L’ERA intorno del ano 1970. Ero un soldà de 20 ani. Mi gavea una bruta malatia e l’era butà do nel leto del Ospedal Geral Valley Forge, nela Pensilvania, Stati Unidi. A cada mesa ora vegnea un enfermero misurar la me pression. Lu l’era un poco pi vècio de mi e l’era preocupà parché cada volta la me pression la restea pi bassa. Mi ghe go domandà: “No te ghè mai visto nissuni morir, mia vera?” El me ga vardà spaventà e el me ga dito: “Nò, go mai visto.”

Parea pròpio che mi ndaria morir. Ma, parché che ero in quela situassion? Vao contarve un poco sora la me vita.

Son rivà nel Vietnan in lùlio del ano 1969. La ora la era difarente e fea tanto caldo, alora i me ga dato una stimana par costumarme a quel posto, compagno i fea con tuti i soldadi che i rivea lì. Nela guera del Vietnan, mi laorea insieme coi dotori. Mi pareciea la sala e dopo li giutea quando i fea le operassion. Me piasea tanto giutar quei che i restea maladi e quei che i se fea mal e mi volea tanto deventar un dotor. L’è stà lì che son restà malà.

Mi ero ndato laorar nte un ospedal del esèrsito darente del rio Mekong e del mar. Ghen’era tanti elicòpteri che i rivea con soldadi che i se gavea fato mal. Mi amea tanto el me paese e me piasea far el me laoro, par quela, no vedea la ora de scominsiar. Se gavea de pareciar suito i soldadi che i rivea desgrassiadi par portarli ale “sale de operassion”. Queste sale le era pìcole, fate de fero e ghen’era ar condissionado rento. Un dotor el fea la operassion, un el fea la indòrmia e due enfermeri i se imuciea rento quela saleta par proar salvar i soldadi. Rento i elicòpteri, go visto che ghen’era arquanti sachi negri che no i descarghea. Dopo go savesto che rento ghen’era tochi dei corpi dei soldadi che i era morti nele splosion dele bombe. L’è stà cossita che go cognossesto la guera.

Vanti de ndar ala guera, go savesto de arquante verità che le Testimònie de Geovà le insegna. La me mama la ga studià par un tempo, ma no la se ga batesà. Me piasea tanto de star insieme e scoltar quel che lore le insegnea. Un giorno, ero insieme el sposo dela me mare. Èrino darente un Salon del Regno e ghe go domandà: “Che posto l’è questo qua?”. Lu el ga dito: “Stà distante de quela gente lì!”. Mi ghe volea tanto ben e me fidea in lu, alora go fato pròpio come lu el ga dito e no go pi parlà cole Testimònie de Geovà.

Dopo che son tornà del Vietnan, go visto che gavea bisogno de Dio nela me vita. L’era come se mi no gavesse pi sentimenti par causa de quel che go visto nela guera. Me parea che nissuni i capia quela bruta situassion che la era drio suceder nel Vietnan. Le notìssie le disea che tanti bambini i era copadi nela guera. Par quela, ghen’era tanti protesti contra i soldadi dei Stati Unidi.

Mi go sempre amà a Dio e go scominsià a ndar in serca de lu nele ciese, ma no me ga piasesto quel che go scoltà. Alora, son ndà nte un Salon del Regno in Delray Beach, Flòrida. La me prima riunion la ze stata nte una doménega, in febraro de 1971.

Quando son ndà rento el Salon del Regno, el discorso pùblico l’era drio finirse ma go seità lì par scoltar el stùdio dela Sentinela. No me ricordo gnente de quel che i ga parlà quel giorno, ma son stà maraveià che i toseti i ndea in serca dei versìcoli nela so pròpia Bìblia! Cossita, mi sol vardea e scoltea. Quando ero drio ndar via, un fradel de 80 ani, che el gavea nome Jim Gardner, l’è vegnesto parlar con mi. Lu el me ga mostrà el libro A Verdade Que Conduz à Vida Eterna e el me ga dito: “Me piaseria darte questo libro.” El nostro primo stùdio dela Bìblia saria dóbia de matina.

In quela doménega, son ndato laorar. Mi laorea nte un ospedal in Boca Raton, Flòrida, dele 11 dela note fin ale 7 dela matina. Come ghen’era poche persone nel ospedal, go scominsià a leder quel libro. Una enfermera la ze vegnesta, la me ga cavà via el libro dele man, lo ga vardà e la me ga dito: “No credo mia che te vè scominsiar a far parte de questa religion!” Go ciapà indrio el libro e ghe go dito: “Go ledesto sol fin la metà, ma cato che vao sì!” Ela la me ga assà star e go finio de leder el libro quela medèsima note.

Quando el fradel Jim Gardner l’è vegnesto par scominsiar a insegnarme la Bìblia, mi ghe go domandà: “Cossa ndaremo studiar ancoi?” Lu el me ga rispondesto: “El libro che te go dato.” Ma ghe go dito: “Mi go belche ledesto el libro.” El fradel Gardner el me ga rispondesto con bontà: “Ndemo darghe una ociada in questo primo capìtolo.” L’era de gnanca creder quanta roba interessante che mi no gavea mia visto! Ghemo ledesto tanti testi nela me pròpia Bìblia. Adesso sì mi ero drio imparar sora el vero Dio, Geovà. Quela matina, ghemo studià tre capìtoli del libro Verdade e ghemo seità far cossita tute le dóbia de matina. Me piasea tanto studiar! L’è stà una granda oportunità imparar con quel fradel untà che el gavea cognossesto Charles Russell.

Dopo de arquante stimane, son deventà predicador dele bone notìssie. Par mi no l’era mia fàcile parlar de casa in casa, ma Jim el me ga giutà predicar e anca con altre robe che mi gavea de bisogno. (Ati 20:20) Diverse volte Jim el laorea con mi nela predicassion e, col tempo, me ga piasesto predicar. Par mi, predicar l’è un grando privilègio parché son drio laorar insieme con Dio. — 1 Cor. 3:9.

Adesso vao parlar de una roba tanto importante par mi: quando go scominsià amar a Geovà. (Apo. 2:4) Questo amor el me ga giutà coi bruti ricordi dela guera e anca con altre dificoltà. — Isa. 65:17.

Me ricordo de un giorno nel ano 1971. Fea poco tempo che el sposo dela me mare me gavea parà via del posto che ero de star. Lu el me ga dito che mai el assaria una Testimònia de Geovà viver nte una dele so case. Quela època, mi no gavea tanti soldi. Mi ricevea del ospedal a cada due stimane e gavea pena guastà tuti i soldi cole fatiote par esser ben postà par ndar ala predicassion. Ancora che gavesse qualche soldi metesti via, i era nte un banco in Micigan, ndove son stà slevà su. Par quela, me ga tocà dormir nel me auto. Mi ndea nei bagneri dei posti de gasolina par lavarme e far la barba.

Un giorno, intanto che ero ancora drio viver nel me auto, son rivà par la predicassion due ore vanti la ora dela riunion. Mi gavea pena finio el me laoro quel giorno e, son ndà sentarme do de drio del Salon del Regno, ndove nissuni podea vederme. Me ze vegnesto in mente quel che gavea sucedesto nel Vietnan. Me parea ancora de sentir la spussa dei corpi brusadi e de veder tuti quei morti. Me ricordea anca de tanti gióveni che i me domandea spauradi: “Vao morir? Vao morir?” Mi ero sicuro che lori i ndaria morir, ma proea far finta che l’era tuto a posto. Intanto che mi ero lì sentà do, tanti sentimenti i me ze vegnesti fora.

Intanto che preghea a Geovà, go tacà a piander. (Sal. 56:8) Mi go pensà sora la ressuression e son nicorto de una roba. Go capio che tuti i morti che mi gavea visto e i bruti pensieri come questi i ndarà finirse par meso dela ressuression. Geovà ndarà far tuti quei gióveni viver nantra volta e lori i podarà imparar la verità sora lu. (Ati 24:15) De colpo, el me cuor l’è restà pien de un grando e forte amor par Geovà. Fin ancoi, mi proo ricordarme sempre de quel giorno che go scominsià amar a Geovà, ancora de pi quando son drio tribolar.

Nela guera, le persone le fà robe de gnanca creder. Anca mi go fato tante brute robe. Ma me giuta tanto pensarghe sora due dei testi che me piase de pi. Un l’è Apocalisse 12:10 e 11 che dise che el Diaol l’è vinsesto nò sol par causa del nostro testimònio, ma anca par causa del sangue del Piegoreto. E quelaltro l’è Gàlati 2:20 che me giuta a esser sicuro che Gesù Cristo l’è morto anca “par mi”. Geovà el me dà valor e el me perdona par meso del sangue de Gesù. Alora, mi son bon de gaver una cossiensa neta e go tanto caro de far el meio che posso par giutar le persone a cognosser la verità sora el nostro Dio misericordioso, Geovà. — Ebr. 9:14.

Quando me penso de tuto quel che ga sucedesto nela me vita, ringràssio tanto a Geovà, che el me ga sempre tendesto. Un esémpio de questo l’è che, quando Jim el ga savesto che mi ero de star rento el auto, lu el me ga fato saver de una sorela che la afitea quarti nela so casa. Son pròpio sicuro che Geovà el ga doperà Jim e quela cara sorela par giutarme a gaver un bon posto par ndar de star. Geovà l’è tanto bondoso. Lu el tende del bon dei so servi fedeli.

Nel mese de maio de 1971, me ga tocà ndar a Micigan. Vanti de scominsiar el viaio, son ndato fin el Salon del Regno dela me congregassion nela Flòrida, go ciapà tante publicassion e le go meteste nel me auto. Mi no gavea gnancora fato metà del viaio e gavea belche dato ale persone tute le publicassion che mi gavea. Me go sforsà tanto par predicar in tuti posti che passea. Go dato foieti a quei che mi catea quando me fermea nei posti par strada e go fin predicà in arquante preson. Fin ancoi me domando se qualchedun de quei ga imparà la verità. — 1 Cor. 3:6, 7.

Ma go de dirve una roba. Pena dopo che go imparà la verità, mi ndea cole brute e ancora de pi quando parlea cola me fameia. Mi parlea pròpio quel che ero drio pensar. Ghe vui tanto ben ai me fradei, John e Ron, ma no parlea dela verità a lori con bontà. Dopo, ghe go fin domandà scusa par causa de questo. Ma, seito pregar che un giorno lori i acete la verità. Col tempo, Geovà l’è drio giutarme a predicar e insegnar cole bone. — Col. 4:6.

Mi amo a Geovà e anca ghe vui ben a altre persone. La me dona, Susan, la ze la seconda persona che mi amo de pi. Mi volea una sposa che me giutesse nel laoro a Geovà. Susan la ze brava e la ga una granda amicìssia con Dio. Quando noantri èrino drio smorosar, son ndato catarla nela so casa. Ela la era drio leder La Sentinela insieme cola Bìblia. Me ga piasesto tanto parché, ancora che no fusse un artìcolo de stùdio, la ndea in serca de tuti i testi bìblichi. Go pensà: “Questa sì la ze una tosa de fede!” Se ghemo maridà in disembre de 1971, e son tanto grato a ela par tuto el aiuto che go sempre ricevesto. Quel che me piase de pi l’è che ela la ama de pi a Geovà che a mi.

I nostri fioi, Jesse e Paul, i ze due grande benedission che ghemo bio. Intanto che i vegnea grandi, Geovà l’era drio benedirli. (1 Sam. 3:19) Ghemo tanta alegria parché lori i ga dessidio servir a Geovà. Lori mai i se ga desmentegà de quando i ga scominsià amar a Geovà. Fà de pi de 20 ani che lori due i ze nel servìssio de tempo integral. Jesse e Paul i se ga maridà con done che le me dà tanta alegria e, par mi, l’è come se le fusse me pròpie fiole. Le so done, Stephanie e Racquel, le ama a Geovà con tuto el so cuor e de tuta la so ànima. — Efe. 6:6.

Dopo che son stà batesà, go servio par 16 ani in Rhode Island, ndove go fato tante bele amicìssie. Go tanti bei ricordi de cari ansiani che go servio insieme. Anca ringràssio el aiuto che tanti superintendenti viaianti i me ga dato, lori i ze stati pròpio un bel esémpio par mi. L’è un grando onor servir a Dio insieme de fradei che i ga sempre seità a amar tanto a Geovà. Nel ano de 1987, semo ndati de star nela Carolina del Nort parché ghen’era pi bisogno. Anca là ghemo fato bele amicìssie. *

Nel agosto de 2002, mi e Susan semo stati convidadi par far parte dela fameia del Betel de Patterson, nei Stati Unidi. Mi go laorà nel Departamento de Servìssio, e Susan laorea nel posto che lavea le robe dei beteliti. Ela la ghe piasea tanto laorar lì! Alora, nel agosto de 2005, son stà convidà par far parte del Corpo Governante. Mi go catà che no meritea questa designassion. La me cara dona la ze restada preocupada con tute le responsabilità del laoro e i viai che gavarìssino de far. No ghe ga mai piasesto a Susan viaiar de avion, ma femo questo tante volte. Susan la dise che i comentari amorosi dele done dei altri fradei del Corpo Governante la incoraia a far el so meio par seitar giutarme. Ela sempre la me ga giutà e mi la amo par quel.

Nel me scritòrio, ghen’ò tanti ritrati spessiai. Questi ritrati i me giuta a ricordarme dela bela vita che go sempre bio. Son stà tanto benedio parché me go sforsà de seitar ricordarme del me amor par Geovà.