Ghe ocore sempre de una lege scrita nela Bìblia?

FURSI quando te eri picinin, to pare e to mare i te ga dato tante règole par obedir. Dopo, quando te si restà pi grando, te ghè visto che quele règole in verità le era par el to ben, parché lori i se preocupea con ti. E adesso, pol esser che te obedissi arquante de quele règole che to pare e to mare i te ga insegnà, stesso che no te sìpie de star con lori.

El nostro Pare nel cielo, Geovà, el ne dà tante règole che le ze ntela Bìblia. Par esémpio, Dio el dise che ghemo de adorar sol a lu, che no podemo far imoralità sessual, far adultèrio e gnanca ciavar. (Ésodo 20:1-17; Ati 15:28, 29) Dopo che cognossemo de pi a Dio, imparemo che lu no’l ne dà règole parché l’è un Dio rugno, ma si parché el vol el nostro ben.— Efesi 4:15; Isaia 48:17, 18; 54:13.

Ma ghen’è arquante situassion che Dio no’l ne dà una règola. Par quela, tanti i pensa che come no ghen’è una lege scrita ntela Bìblia, lori i pol far quel che i vol. Lori i dise che se Dio el volesse el gavaria metesto ntela Bìblia una règola ciara.

Quei che i pensa cossita, tante volte i fà una dessision sensa pensar ben e dopo i se ciama grami. Lori no i ze boni de veder che ntela Bìblia no ghen’è sol lege, ma anca ne insegna la maniera de Dio pensar. Se studiemo la Bìblia e savemo quel che Dio el pensa, gavaremo una cossiensa trenada e saremo boni de far dessision de acordo con quel che Dio el vol. Quando femo cossita, assemo el cuor de Dio contento e semo benedidi par gaver fato bone dessision.— Efesi 5:1.

Bei esempi dela Bìblia

Quando ledemo nela Bìblia esempi dei servi de Dio nel passà, imparemo che lori i ga fato le robe de acordo cola maniera de pensar Dio, anca se no ghen’era una règola scrita. Varda el esémpio de Giusepe. No ghen’era gnanca una lege scrita de Dio contra el adultèrio quando la dona de Potifar la volea far imoralità sessual con lu. Ancora che no’l ghen fusse una règola, Giusepe el savea che far adultèrio l’era contra la so cossiensa, ma anca l’era un pecato contra Dio. (Génesi 39:9) Sicuro che Giusepe el savea che far adultèrio l’era una roba sbaliada parché Dio el gavea parlà sora questo nel giardin del Èden.— Génesi 2:24.

Vedemo nantro esémpio. In Ati 16:3, dise che Paolo el ga sirconsidà Timòteo vanti de menarlo insieme ntei so viai par visitar le congregassion. Ma ledemo ntel versìcolo 4 che Paolo e Timòteo i ga viaià par le cità e i ghe parlea ai fradei sora “le dessision che i apòstoli e i ansiani i gavea fato in Gerusalen”. Intrà queste dessision ghen’era quela de che no ghe ocorea pi far la sirconsision. (Ati 15:5, 6, 28, 29) Parché che Paolo el catea che Timòteo el gavea de esser sirconsidà? Par via dei giudei che i era de quei posti che i savea che el pare de Timòteo l’era greco. Paolo no’l volea ofender nissuni. Lu el volea che quei che obedisse a Dio i fusse un “bon esémpio par la cossiensa de tute le persone davanti de Dio.”— 2 Corinti 4:2; 1 Corinti 9:19-23.

Questa maniera de pensar la fea parte dela personalità de Paolo e Timòteo. Ledi testi come Romani 14:15, 20, 21 e 1 Corinti 8:9-13; 10:23-33, e vedi come Paolo el se preocupea cola amicìssia dei altri con Dio, ancora de pi con quei che i podea strabucarse par via de una roba che no la era sbaliada, ma che la intrighesse la so cossiensa. E sora Timòteo, Paolo el ga scrito: “Parché no go nissun altro cola disposission compagna ala soa. Lu el ve tenderà pròpio ben. Parché tuti i altri i ze drio ndar in serca dei so interessi, nò dei interessi de Gesù Cristo. Ma valtri savé che lu el ga dimostrà el so valor. Come un fiol insieme so pare, lu el ga laorà come un schiavo insieme de mi nela predicassion dele bone notìssie.” (Filipensi 2:20-22) Che bel esémpio questi due òmini i ze par noantri ancoi. Invesse de far le so dessision come i volea quando no ghen’era gnanca una règola scrita de Dio, lori i fea compagno al amor de Geovà e so Fiol, e sempre i fea le so dessision de una maniera che no la intrighesse la amicìssia dei altri con Dio.

Pénseghe sora Gesù Cristo, el nostro pi grando esémpio. Nel discorso che lu el ga fato nte un monte, lu el ga spiegà che quei che i capisse el motivo de gaver le lege i ndarà obedirle de cuor, nò sol parché l’è scrito o parché l’è proibio. (Mateo 5:21, 22, 27, 28) Gesù, Paolo, Timòteo e Giusepe, no i ga pensà che quando no ghen’era una lege scrita, lori i podea far quel che i volesse. Cossita come Dio el pensa, questi òmini i ga vivesto de acordo con quel che Gesù el ga dito, che i ze i due pi grandi comandamenti — amar a Dio e amar al pròssimo.— Mateo 22:36-40.

Cossa che i seghidori de Gesù i fà ancoi?

No ghemo de vardar la Bìblia come se la fusse un libro de un giuis, ndove ghen’è scrito tuto quel che ghemo de far de maniera ciara. Quando noantri femo le robe de acordo cola maniera de pensar de Dio, ancora che no ghen’è gnanca una lege scrita, noantri assemo el cuor de Geovà contento. In altre parole, invesse de spetar che Dio el ne diga tuto quel che ghemo de far, ghemo de “capir quala che la ze la volontà de Geovà”. (Efesi 5:17; Romani 12:2) Parché che questo lo assa contento? Parché mostra che el pi importante par noantri l’è contentar a lu e nò a noantri stessi. Mostra anca che ghe demo tanto valor al so amor e che volemo far come lu, o sia, tuto quel che femo l’è motivà par amor. (Proverbi 23:15; 27:11) E, quando femo le cose de acordo cola Bìblia, podemo gaver una amicìssia pi forte con Dio e fin pi salute.

Vedemo come meter in pràtica questo consìlio ntela nostra vita.

Quando scoliemo le nostre diversion

Varda el esémpio de un gióveno che el ama a Geovà e el vol saver cossa che Dio el pensa e el sente sora un assunto. Lu el vol scoltar un àlbun de un cantor. Lu el ga piasesto de arquante mùsiche che el ga scoltà, ma lu l’è restà preocupà parché l’è ndato in serca e el ga visto che le letre de arquante mùsiche le ze sporche. Lu el vede anca che in arquante dele so mùsiche el cantor el parla de rebeldia e violensa. Come che lu el pol saver quala che la ze la volontà de Dio sora el assunto?

El apòstolo Paolo, ntela so carta ai Gàlati, el ga parlà sora le òpere dela carne e sora el fruto del spìrito de Dio. El fruto del spìrito l’è: amor, alegria, pace, passiensa, bontà, benignità, fede, brandura e autocontrolo. Ma cossa che le ze le òpere dela carne? Paolo el ga scrito: “Se vede le òpere dela carne de maniera ciara. Le ze imoralità sessual, impuressa, condota sensa rispeto, idolatria, spiritismo, mostrar òdio, barufe, gelosia, colpi de fùria, discòrdie, seghir insegni dei òmini, invìdia, bever massa, feste sensa controlo e robe come queste. Mi ve aviso sora queste robe, come ve go belche avisà: quei che i fà queste robe no i ndarà guadagnar el Regno de Dio.”— Gàlati 5:19-23.

Varda quel che l’è scrito nel fin del testo: “robe come queste.” Paolo no’l ga fato una lista pròpio granda sora quel che saria una òpera dela carne. Ma no vol mia dir che la persona la pol pensar: ‘Se una roba no la ze ntela lista de Paolo sora le òpere dela carne, alora vol dir che la Bìblia la me assa far quela roba’. Invesse, la persona la ga de pensarghe sora altre cose, ancora che no le fà parte dela lista de Paolo, ma che le ze sbaliade. Quei che i fà aposta cose che no le ze in quela lista, ma che le ze sbaliade e no i se ciama grami, no i guadagnarà le benedission del Regno de Dio.

Alora, ghemo de nicorderse o capir quel che Geovà no’l ghe piase. L’è fadiga far questo? Proemo dir che el to dotor el te disesse de magnar pi fruti e verdure e che te te fermessi de magnar dolsi, sorvete e altre robe cossita. Fà fadiga saver de qual lista che un bolo el saria? Vedemo nantra volta el fruto del spìrito de Dio e le òpere dela carne. De qual dele liste le mùsiche che ghemo parlà vanti le fà parte? Sicuro che no se someia gnanca un pochetin col amor, la bontà, el autocontrolo e le altre qualità del fruto del spìrito de Dio. No ghe ocore de una lege scrita par saver che questo tipo de mùsica no la ze de acordo con quel che Dio el pensa. Dela stessa maniera sucede quando ledemo qualcossa, vedemo filmi, programi de television, giughi de computadori, sites ntela internet e cossita avanti.

La maniera giusta de vestirse e postarse

La Bìblia anca la ne dà consili sora la maniera de vestirse e postarse. Questi consili i giuta tuti i seghidori de Cristo a pensar dela maniera giusta sora questo assunto. Ma quei che i ama a Geovà, i vede questo assunto come una oportunità, nò de far quel che ghe piase a sì stesso, ma de far quel che assa so Pare nel cielo contento. Come ghemo belche visto, no l’è parché Geovà no’l ga dato una lege scrita, che lu no’l se importa con quel che i so servi i fà. La maniera de vestirse la càmbia de un posto par altro, fin ntel medèsimo posto e la seita cambiar. Ma i consili che Dio el ne dà i giuta el so pòpolo in tute le situassion e in tuti i posti.

Par esémpio, 1 Timòteo 2:9, 10 dise: “Cossita, le done le ga de vestirse cole robe apropiade, de maniera modesta e con bon giudìssio, nò col stilo dele transe, gnanca col oro o pèrole gnanca cole robe de tanto valor, ma de maniera pròpia dele done che le dise che adora a Dio, o sia, con bone òpere.” Le persone le sà che quei che adora a Dio i ga de postarse ben. Alora, tuti i servi de Dio, sìpie òmini o done, i ga de vestirse e postarse de una maniera che mostra che i adora a Dio. L’è tanto importante che un servo de Dio el se ricorde che la so maniera de postarse e vestirse la pol influensar quel che i altri i pensa sora el messàgio dela Bìblia che portemo. (2 Corinti 6:3) El servo de Dio che l’è un esémpio, no’l ndarà preocuparse massa con quel che lu el vol o con quel che el ga el dirito de far. Invesse, el ndarà preocuparse de no far gnente che pol far i altri strabucarse.— Mateo 18:6; Filipensi 1:10.

Quando un servo de Dio el vede che la so maniera de vestirse e postarse la ofende i altri, lu el pol far compagno al apòstolo Paolo che el se preocupea col ben spiritual dei altri, e nò con quel che lu el volea. Paolo el ga dito che ghemo de far come lu, parché lu el ga fato come Cristo. (1 Corinti 11:1) Paolo el ga scrito sora Gesù: “Gnanca el Cristo el ga fato contento si stesso.” L’è ciaro quel che Paolo el ga dito ai servi de Dio: “Noantri che semo forti ghemo de portar le fiachesse de quei che no i ze mia forti, e no far contenti noantri stessi. Tuti noantri ghemo de far contento el pròssimo par el so ben, par giutarlo a tirarse su.”— Romani 15:1-3.

Pensa come Dio sora quel che l’è giusto o sbalià

Se no ghen’è una lege scrita sora un assunto, come che podemo far meio la nostra maniera de pensar sora quel che l’è giusto o sbalià par contentar a Dio? Leder la Bìblia tuti di, studiarla e pensarghe sora quel che ghemo ledesto. Cossita mostremo che semo boni de pensar dela maniera giusta. Ma no l’è de colpo che questo sucede, ghe vol tempo. Cossita come un tosatel no’l vien grando de un giorno par altro, compagno ze la nostra amicìssia con Geovà: la cresse pian pian. Par quela, ghe vol passiensa, e no ghemo de sentirse disgustadi quando no vedemo suito el nostro progresso. Par nantra banda, ghemo de far de pi de che sol spetar el tempo passar. Ghemo de far la nostra parte. Come ghemo belche dito, ne toca leder la Bìblia tuti di e meter in pràtica quel che ledemo.— Ebrei 5:14.

Se pol dir che le lege de Dio le mostra se semo obedienti, ma i so consili i prova quanto granda la ze la nostra amicìssia con Dio e la nostra voia de contentarlo. De pi amighi che semo de Dio, pi importante sarà par noantri far compagno lu e so Fiol. Semo premosi de far le nostre dessision de acordo cola maniera de pensar de Dio che ze ntela Bìblia. Quando quel che femo assa el nostro Pare nel cielo contento, noantri anca restemo ancora pi contenti.

[Stampe nela pàgina 23]

La maniera de vestirse la càmbia de un posto par altro. Ma ghemo de pensar come Geovà el pensa e seghir i so consili nela Bìblia