col sangue, parché rapresenta la vita. Lu el ga ordinà: “La vita de una bèstia o una persona la ze nel sangue. Son stà mi che lo go dato a valtri, cossita valtri podé gaver el perdon dei vostri pecati nel altar”. E se una persona la copesse una bèstia par magnar, Dio el ga dito: “Lu el ga de spander el sangue par tera e querzerlo cola polver.” a (Levìtico 17:11, 13) Geovà el ga dato tante volte questo comando. (Deuteronómio 12:16, 24; 15:23) Una òpera giudaica de Chumash de Soncino la dise: “No se ga mia de meter via el sangue, ma el ga de esser butà par tera e no se ga mia de doperarlo”. Gnanca un israelita el gavea de ciapar el sangue de nantra creatura e meterlo via e gnanca doperarlo, parché la vita la ze de Dio.

Cola morte del Messia se ga finio la obrigassion dela Lege Mosaica. Ma Dio no’l ga cambià de idea e el seita considerar el sangue come una roba sacra. Infati, par meso del spìrito santo de Dio, i apòstoli i ga dito ai cristiani de no acetar sangue. La era una roba sèria in senso moral e importante come evitar la imoralità sessual o la idolatria. (Ati 15:28, 29; 21:25) Del sècolo 20 avanti le donassion e trasfusion de sangue le ze deventade tanto normal ma le Testimònie de Geovà le ga capio che queste pràtiche le ndea contra la Parola de Dio. b

Dele volte, el mèdico el dise al passiente de cavar via parte del so sangue stimane vanti dela so sirurgia, cossita se ghen fusse bisogno el pol rimeterghelo rento (doação autóloga pré-operatória, o DAPO). Ma ciapar, meter via e doperar nantra volta el sangue l’è una roba che va drito contra quel che l’è scrito in Levìtico e Deuteronómio. El sangue no’l ga de esser metesto via ma butà via, come dir, darghelo indrio a Dio. L’è vera che la Lege Mosaica no la val pi, ma noantri Testimònie de Geovà rispetemo el prinsìpio de Dio che ghen’era nela Lege e no acetemo sangue. Alora, noantri no demo sangue e gnanca lo metemo via par doperarlo dopo nte una trasfusion. El ga de esser butà via, parché questa pràtica la va contra la lege de Dio.

Ghen’è tratamenti o esami che se dopera el sangue dela persona che no i va drito contra ai prinsipi de Dio. Par esémpio, tanti cristiani i se fà analisi de sangue, che dopo el vien butà via. Dele volte i mèdichi i racomanda altri tratamenti pi difìcili col sangue dela persona.

Par esémpio, durante serte sirurgie i mèdichi i fà la emodiluission. I ghe fà far un giro fora del corpo a parte del sangue, e el sangue che el resta rento del corpo el vien slongà con altre sostanse. Dopo, i ghe mete rento el sangue che l’era stà tirà fora, cossita i valori del sangue dela persona i resta pi giusti. I dopera anca un tratamento che se ciama recuperassion dele sèlule del sangue. L’è quando el sangue de una ferida el pol esser ciapà e filtrà e dopo se dà indrio al passiente sol i glòbuli rossi. Nte nantro caso se fà ndar el sangue rento una màchina che la fà el laoro che normalmente faria altri òrgani, par esémpio el cuor, i palmoni e i rognoni e dopo, el sangue che l’era ndà rento la màchina el torna al passiente. Ghen’è altre tècniche che ghe fà far un giro al sangue nte una sentrìfuga par poder cavar via sostanse che fà mal, o fursi par cavar via una serta quantia de un componente del sangue e meterla in nantra parte del corpo. Se fà anca dele prove ndove se ciapa un poco de sangue, se miscia col remèdio e dopo i ghe lo mete nantra volta rento el corpo del passiente.

De quel che ghemo parlà pol cambiar dele robete e sicuro che vegnarà fora novi tratamenti, esami e tècniche mèdiche. No toca a noantri analisar tuti i tratamenti e dir cossa che cada cristian el ga de far. Cada un el ga de dessider come ndarà doperar el so sangue durante una sirugia, un esame mèdico o nte una terapia. El ga de domandar vanti al dotor o al tècnico come che el so sangue el vegnarà doperà nela sirurgia o nel tratamento. Cossita lu el ndarà dessider de acordo cola so cossiensa. (Vedi el quadro.)

I cristiani i ga de ver ben in mente la so dedicassion a Dio e che i ga de ‘amarlo de tuto el cuor, la anima, la forsa e la mente’. (Luca 10:27) Difarente dela pi granda parte dele persone, le Testimònie de Geovà le dà tanto valor ala so amicìssia con Dio. El Creador dela vita el vol che tuti ghemo fede nel sangue che Gesù el ga dato. In Efesi 1:7 ledemo: “Gràssie ala imèrita bontà, lu el ne ga dato el risgate e el ne ga liberà par meso del so sangue, e ghemo el perdon dei pecati.”

[Nota]

[Quadro/Stampe]

DOMANDE CHE PODEMO FARSE

Se parte del me sangue ndarà fora del me corpo, cossita che par un tempo la me sircolassion se ferme, la me cossiensa la me assa pensar che quel sangue l’è ancora mio, cossita che no gavarò de butarlo via o spanderlo par tera?

Faria mal ala me cossiensa trenada cola Bìblia se durante un esame o una terapia parte del me sangue el vegnesse ciapà, cambià un pochetin e metesto nel me corpo nantra volta?