1, 2. Parché che i servi de Geovà i scólie ben le robe che i mete su? (Varda el ritrato nel scomìnsio del artìcolo.)

 UN GIORNAL nela Olanda el ga dito sora una riunion che i lìderi religiosi i ga fato: “Tanti i gavea su robe par far ginàstica parché l’era caldo.” El giornal el ga anca scrito: ‘Ma el congresso dele Testimònie de Geovà l’era ben difarente. Òmini e toseti i gavea su terno e gravata. Done e tosate le gavea su còtole bele e che no le era massa curte.’ Tante volte, le Testimònie de Geovà le riceve lode parché ‘le se veste con robe apropiade, de maniera modesta e con bon giudìssio, . . . de maniera pròpia de quei che i adora a Dio.’ (1 Tim. 2:9, 10) El apòstolo Paolo l’era drio parlar dele done, ma questo consìlio l’è bon anca par i òmini cristiani.

² Par i servi de Geovà, l’è importante saver che le robe che i mete su lo assa contento. (Gén. 3:21) Come Sovrano del Universo, lu el ga assà orientassion ciare nela Bìblia par giutarne a saver che tipo de robe ghemo de meter su. Cossita quando scoliemo una roba, no ghemo de pensar sol in quel che ne piase ma in quel che assa Geovà contento.

3. Cossa che la Lege la disea sora la maniera de vestirse? Cossa che imparemo?

³ Par esémpio, la Lege che Geovà el ga dato a Moisè la giutea i israeliti a no far le robe imorai che i altri i fea. Una parte de questa Lege la disea che le done no le gavea de meter su robe de òmini e che òmini no i gavea de meter su robe de done. (Ledi Deuteronómio 22:5.) Questa lege la assa ciaro che Geovà el òdia el tipo de robe che fà un omo someairse a una dona o che fà una dona someairse a un omo, o che no assa ciaro se l’è un omo o una dona.

4. Cossa che pol giutarne a scòlier ben le robe de vestirse?

⁴ La Bìblia la ga prinsipi che i ne giuta a scòlier ben le robe de vestirse no importa el paese, la cultura o el tempo. Ma no ghemo bisogno de una lista con tute le robe che ghemo o nò de meter su parché questi prinsipi i ne giuta a far bone dessision e al medèsimo tempo meter su robe che ne piase. Alora, ndemo veder un per de prinsipi che pol giutarne a esser sicuri che semo drio far de acordo con ‘quel che Dio el vol, che l’è bon, perfeto e ghe piase a Lu’. — Rom. 12:1, 2.

5, 6. Cossa che le persone le pensarà de noantri se tendemo ben dela nostra aparensa?

⁵ Quando le persone le ne vede, le pol gaver una idea sora noantri de acordo cola nostra aparensa. (1 Sam. 16:7) El apòstolo Paolo el ga scrito che semo rapresentanti de Dio (Ledi 2 Corinti 6:4.). Par quela, no podemo mia pensar sol in noantri stessi o in quel che ne fà sentirse ben quando ndemo vestirse. Quando capimo i prinsipi dela Parola de Dio, no metemo su robe massa tacade, massa curte o che le ciama atension par noantri. Questo vol dir anca no meter su robe che le ciama atension par le nostre parte del corpo che i altri no i ga mia de veder. No volemo che le persone le se sinta invergognade o le gàpia de vardar par nantra banda par causa dele robe che ghemo su.

⁶ L’è pi fàcile che le persone le gàpia rispeto par noantri come servi de Dio se metemo su robe nete, ben postade e bele. Cossita, le volerà imparar sora Dio e le gavarà de pi rispeto par la nostra organisassion. Alora, sarà pi fàcile che le scolte el messàgio importante che predichemo.

7, 8. Quando che ghemo de tender ancora de pi dele robe che metemo su?

⁷ Noantri mostremo che ghemo rispeto par Geovà, par i nostri fradei e sorele e par quei che predichemo quando se vestimo de una maniera che ghe dà onor a Geovà e al nostro messàgio. (Rom. 13:8-10) Questo l’è ancora pi importante quando ndemo ale riunion e ala predicassion. Noantri ghemo de vestirse “de una maniera pròpia de quei che i adora a Dio.” (1 Tim. 2:10) Pol esser che un tipo de robe sìpia bon in una region ma no tanto in quel’altra. Par quela, el pòpolo de Geovà sempre el tien de conto el costume dele persone par no ofender a nissuni.

⁸ Ledi 1 Corinti 10:31. Quando ndemo a assemblee e congressi, volemo meter su robe modeste e no far come arquante persone del mondo che le se veste de una maniera che ciama massa atension par lore. Ghemo de tender dele robe che metemo su prima e dopo de un congresso, quando semo drio rivar o ndar via del otel o quando ndemo a spasso coi fradei. No volemo meter su robe che par che ndemo far ginàstica o che no la ze mia neta gnanca ben postada. Cossita, se vien fora una oportunità de predicar, no gavaremo vergogna de dir che semo una Testimònia de Geovà.

9, 10. Come che Filipensi 2:4 ne giuta a scòlier le robe de vestirse?

⁹ Ledi Filipensi 2:4. Ghemo de pensar in come i fradei i ndarà sentirse quando i vede la nostra maniera de vestirse. Un motivo l’è parché el pòpolo de Dio el fà tanto sforso par meter in pràtica questo consìlio dela Bìblia: “Gavé de far morir le parte del vostro corpo sora la imoralità sessual, la impuressa e la passion sensa controlo.” (Col. 3:2, 5) Arquanti dei nostri fradei i gavea una vita imoral nel passà e fursi i ga de sforsarse tanto par no gaver voie sbaliade ancoi. (1 Cor. 6:9, 10) No volemo che le nostre robe le fae ancora pi fadiga par lori darghene fora con queste voie.

¹⁰ La nostra maniera de vestirse la ga giutar che la congregassion la sìpia un posto sicuro par i fradei. Cossita lori no i gavarà voie sbaliade ntele riunion o quando semo drio divertirse. L’è vera che podemo scòlier le robe che ndemo meter su, ma tuti i ga la responsabilità de vestirse de una maniera che giute i altri a pensar, parlar e far robe de una maniera che assa Dio contento. (1 Pie. 1:15, 16) Quel che el ga vero amor par i altri “no’l se comporta de maniera sbaliada, no’l va in serca dei so interessi”. — 1 Cor. 13:4, 5.

11, 12. Come Eclesiaste 3:1, 17 ne giuta a pensar ben quando ndemo scòlier una roba par meter su?

¹¹ Quando i va scòlier una roba par meter su, i servi de Dio i se ricorda che ‘par tute le robe ghen’è un tempo’. (Ecl. 3:1, 17) L’è vera che el tempo, la staion del ano e altre robe pol influensar le nostre scólie. Ma quel che Geovà el dise che l’è giusto o sbalià mai el càmbia. — Mal. 3:6.

¹² Pol esser fadiga vestirse de una maniera modesta e con bon giudìssio nte un posto che fà tanto caldo. Par quela, i nostri fradei e sorele i ghe dà tanto valor ai sforsi che femo par no doperar robe massa tacade o massa grande e che pol mostrar de pi de quel che ghe vol. (Giò 31:1) E quando semo nela praia o nela pissina, le nostre robe no le ga de ciamar atension par noantri, come arquante persone le fà. (Pro. 11:2, 20). Ma noantri che adoremo a Geovà volemo dar un bel testimònio de lu par meso dela roba che metemo su.

13. Come 1 Corinti 10:32, 33 ne giuta a scòlier che robe ndemo meter su?

¹³ Nantro prinsìpio bìblico che ne giuta a far bone scólie dele robe che ndemo meter su l’è in 1 Corinti 10:32, 33. (Ledi.) Questo testo el mostra che ghemo de preocuparse cola cossiensa dei nostri fradei e de quei che no i serve mia a Geovà. Alora, l’è tanto importante no meter su robe che ndarà far i altri sentirse mal. Paolo el ga scrito: “Tuti noantri ghemo de far contento el pròssimo par el so ben par giutarlo a tirarse su. Parché gnanca el Cristo el ga fato contento a si stesso.” (Rom. 15:2, 3) Par Gesù, la roba pi importante l’era far la volontà de Dio e giutar i altri e nò far quel che lu el volea. Alora, anca se ne piase tanto de una roba, no ndaremo meterla su se farà che una persona no la ne scolte nela predicassion.

14. Come che i genitori i pol insegnar ai so fioi a scòlier robe che ndarà darghe onor a Geovà?

¹⁴ I genitori i ga de insegnar ai fioi a meter in pràtica i consili dela Bìblia. Par quela l’è importante insegnarghe anca a meter su robe che ndarà piaserghe a Geovà. (Pro. 22:6; 27:11) Come che i genitori i pol giutar i fioi a rispetar el nostro Dio che l’è santo? Lori i pol farlo par meso de un bon sesémpio e par darghe orientassion ai fioi con amor e de una maniera fàcile de capir. L’è tanto bon quando i genitori i giuta i so fioi a capir come scòlier le robe e ndove comprarle. Cossita, i fioi i impara che i ga de scòlier una roba no sol parché ghe piase a lori, ma i gavarà in mente che lori i representa a Geovà e par quela i ga de scòlier una roba che ndarà darghe onor a lu.

15. Cossa che ghemo de pensar vanti de scòlier una roba che ndaremo vestir?

¹⁵ La Bìblia la ne giuta a scòlier robe che ndarà darghe onor a Geovà. Ma ancora cossita podemo meter su robe che ndarà piaserne e che podaremo pagarle. Le nostre robe le ga de esser sempre nete, ben postade, no ciamar massa atension par noantri e de acordo cola ocasion e col costume del posto ndove semo de star.

16. Parché che l’è bon sforsarse par catar robe modeste?

¹⁶ No l’è mia fàcile catar robe bele e che no le ciama massa atension par noantri stessi. E ghen’è tanti posti che sol i vende robe dela moda. Alora, pol esser fadiga catar còtole, vestidi, bluse, terno e braghe che no le sìpia massa tacadi. Ma ghemo de ricordarse che i nostri fradei i ghe piase tanto del nostro sforso de meter su robe bele e dessente. E questo sforso anca el dà onor al nostro pare nel cielo.

17. Sarà che l’è giusto un fradel doperar barba? Spiega.

¹⁷ Sarà che l’è giusto un fradel doperar barba? La Lege che Geovà el ga dato ai israeliti la disea che i òmini i gavea de doperar barba. Ma i servi de Dio ancoi no i ga pi de obedir ala Lege. (Lev. 19:27; 21:5; Gál. 3:24, 25) In arquanti posti, no l’è mia un problema i òmini doperar la barba ben fata. Le persone no le ndaria rigetar el messàgio del Regno par quela. In arquanti paesi, ghen’è ansiani e servi ministeriai che i dopera la barba. Ancora cossita arquanti fradei i scólie no doperarla. (1 Cor. 8:9, 13; 10:32) In altri paesi, le persone no le ga el costume de doperar la barba. Alora se i fradei i la doperesse, no ghe daria un bon testimònio e lu no’l saria drio far ‘tuto polito’. — Rom. 15:1-3; 1 Tim. 3:2, 7.

18, 19. Come che Michea 6:8 ne giuta a vestirse de una maniera che contenta a Geovà?

¹⁸ Restemo pròpio contenti de saver che Geovà no’l ga fato una lista dele robe che podemo o nò meter su. Invesse, lu el vol che doperemo la libertà de scólia par far bone dessision doperando i prinsipi dela Bìblia. Cossita, par meso dela nostra maniera de vestirse ndaremo mostrar che obedimo a Dio con umiltà. — Mic. 6:8.

¹⁹ La persona che la ze ùmile la pensa se la maniera che la se veste la ze de acordo cola maniera de pensar de Geovà, che l’è santo e puro. Ela anca la rispeta i sentimenti dei altri. Alora, quando obedimo a Dio con umiltà, tegnemo de conto quel che lu e le altre persone le pensa.

20. Cossa che le persone le ga de pensar sora la nostra maniera de vestirse?

²⁰ Le robe che metemo su le ga de mostrar che amemo a Geovà e che rapresentemo a lu. I fradei che i se veste de una maniera che ghe piase a Geovà i mèrita lode parché le so scólie fà le persone voler scoltar le bone notìssie. Se anca noantri femo bone dessision sora la nostra maniera de vestirse ndaremo seitar a lodar a Geovà, che se veste de ‘glòria e belessa’. — Sal. 104:1, 2.