Domande dei Letori

De che persone Paolo l’era drio parlar in 2 Corinti 6:14?

In 2 Corinti 6:14 ledemo: “No sté meterve soto una canga con quei che no i crede mia.” De chi che Paolo l’era drio parlar? Lu l’era drio parlar de quei che no i fea parte dela congregassion. Savemo de questo parché in altri versìcoli dela Bìblia Paolo el ga parlà dela medèsima roba.

Par esémpio, Paolo el ga dito che no l’era mia giusto ndar al tribunal “davanti de quei che no i crede”. (1 Corinti 6:6) In questo versìcolo, quei che no i credi i era i giuisi dei tribunai de Corinto. Ntela so seconda carta, Paolo el ga parlà che Sàtana “el ga fato orba la mente de quei che no i crede”. I so oci no i ze boni de veder parché i ga come che un velo davanti, par no veder le bone notìssie. Questi che no i crede mia no i ga fato gnente par servir a Geovà. E Paolo el ga spiegà el motivo: “Ma quando qualchedun el ritorna a Geovà, el velo l’è cavà via.” — 2 Corinti 3:16; 4:4.

Arquanti de quei che no i crede mia anca no i obedisse ale lege e i adora ìdoli. (2 Corinti 6:15, 16) Ma, no vol dir che tuti i ze contra i servi de Geovà. Arquanti i ga interesse ntela verità. Tanti che no i crede mia i ze maridadi con un servo de Dio e i ze felici. (1 Corinti 7:12-14; 10:27; 14:22-25; 1 Piero 3:1, 2) La congregassion la ze fata de quei che i ‘crede nel Signor’. (Ati 2:41; 5:14; 8:12, 13). Alora, quando Paolo el parla dele persone che no le crede mia, lu l’è drio parlar de quei che no i fà parte dela congregassion.

El consìlio de 2 Corinti 6:14 el giuta quei che i serve a Dio de tante maniere. E l’è un consìlio tanto bon par quei che i vol maridarse. (Mateo 19:4-6) Un servo de Dio dedicà e batesà no’l va in serca de una persona par maridarse che no la serve mia a Dio. Parché? Parché un vero dissìpolo de Gesù el ga altri prinsipi, ogetivi e el crede in robe difarente.

Ma cossa dir de quei che i stùdia la Bìblia e i va ntele nostre riunion? E de quei che i ze predicadori ma che gnancora no i ze batesadi? Lori i fà parte de quei che no i crede mia? Nò. Le persone che le aceta le verità dela Bìblia e le vol rivar fin el batésimo no le fà parte de quei che no i crede mia. (Romani 10:10; 2 Corinti 4:13) Cornèlio, vanti del so batésimo, l’è stà ciamà de omo che el gavea devossion e che el temea a Dio. — Ati 10:2.

Come ghemo visto in 2 Corinti 6:14, no vol mia dir che quei che gnancora no i ze batesadi i fà parte de quei che no i crede mia. Alora, sarà che saria sàbio una persona batesada smorosar e dopo maridarse con un che gnancora no l’è batesà? Nò, no saria mia sàbio. Parché? Parché Paolo el ga dato un consìlio ciaro ale védove che le serve a Dio. Lu el ga scrito: “La pol maridarse con chi che ela la vol, sol se el serve al Signor.” (1 Corinti 7:39) El consìlio el ne giuta a capir che quei che i ze batesadi e i vol maridarse i ga de ndar in serca de una persona sol intrà quei che i “serve al Signor”.

Paolo el ga parlà in Romani 16:8-10 e in Colossensi 4:7 sora quei che i era “in Cristo” o “nel Signor”. Cossa vol dir queste parole? I versìcoli i mostra che i era fradei e sorele fedele che i laorea nela predicassion e che i giutea altri rento la congregassion.

Quando qualchedun el deventa “schiavo nel Signor”? L’è quando lu el se ferma de far quel che el vol e scomìnsia a far quel che un schiavo el ga de far. Gesù el ga dito che quei che i vol ndar drio a lu i ga de obedir sempre ai so comandamenti e far compagno al so esémpio, anca quando l’è fadiga. (Mateo 16:24) Quando una persona la se dedica e la se batesa, la deventa una persona aprovada par Dio, la va drio a Cristo e mete la volontà de Dio in primo posto. a Alora, ‘maridarse nel Signor’ vol dir maridarse con qualchedun che l’è un “schiavo de Dio e del Signor Gesù Cristo”. — Tiago 1:1.

Quei che i stùdia la Bìblia cole Testimònie de Geovà e i fà cambiamenti i mèrita esser lodadi. Ma lori gnancora no i se ga dedicà a Dio e no i vive come schiavi de Cristo. Lori i ze ancora drio far cambiamenti par viver dela maniera giusta. Vanti de pensar in maridarse, i ga de cambiar la so vita par esser una persona dedicada e batesada.

Saria giusto che una Testimònia de Geovà la smorosesse con una persona che no la ze gnancora batesada, parché la ga speransa che un giorno la se batese e la se maride con ela? Nò. Pol suceder che una persona la vol dedicarse e batesarse parché la ga la motivassion sbaliada. Pol esser che la vol far questo parché la sà che la Testimònia de Geovà sol la ndarà maridarse con ela se la se batesa.

El consìlio de maridarse ‘sol con quei che i serve al Signor’ l’è giusto. Un predicador che no l’è gnancora batesà el seita cossì par poco tempo, parché suito el podarà batesarse. Ma metemo dir che una persona la ga belche la età par maridarse e che la ze stata slevada nte una fameia che la serve a Dio. La laora ntela congregassion, ma gnancora no la ze batesada. Alora, parché no la ga belche dedicà la so vita a Geovà? Cossa che ghe manca par batesarse? Sarà che la ga dubi? Questa persona no la fà parte de quei che no i crede mia, ma anca no podemo dir che la ze “nel Signor”.

El consìlio che Paolo el ga dato sora el matrimònio l’è par el nostro ben. (Isaia 48:17) Se un omo e una dona che i vol maridarse i ze belche dedicadi a Geovà, el compromisso intrà de lori l’è pi forte parché i ga come base la Bìblia. Lori due i ga i stessi ogetivi e prinsipi. Par via de questo, lori i podarà gaver un matrimònio pi felice. Anca, quando i se marida ‘sol nel Signor’, lori i mostra che i ze leai a Geovà. Cossita, i sarà benedidi, parché ‘Geovà el dimostra lealtà con quei che i ze leai’. — Salmo 18:25.

[Nota]

[Stampa]

‘Geovà el dimostra lealtà con quei che i ze leai’