• ANO DE NASSIMENTO: 1941

• PAESE: BENIN

• CHI ERO: MARIDÀ CON DIVERSE DONE, CONTRA LE TESTIMÒNIE DE GEOVÀ

EL ME PASSÀ:

Mi son de Cotonou, che la ze una granda cità del Benin. La me fameia la era catòlica, ma mi no ndea tanto ala ciesa. Ntel posto ndove mi ero de star, tanti catòlichi i era maridadi con diverse done parché la lege la assea che i òmini i se maridesse con de pi de una dona. Alora, col tempo me go maridà con 4 done.

Intorno dei ani 1970, ga scominsià una revolussion nel me paese. Go pensà che questo giutaria a risolver i problemi. Mi go fato tuto quel che podea par giutar in quela revolussion e go scominsià a far parte dela polìtica. Come le Testimònie de Geovà no le fà parte dela polìtica, tuti quei che i volea far la revolussion i ndea contra lore. Anca mi fea questo. Quando i missionari dele Testimònie de Geovà i ze stati paradi via del paese nel ano 1976, mi ero sicuro che lore mai pi le tornaria qua.

LA BÌBLIA LA GA CAMBIÀ TANTO LA ME VITA:

La revolussion la ze finia nel ano 1990 e, mi no spetea, ma suito i ze rivadi qua missionari Testimònie de Geovà. Alora, go scominsià a pensar che Dio l’era pròpio drio giutar quele persone. In quel tempo, mi go cambià de laoro e un dei me coleghi che l’era Testimònia de Geovà suito el ga scominsià a parlar con mi sora quel che el credea. Lu el me ga fato veder nela Bìblia tanti testi che i mostrea che Geovà l’è un Dio de amor e giustìssia. (Deuteronómio 32:4; 1 Gioani 4:8) Me ga piasesto tanto de queste qualità che go volesto imparar de pi sora Geovà. Alora go scominsià a studiar la Bìblia.

In poco tempo, go scominsià a ndar ale riunion dele Testimònie de Geovà. No l’era gnanca de creder el amor che ghen’era intrà de lore. Lore no le fea difarensa cole persone par causa dela so rassa o de quanti soldi le gavea. Quanto de pi mi restea insieme dele Testimònie de Geovà, pi sicuro mi ero che lore le ze vere seghidore de Gesù. — Gioani 13:35.

Go capio che mi gavea de assar de ndar ala ciesa catòlica se mi volesse servir a Geovà. Questo no l’era mia fàcile, parché mi me preocupea tanto con quel che i altri ndaria pensar de mi. Col aiuto de Geovà, dopo de tanto tempo, go bio coraio e me go fermà de ndar ala ciesa.

Ma mi gavea de cambiar nantra roba importante. Go imparà nela Bìblia che Dio el vol che el matrimònio el sìpia sol intrà un omo e una dona. (Génesi 2:18-24; Mateo 19:4-6) De acordo cola lege de Dio, l’era giusto che mi fusse maridà sol cola me prima dona. Alora, go registrà el me primo matrimònio e go molà le me altre done. Ma mi go tendesto che lore le gavesse quel che ghe ocorea. Col tempo, due de lore le ze deventade Testimònie de Geovà.

COME SON STÀ GIUTÀ:

La me sposa la ze ancora catòlica, ma la rispeta la me dessision de servir a Geovà. Noantri due pensemo che adesso mi son un sposo meio.

Mi pensea che la polìtica la podaria far restar meio el posto che mi ero de star. Ma tuto quel che go fato l’è stà par gnente. (Mateo 6:9, 10) Adesso mi sò che sol el Regno de Dio el pol risolver tuti i problemi che ghen’è. Ringràssio tanto a Geovà che me ga mostrà come gaver una vita felice.

• ANO DE NASSIMENTO: 1977

• PAESE: BRAZIL

• CHI ERO: PASTOR DE UNA CIESA PENTECOSTAL

EL ME PASSÀ:

Son stà slevà nela region pi poareta de Itu, São Paulo. In quel posto sucedea tanti crimi.

Mi ero tanto violento, gavea una vita imoral e anca vendea droghe. Col tempo, go capio che, se mi seitesse a viver de quela maniera, suito saria metesto in preson o saria morto. Alora go proà cambià la me vita. Go scominsià a ndar ala ciesa Pentecostal e son deventà pastor.

Mi catea che par meso dela ciesa podaria giutar le persone. Mi anca fea un programa religioso nela ràdio e, par quela, le persone ndove ero de star me cognossea. Ma pin pianeto, go visto che nela ciesa le persone no le se preocupea pròpio una col’altra e manco ancora in darghe onor a Dio. Lore le volea sol guadagnar soldi. Alora, go dessidio fermarme de ndar in quela ciesa.

LA BÌBLIA LA GA CAMBIÀ TANTO LA ME VITA:

Go scominsià a studiar la Bìblia cole Testimònie de Geovà e suito go visto che le era pròpio difarente dele persone dele altre ciese. Lore no sol le parlea de amar a Dio e al pròssimo, ma le metea questo in pràtica. Alora, son restà maraveià. Nantra roba che me ga piasesto l’è che le Testimònie de Geovà no le se mete nela polìtica gnanca le giuta nele guere. (Isaia 2:4) Queste robe me ga fato esser sicuro che mi gavea catà la vera religion, la strada streta che la mena ala vita. — Mateo 7:13, 14.

Go capio che se mi volesse contentar a Dio, mi gavea de cambiar tanto la me vita. Me ocorea restar pi tempo insieme dela me fameia e anca gavea de esser pi ùmile. No l’è mia stà fàcile far questi cambiamenti, ma gràssie al aiuto de Geovà son stà bon de farli. La me dona belche la studiea la Bìblia e la se ga maraveià coi cambiamenti che go fato. Par quela, ela la ga fato tanti cambiamenti par contentar a Geovà. In poco tempo, èrino sicuri che voléino esser Testimònie de Geovà. Mi e ela semo stati batesadi nel medèsimo giorno.

COME SON STÀ GIUTÀ:

Mi e la me dona semo pròpio contenti che semo stati boni de giutar i nostri tre fioi a deventar amighi de Geovà. Semo una fameia felice e ringràssio tanto a Geovà che el me ga giutà a catar la verità che ghen’è nela so Parola. La Bìblia la càmbia pròpio la vita dele persone e questo ga sucedesto con mi.

• ANO DE NASSIMENTO: 1957

• PAESE: AUSTRÀLIA

• CHI ERO: MALTRATADA DE PICININA

EL ME PASSÀ:

Mi son stata slevada in Newcastle in Nova Gales del Sud. Son la pi vècia de sete fioi. El me pare e la me mare i era violenti. Me pare l’era un ciucheton. La me mare la era tanto violenta e la me disea su. Ela la disea che mi ero tanto rugna e che ndea sofrir nel inferno de fogo. Mi restea spaurada con questo.

Dele volte mi ghen ciapea tanto che gnanca podea ndar ala scola. Quando mi gavea 11 ani, le autorità le me ga portà via del me pare e dela me mare e le ga tendesto de mi. Dopo son ndata de star cole móneghe nte un convento, ma quando gavea 14 ani son ndata via de là. Mi no volea mia tornar casa, par quela, son restada nele rue, nela periferia de Sydney.

In questo tempo, mi go fato prostituission, vedea pornografia e go doperà droghe e àlcol. Mi son restada un tempo nel posto de star del paron de una boate. Là ga sucedesto una roba che me ga assà spaventada. Nte una note, quando due òmini i ze rivadi, el paron el me ga mandà par el quarto, ma mi scoltea cossa che i era drio dir. Lu el ga dito che ndaria venderme par questi òmini. Lori i ndaria ciaparme, meterme nte un navio e mandarme par el Giapon par laorar nte una bodega. Mi son restada tanto spaurada che go saltà dela sacada par ndar via de là in serca de aiuto.

Go catà un omo che el me ga giutà. Lu l’era in Sydney par un tempo. Mi ghe go spiegà la me situassion. Invesse de darme soldi, lu el me ga menà a un posto par lavarme e magnar. Se gavemo maridà un ano dopo e semo insieme fin ancoi.

LA BÌBLIA LA GA CAMBIÀ TANTO LA ME VITA:

Quando go scominsià a studiar cole Testimònie de Geovà, go sentio tante emossion difarente. Mi gavea imparà che l’era Dio che fea noantri sofrir, ma dopo go visto che l’è el Diaol che el fà questo e go sentio tanta ràbia de lu. Quando go savesto che no ghen’è mia un inferno ndove le persone le sofre, son restada tanto contenta, parché questo me gavea spaurà par tuta la vita.

Mi son restada maraveiada de veder che tuto quel che le Testimònie de Geovà le fà l’è de acordo cola Bìblia. Lore le mete in pràtica quel che le crede. Ancora che mi no fusse una persona bona, le Testimònie de Geovà sempre me tratea con amor e rispeto.

La roba pi difìcile par mi l’è che mi catea che no’l valea gnente. Mi gavea schifo de mi stessa, e par tanto tempo go pensà cossita, anca dopo de batesada. Mi amea a Geovà, ma pensea che lu mai ndaria amar una persona come mi.

Quìndese ani dopo del me batésimo, ga sucedesto una roba che ga cambià del tuto la me maniera de pensar. Mi ero nela riunion e el orador el ga parlà sora Tiago 1:23, 24. Questi versìcoli i dise che la Bìblia la ze come un spècio, che ne giuta a vederne dela maniera che Geovà el ne vede. Ntel scomìnsio, no go mia acetà questa idea, parché voler che Geovà el me amesse l’era massa par mi.

Arquanti giorni dopo, go visto un testo che ga cambià la me vita. L’era Isaia 1:18: “Alora, vegné e ndemo meter tuto a posto intrà de noantri. . . . Anca se i vostri pecati i ze come un pano rosso, i deventarà bianchi come la neve.” Parea che l’era Geovà drio dirme: “Cara, ndemo risolver i nostri problemi. Mi te cognosso, cognosso i to pecati e el to cuor. Mi te amo.”

Quela note, mi no son stata bona dormir. Mi no credea che Geovà el podea amarme, ma go pensà tanto sora el sacrifìssio de Gesù. Go visto che Geovà el ga bio tanta passiensa con mi e l’era drio mostrar che el me amea fea tanto tempo. Ma l’era come se mi disesse che el sacrifìssio de Gesù par i me pecati e el amor de Geovà no i bastesse par mi. L’era come se mi no volesse questo sacrifìssio. Ma dopo de pensarghe tanto nel risgate, go sentio che Geovà el me ama pròpio.

COME SON STATA GIUTADA:

Adesso, sento che son neta e amo la vita. El me matrimònio l’è restà meio e go tanta alegria parché el me esémpio pol giutar altre persone. Son cada volta pi darente de Geovà.

• ANO DE NASSIMENTO: 1974

• PAESE: RÙSSIA

• CHI ERO: ME PIASEA DE HEAVY METAL

EL ME PASSÀ:

Son nassesto in Votkinsk, la cità ndove l’era nassesto anca el famoso mùsico Tchaikovski. La me fameia la era poareta e ancora che el me pupà el fusse una bona persona, lu sempre el fea la ciuca. Par quela, mai gavéino pace casa.

Nela scola, mi no ero un bon aluno e, par quela, mi me catea manco dei altri. No ero bon de parlar cole persone e no me fidea dei altri. Par mi, l’era massa bruto ndar ala scola parché tuto l’era fadiga de far. Par esémpio, ancora che fusse bon de spiegar qualcossa, no ero bon de parlar gnente davanti ai altri. Quando go finio la scola, i me maestri i me ga dito che mi no ero bon de parlar quel che pensea e che gavea dificoltà de parlar coi altri. Questo me ga assà pròpio disgustà e sicuro che mi no valea gnente. Me domandea se ghen’era qualche ogetivo nela me vita.

Quando ero gióveno, go scominsià a bever. Prima, me sentia ben, ma quando bevea massa, me sentia tanto mal. Parea che la me vita no la gavea mia un ogetivo e mi son restà cada volta pi triste. Dele volte, mi restea tanti giorni rento casa e anca pensea de coparme.

Quando mi gavea 20 ani, go scominsià a scoltar heavy metal. Pensea che questo ndaria giutarme, ma l’è stà sol par poco tempo. Me sentia tanto contento con questa mùsica e go proà cognosser anca altre persone che ghe piasea de heavy metal. Go assà i me cavei lunghi, go metesto recini e me vestia compagno a quei che i sonea queste mùsiche. Son deventà una persona pròpio cativa e no pensea pi vanti de far qualcossa. Mi sempre barufea cola me fameia.

Mi pensea che el heavy metal ndaria farme una persona felice, ma no l’è mia stà cossita. Me piasea tanto de quei che i sonea quele mùsiche. Ma dopo che go savesto de arquante robe che lori i fea, l’era come se i me gavesse tradio.

Nantra volta, go pensà de coparme e adesso ero dessidio de farlo. Ma no lo go fato parché pensea nel sofrimento che la me mama la gavaria. Ela me gavea sempre giutà e la me amea tanto. Questo l’era tanto fadiga parché no volea seitar vivo e gnanca podea coparme.

Par no pensar pi in questo, go scominsià a leder libri de arquanti scritori dela Rùssia. Go ledesto una stòria che la parlea de un omo che el servia nte una ciesa. De colpo, me ze vegnesta una voia de far qualcossa par Dio e anca par i altri. Par la prima volta, go pregà a Dio e ghe go dito tuto quel che mi sentia. Ghe go domandà che el me giutesse a gaver un ogetivo nela vita. Intanto che ero drio pregar, go sentio tanta pace. Due ore dopo, ga sucedesto una roba de gnanca creder. Una Testimònia de Geovà la ze vegnesta là casa e la me ga domandà se volea studiar la Bìblia. Son sicuro che questa la era una risposta de Dio ala me orassion. Quel giorno l’è stà el primo de una vita nova e felice.

LA BÌBLIA LA GA CAMBIÀ TANTO LA ME VITA:

L’è stà fadiga, ma mi son stà bon de butar via tuto quel che l’era relassionà col heavy metal. Ancora cossita, par tanto tempo mi seitea ricordarme dele mùsiche. Mi ero drio imparar tante robe bone e meterle nela me mente e nel me cuor, par quela, no volea pensar anca in quele brute robe. Alora, mi proea mai ndar nte un posto ndove i sonea questo tipo de mùsica. Quando mi scominsiea pensar nei ani indrio, mi preghea tanto a Geovà. Questo me ga giutà a sentir “la pace de Dio che la ze pi granda de quel che podemo capir”. — Filipensi 4:7.

Go imparà nela Bìblia che i seghidori de Cristo i ga de parlar ai altri sora la so fede. (Mateo 28:19, 20) Mi pensea che mai saria bon de far questo. Ma mi gavea tanta alegria e pace par causa de quel che ero drio imparar e savea che anca i altri i gavea bisogno de queste verità. Alora, ancora che gavesse paura, go scominsià a parlar ai altri sora quel che ero drio imparar. Son restà maraveià quando go visto che parlar cole persone sora la Bìblia me fea tanto ben. Quel che mi credea l’è restà ancora pi forte nel me cuor.

COME SON STÀ GIUTÀ:

Ancoi mi son maridà e tanto felice. Go bio la alegria de insegnar la verità a tante persone, come me mama e me sorela. Adorar a Dio e giutar altri a cognosserlo ga dato un ogetivo ala me vita.