La Bìblia la càmbia la vita dele persone

COSSA ga motivà un gióveno a taiar i so longhi cavei con dresse e a vinser el preconceto che el gavea contra i bianchi? Cossa ga giutà un gióveno che l’era violento e laorea par traficanti de droghe a cambiar la so vita? Vedemo la stòria de questi due gióveni.

“Son stà bon fin molar el me preconceto.” — HAFENI NGHAMA

ETÀ: 34 ANI

PAESE: ZÀMBIA

CHI ERO: RASTAFARI

EL ME PASSÀ: Son nassesto nte un campo de refugiadi nela Zàmbia. In meso la guera me mama la era scampà via par la Namibia, la gavea scominsià far parte de una organisassion del pòpolo dela Àfrica del sul del oeste (Swapo, sigla in inglese). Questa organisassion lotea contra el governo che ghen’era in Namibia in quel tempo.

Fin che gavea 15 ani, son stà in tanti campi de refugiadi. I gióveni lì i era trenadi par esser i primi nela lota par la libertà. Lori i ne insegnea e metea rento dela nostra testa che gaveino de ver òdio par i bianchi.

Quando gavea 11 ani, mi volea far la crisma nela ciesa del campo. In quela ciesa ghen’era catòlichi romani, luterani, anglicani e tanti altri tuti insieme. Go parlà con un pastor che me ga dito de no far la crisma. De li avanti son deventà ateo, no credea pi in Dio. Con 15 ani, mi volea tanto lotar contra la ingiustìssia che tuti i negri dela Àfrica sofria. Mi amea el reggae, alora go dessidio far parte del movimento rastafari. Go assà cresser i cavei e fati ala maniera rastafari e go scominsià a fumar macogna. Me go fermà de magnar carne e go scominsià a lotar par la libertà dei negri. Ma mi seitea cola vita imoral, vardar filmi violenti e anca doperea tante parole sporche.

LA BÌBLIA LA GA CAMBIÀ TANTO LA ME VITA: Nel ano de 1995, gavea 20 ani, e go scominsià pensar par ndove la me vita la era drio portarme. Mi studiea tute le publicassion rastafari che catea. Arquante parlea sora la Bìblia, ma no se capia gnente. Cossita go dessidio leder la Bìblia mi mi sol.

Dopo, un amigo del movimento rastafari me ga dà un libro che le Testimònie de Geovà le gavea fato par studiar la Bìblia, e go scominsià studiar mi mi sol quel libro cola me Bìblia. Tempo dopo, go cognossesto le Testimònie de Geovà e go tacà studiar con lori.

Me go sforsà tanto e son stà bon de molarghela de fumar e de bever massa. (2 Corinti 7:1) Go cambià tanto, me go taià i cavei, me go fermà de veder pornografia e filmi violenti e ghela go molada de dir parole sporche. (Efesi 5:3, 4) Col tempo, son stà bon fin de vinser el me preconceto contra i bianchi. (Ati 10:34, 35) Par far questi cambiamenti, go bio de fermarme de scoltar mùsica sora el rassismo, e anca go assà de banda amicìssie che me fea vegner voia de viver come vivea vanti.

Dopo de far questi cambiamenti, son ndà in serca de un Salon del Regno dele Testimònie de Geovà e go dito che volea deventar un de lori. Quando go dessidio de batesarme, quei de me fameia no i ze stati contenti. Me mama me ga dito che podea scòlier una de tante religion “cristiane”, manco che Testimònia de Geovà. Un dei me zii che gavea un laoro importante nel governo, sempre me critichea parché gavea dessidio esser Testimònia de Geovà.

Ma imparar sora Gesù, come el tratea le persone e meter in pràtica i so consili, me ga giutà darghene fora quando infrontea oposission e i me tolea in giro. Quando go fato comparassion intrà quel che le Testimònie de Geovà insegna e quel che la Bìblia la dise, go visto pròpio che gavea catà la vera religion. Par esémpio, lori i prèdica ai altri, come la Bìblia la dise de far. (Mateo 28:19, 20; Ati 15:14) E no i se mete mia ntela polìtica. — Salmo 146:3, 4; Gioani 15:17, 18.

COME SON STÀ GIUTÀ: Cambiar la me vita par viver de acordo cola Bìblia me ga giutà tanto. Par esémpio, molarghe de fumar macogna me ga giutà anca sparagnar tanti soldi. No go pi alussinassion e adesso go una salute meio, tanto nel corpo come nela mente.

Una roba che go volesto de gióveno go adesso: un ogetivo nela vita. E pi importante, son stà bon de rivarme darente de Dio. — Tiago 4:8.

“Go imparà a controlar la ràbia.” — MARTINO PEDRETTI

ETÀ: 43 ANI

PAESE: AUSTRÀLIA

CHI ERO: TRAFICANTE DE DROGHE

EL ME PASSÀ: Quando mi era picinin, la me fameia la gavea el costume de cambiarse tanto. Semo ndà de star in cità pìcole e grande. E par un tempo anca distante dela cità, insieme coi aborigeni. Me fà contento quando penso de sti ani, insieme coi me primi cusini, me zii, sempre drio pescar, cassar, e far feramente e altre robe de legno.

Me pare el lotea boxe e el me ga insegnà de picinin a far compagno a lu. Par quela mi era tanto violento. Quel che ne piasea a mi e me amighi l’era tacar brighe, èrino sempre in serca de barufe. Dopereino cortei e bastoni par darghe a grupi de 20 o de pi persone.

Par guadagnar soldi, mi vendea droghe e robe che quei che i laorea nel porto i ciavea. E anca mi ndea drio de quei che i gavea dèbiti coi traficanti par ciapar i soldi. Par far questo laoro mi ghe metea paura coi revolver e la sciopa. Mi volea deventar un assassino. Quel che gavea in testa l’era: copo o sarò copà.

LA BÌBLIA LA GA CAMBIÀ TANTO LA ME VITA: Quando mi era picinin go sentio parlar dele Testimònie de Geovà. E quando gavea 20 ani, me penso che go domandà a me mama se la savea ndove che podaria catarli. Due giorni dopo, Dixon, un omo che l’è Testimònia de Geovà, el ga batesto nela me porta. Se ghemo parlà e el me ga convidà par ndar a una riunion dele Testimònie de Geovà. Son ndà in quela riunion e no me go mai fermà. Fà belche de pi de 20 ani. Tute le domande che mi fea, le Testimònie de Geovà le me rispondea cola Bìblia.

L’è stà bel imparar che Geovà el se preocupa cole persone, anca coi rugni. (2 Piero 3:9) E che Geovà l’è un pare amoroso che me tenderia, anca se nissuni lo gavaria pi fato. E che pace go sentio quando go imparà che se cambiesse la me vita, lu el me perdonaria. Le parole de Efesi 4:22-24 le ga smissià fondo rento de mi. Le me ga incoraià a “cavar via la vècia personalità” e a “meter su la nova personalità che la ze stata creada de acordo cola volontà de Dio”.

Ghe ga volesto tanto par cambiar de vita. Fora dela stimana mi no volea gnanca saverghene de droghe, ma quando rivea sabo e doménega, insieme coi me amighi, no era bon de dir de nò. Go visto che se volea pròpio cambiar la me vita, gavea de restar distante de quei amighi. Par quela me son cambià par nantro stato. Arquanti dei me amighi i ga volesto vegner con mi par giutarme e mi go acetà. Nel meso del viaio i ga scominsià doperar macogna e i ga volesto darmela, ma go dito de nò, parché volea fermarme con questo vìssio. Nela divisa del stato se ghemo spartio. De lì avanti go seità el viaio mi mi sol. Dopo, go savesto che con una arma granda i ga assaltà un banco.

COME SON STÀ GIUTÀ: Dopo che son stà distante, go visto che l’era pi fàcile cambiar la me vita. Nel ano de 1989 me go batesà come Testimònia de Geovà. Dopo, anca me sorela, me mama e me pupà i ga scominsià a servir a Geovà.

Fà belche 17 ani che son maridà e go tre bei fioi. Go imparà a controlar la ràbia, anca quando i altri i proa farme deventar cativo. Go imparà a amar tute le persone, de tute le “tribo, pòpoli e léngue”. (Apocalisse 7:9) Sinto nela me vita le parole de Gesù: “Se valtri obedì a quel che mi insegno, sì pròpio me dissìpoli. Cognosseré la verità e la verità la ve libertarà.” — Gioani 8:31, 32.

[Comentàrio]

Par far questi cambiamenti, go bio de fermarme de scoltar mùsica sora el rassismo.

[Comentàrio]

Quel che ne piasea a mi e me amighi l’era tacar brighe, èrino sempre in serca de barufe. Dopereino cortei e bastoni par darghe a grupi de 20 o de pi persone.